zvetAzvatara UpaniSad


auM | saha nAv avatu | saha nau bhunaktu |
saha vIryaM karavAvahai | tejasvi nAv adhItam astu | mA vidviSAvahai |

auM zAntiH zAntiH zAntiH

prathamo’dhyAyaH

hariH oM brahma-vAdino vadanti

kiM kAraNaM brahma kutaH sma jAtA
jIvAma kena kva ca saMpratiSThAH |
adhiSThitAH kena sukhetareSu
vartAmahe brahma-vido vyavasthAm ||1||

kAlaH svabhAvo niyatir yadRcchA
bhUtAni yoniH puruSa iti cintyA |
saMyoga eSAM na tv Atma-bhAvAd
AtmApy anIzaH sukha-duHkha-hetoH ||2||

te dhyAna-yogAnugatA apazyan
devAtma-zaktiM sva-guNair nigUDhAm |
yaH kAraNAni nikhilAni tAni
kAlAtma-yuktAny adhitiSThaty ekaH ||3||

tam eka-nemiM tri-vRtaM SoDazAntaM
zatArdhAraM viMzati-pratyarAbhiH |
aSTakaiH SaDbhir vizva-rUpaika-pAzaM
tri-mArga-bhedaM dvi-nimittaika-moham ||4||

paJca-sroto’mbuM paJca-yony-ugra-vakrAM
paJca-prANormiM paJca-buddhy-Adi-mUlAm |
paJcAvartAM paJca-duHkhaugha-vegAM
paJcAzad-bhedAM paJca-parvAm adhImaH ||5||

sarvAjIve sarva-saMsthe bRhante
asmin haMso bhrAmyate brahma-cakre |
pRthag AtmAnaM preritAraM ca matvA
juSTas tatas tenAmRtatvam eti ||6||

udgItam etat paramaM tu brahma
tasmiMs trayaM supratiSThA’kSaraM ca |
atrAntaraM brahma-vido viditvA
lInA brahmaNi tat-parA yoni-muktAH ||7||

saMyuktam etat kSaram akSaraM ca
vyaktAvyaktaM bharate vizvam IzaH |
anIzaz cAtmA badhyate bhoktR-bhAvAj 
jJAtvA devaM mucyate sarva-pAzaiH ||8||

jJAjJau dvAv ajAv IzanIzAv 
ajA hy ekA bhoktR-bhogyArtha-yuktA |
anantaz cAtmA vizva-rUpo hy akartA
trayaM yadA vindate brahmam etat ||9||

kSaraM pradhAnam amRtAkSaraM haraH
kSarAtmAnAv Izate deva ekaH |
tasyAbhidhyAnAd yojanAt tattva-bhAvAd 
bhUyaz cAnte vizva-mAyA-nivRttiH ||10||

jJAtvA devaM sarva-pAzApahAniH
kSINaiH klezair janma-mRtyu-prahANiH |
tasyAbhidhyAnAt tRtIyaM deha-bhede
vizvaizvaryaM kevala Apta-kAmaH ||11||

etaj jJeyaM nityam evAtma-saMsthaM
nAtaH paraM veditavyaM hi kiJcit |
bhoktA bhogyaM preritAraM ca matvA
sarvaM proktaM trividhaM brahmam etat ||12||

vahner yathA yoni-gatasya mUrtir
na dRzyate naiva ca liGga-nAzaH |
sa bhUya evendhana-yoni-gRhyas
tad vobhayaM vai praNavena dehe ||13||

sva-deham araNiM kRtvA praNavaM cottarAraNim |
dhyAna-nirmathanAbhyAsAd devaM pazyan nigUDhavat ||14||

tileSu tailaM dadhanIva sarpir
ApaH srotaHsv araNISu cAgniH |
evam AtmA’tmani gRhyate’sau
satyenainaM tapasA yo’nupazyati ||15||

sarva-vyApinam AtmAnaM kSIre sarpir ivArpitam |
Atma-vidyA-tapo-mUlaM tad brahmopaniSat param ||16||

tad brahmopaniSat param ||

iti prathamo'dhyAyaH 
||1||

* * * * * 
(2)
dvitIyo’dhyAyaH

yuJjAnaH prathamaM manas-tattvAya savitA dhiyaH |
agner jyotir nicAyya pRthivyA adhyAbharat ||1||1

yuktena manasA vayaM devasya savituH save |
suvargeyAya zaktyA ||2||2

yuktvAya manasA devAn suvaryato dhiyA divam |
bRhaj jyotiH kariSyataH savitA prasuvAti tAn ||3||3

yuJjate mana uta yuJjate dhiyo
viprA viprasya bRhato vipazcitaH |
vi hotrA dadhe vayunAvid eka
inmahI devasya savituH pariSTutiH ||4||4

yuje vAM brahma pUrvyaM namobhir 
vizloka etu pathy eva sUreH |
zRNvantu vizve amRtasya putrA 
A ye dhAmAni divyAni tasthuH ||5||5

agnir yatrAbhimathyate vAyur yatrAdhirudhyate |
somo yatrAtiricyate tatra saJjAyate manaH ||6||

savitrA prasavena juSeta brahma pUrvyam |
yatra yoniM kRNavase na hi te pUrvam akSipat ||7||

trir unnataM sthApya samaM zarIraM
hRdIndriyANi manasA sannivezya |
brahmoDupena pratareta vidvAn
srotAMsi sarvANi bhayAvahAni ||8||

prANAn prapIDyeha saMyukta-ceSTaH
kSINe prANe nAsikayocchvasIta |
duSTAzva-yuktam iva vAham enaM
vidvAn mano dhArayetApramattaH ||9||

same zucau zarkarA-vahni-bAlukA-
vivarjite zabda-jalAzrayAdibhiH |
mano’nukUle na tu cakSu-pIDane
guhA-nivAtAzrayaNe prayojayet ||10||

nIhAra-dhUmArkAnilAnalAnAM
khadyota-vidyut-sphaTika-zazInAm |
etAni rUpANi puraH-sarANi
brahmaNy abhivyakti-karANi yoge ||11||

pRthivy-ap-tejo’nila-khe samutthite
paJcAtmake yoga-guNe pravRtte |
na tasya rogo na jarA na mRtyuH
prAptasya yogAgni-mayaM zarIram ||12||

laghutvam Arogyam alolupatvaM
varNa-prasAdaM svara-sauSThavaM ca |
gandhaH zubho mUtra-purISam alpaM
yoga-pravRttiM prathamAM vadanti ||13||

yathaiva bimbaM mRdayopaliptaM
tejo-mayaM bhrAjate tat sudhAntam |
tad vAtma-tattvaM prasamIkSya dehI
ekaH kRtArtho bhavate vIta-zokaH ||14||

yad Atma-tattvena tu brahma-tattvaM
dIpopameneha yuktaH prapazyet |
ajaM dhruvaM sarva-tattvair vizuddhaM
jJAtvA devaM mucyate sarva-pAzaiH ||15||

eSa ha devaH pradizo’nu sarvAH
pUrvo ha jAtaH sa u garbhe antaH |
sa eva jAtaH sa janiSyamANaH
pratyaG janAMs tiSThati sarvato-mukhaH ||16||

yo devo agnau yo’psu
yo vizvaM bhuvanam Aviveza |
ya oSadhISu yo vanaspatiSu
tasmai devAya namo namaH ||17||

iti dvitIyo'dhyAyaH 
||2||

* * * * * 

(3)
tRtIyo’dhyAyaH

ya eko jAlavAn Izata IzanIbhiH
sarvAMl lokAn Izata IzanIbhiH |
ya evaika udbhave sambhave ca
ya etad vidur amRtAs te bhavanti ||1||

eko hi rudro na dvitIyAya tasthur
ya imAMl lokAn Izata IzanIbhiH |
pratyaG janAMs tiSThati saJcukocAnta-kAle
saMsRjya vizvA bhuvanAni gopAH ||2||

vizvataz cakSur uta vizvato-mukho
vizvato-bAhur uta vizvatas-pAt |
saM6 bAhubhyAM dhamati sampatatrair
dyAv-AbhUmI janayan deva ekaH ||3||7

yo devAnAM prabhavaz codbhavaz ca
vizvAdhipo rudro maharSiH |
hiraNyagarbhaM janayAmAsa pUrvaM
sa no buddhyA zubhayA saMyunaktu ||4||

yA te rudra zivA tanUr aghorA’pApa-kAzinI |
tayA nas tanuvA zantamayA girizantAbhicAkazIhi ||5||8

yAbhiSuM girizanta haste bibharSy astave |
zivAM giritra tAM kuru mA hiMsIH puruSaM jagat ||6||9

tataH paraM brahma paraM bRhantaM
yathAnikAyaM sarva-bhUteSu gUDham |
vizvasyaikaM pariveSTitAram
IzaM taM jJAtvA’mRtA bhavanti ||7||

vedAham etaM puruSaM mahAntam
Aditya-varNaM tamasaH parastAt |
tam eva viditvAtimRtyum eti
nAnyaH panthA vidyate’yanAya ||8||10

yasmAt paraM nAparam asti kiMcid
yasmAn nANIyo na jyAyo’sti kazcit  |
vRkSa iva stabdho divi tiSThaty ekas
tenedaM pUrNaM puruSeNa sarvam ||9||

tato yad uttarataraM tad arUpam anAmayam  |
ya etad vidur amRtAste bhavanti athetare duHkham evApi yanti ||10||

sarvAnana-ziro-grIvaH sarva-bhUta-guhAzayaH |
sarva-vyApI sa bhagavAMs tasmAt sarva-gataH zivaH ||11||

mahAn prabhur vai puruSaH sattvasyaiSa pravartakaH |
sunirmalAm imAM prAptim IzAno jyotir avyayaH ||12||

aGguSTha-mAtraH puruSo’ntarAtmA
sadA janAnAM hRdaye sanniviSTaH |
hRdA manISo11 manasAbhikLpto
ya etad vidur amRtAs te bhavanti ||13||

sahasra-zIrSA puruSaH sahasrAkSaH sahasra-pAt |
sa bhUmiM vizvato vRtvAtyatiSThad dazAGgulam ||14||

puruSa evedaM sarvaM yad bhUtaM yac ca bhavyam |
utAmRtatvasyezAno yad annenAtirohati ||15||12

sarvataH pANi-pAdaM tat sarvato’kSi-ziro-mukham |
sarvataH zrutimal loke sarvam AvRtya tiSThati ||16||

sarvendriya-guNAbhAsaM sarvendriya-vivarjitam |
sarvasya prabhum IzAnaM sarvasya zaraNaM bRhat13 ||17||

nava-dvAre pure dehI haMso lelAyate bahiH |
vazI sarvasya lokasya sthAvarasya carasya ca ||18||

apANi-pAdo javano grahItA
pazyaty acakSuH sa zRNoty akarNaH |
sa vetti vedyaM na ca tasyAsti vettA
tam Ahur agryaM puruSaM mahAntam ||19||

aNor aNIyAn mahato mahIyAn
AtmA guhAyAM nihito’sya jantoH |
tam akratuH pazyati vIta-zoko
dhAtuH prasAdAn mahimAnam Izam ||20||14

vedAham etam ajaraM purANaM
sarvAtmAnaM sarva-gataM vibhutvAt |
janma-nirodhaM pravadanti yasya
brahma-vAdino hi pravadanti nityam ||21||

iti t.rtIyo'dhyAyaH 
||3||

* * * * * 

(4)
caturtho’dhyAyaH

ya eko’varNo bahudhA zakti-yogAd
varaNAn anekAn nihitArtho dadhAti |
vi caiti cAnte vizvam Adau sa devaH
sa no buddhyA zubhayA saMyunaktu ||1||

tad evAgnis tad Adityas
tad vAyus tad u candramAH |
tad eva zukraM tad brahma
tad Apas tat prajApatiH ||2||15

tvaM strI pumAn asi
tvaM kumAra uta vA kumArI |
tvaM jIrNo daNDena vaJcasi
tvaM jAto bhavasi vizvato-mukhaH ||3||16

nIlaH pataGgo harito lohitAkSas
taDid-garbha RtavaH samudrAH |
anAdimat tvaM vibhutvena vartase
yato jAtAni bhuvanAni vizvA ||4||

ajAm ekAM lohita-zukla-kRSNAM
bahvIH prajAH sRjamAnAM sa-rUpAH |
ajo hy eko juSamANo’nuzete
jahAty enAM bhukta-bhogAm ajo’nyaH ||5||

dvA suparNA sayujA sakhAyA
samAnaM vRkSaM pariSasvajAte |
tayor anyaH pippalaM svAdv atty
anaznann anyo abhicAkazIti ||6||17

samAne vRkSe puruSo nimagno’
nIzayA zocati muhyamAnaH |
juSTaM yadA pazyaty anyam Izam 
asya mahimAnam iti vIta-zokaH ||7||

Rco akSare parame vyoman
yasmin devA adhi vizve niSeduH |
yas taM na veda kim RcA kariSyati
ya it tad vidus ta ime samAsate ||8||18

chandAMsi yajJAH kratavo vratAni
bhUtaM bhavyaM yac ca vedA vadanti |
asmAn mAyI sRjate vizvam etat
tasmiMz cAnyo mAyayA sanniruddhaH ||9||

mAyAM tu prakRtiM vidyAn mAyinaM ca mahezvaram |
tasyAvayava-bhUtais tu vyAptaM sarvam idaM jagat ||10||

yo yoniM yonim adhitiSThaty eko
yasminn idam saM ca vicaiti sarvam |
tam IzAnaM varadaM devam IDyaM
nicAyyemAM zAntim atyantam eti ||11||

yo devAnAM prabhavaz codbhavaz ca
vizvAdhipo rudro maharSiH |
hiraNyagarbhaM pazyata jAyamAnaM
sa no buddhyA zubhayA saMyunaktu ||12||

yo devAnAm adhipo
yasmin lokA adhizritAH |
ya Ize asya dvipadaz catuSpadaH
kasmai devAya haviSA vidhema ||13||

sUkSmAtisUkSmaM kalilasya madhye
vizvasya sraSTAram aneka-rUpam |
vizvasyaikaM pariveSTitAraM
jJAtvA zivaM zAntim atyantam eti ||14||19

sa eva kAle bhuvanasya goptA
vizvAdhipaH sarva-bhUteSu gUDhaH |
yasmin yuktA brahmarSayo devatAz ca
tam evaM jJAtvA mRtyu-pAzAMz chinatti ||15||

ghRtAt paraM maNDam ivAtisUkSmaM
jJAtvA zivaM sarva-bhUteSu gUDham |
vizvasyaikaM pariveSTitAraM
jJAtvA devaM mucyate sarva-pAzaiH ||16||

eSa devo vizva-karmA mahAtmA
sadA janAnAM hRdaye saMniviSTaH |
hRdA manISA manasAbhikLpto
ya etad vidur amRtAs te bhavanti ||17||

yadA’tamas tan na divA na rAtrir
na san na cAsac chiva eva kevalaH |
tad akSaraM tat savitur vareNyaM
prajJA ca tasmAt prasRtA purANI ||18||

nainam UrdhvaM na tiryaJcaM
na madhye na parijagrabhat |
na tasya pratimA asti
yasya nAma mahad yazaH ||19||

na saMdRze tiSThati rUpam asya
na cakSuSA pazyati kazcanainam |
hRdA hRdi-sthaM manasA ya enam
evaM vidur amRtAste bhavanti ||20||

ajAta ity evaM kazcid bhIruH prapadyate |
rudra yat te dakSiNaM mukhaM tena mAM pAhi nityam ||21||

mA nas toke tanaye mA na AyuSi
mA no goSu mA na azveSu rIriSaH |
vIrAn mA no rudra bhAmito
vadhIr haviSmantaH sadAmit tvA havAmahe ||22||i

iti caturtho'dhyAyaH 
||4||

* * * * * 

(5)
paJcamo’dhyAyaH

dve akSare brahma-pare tv anante
vidyAvidye nihite yatra gUDhe |
kSaraM tv avidyA hy amRtaM tu vidyA
vidyAvidye Izate yas tu so’nyaH ||1||

yo yoniM yonim adhitiSThaty eko
vizvAni rUpANi yonIz ca sarvAH |
RSiM prasUtaM kapilaM yas tam agre
jJAnair bibharti jAyamAnaM ca pazyet ||2||

ekaika-jAlaM bahudhA vikurvann
asmin kSetre saMharaty eSa devaH |
bhUyaH sRSTvA patayas tathezaH
sarvAdhipatyaM kurute mahAtmA ||3||

sarvA diza Urdhvam adhaz ca tiryak
prakAzayan bhrAjate yad v anaDvAn |
evaM sa devo bhagavAn vareNyo
yoni-svabhAvAn adhitiSThaty ekaH ||4||

yac ca svabhAvaM pacati vizva-yoniH
pAcyAMz ca sarvAn pariNAmayed yaH |
sarvam etad vizvam adhitiSThaty eko
guNAMz ca sarvAn viniyojayed yaH ||5||

tad veda-guhyopaniSatsu gUDhaM
tad brahmA vedate brahma-yonim |
ye pUrvaM devA RSayaz ca tad vidus
te tan-mayA amRtA vai babhUvuH ||6||

guNAnvayo yaH phala-karma-kartA
kRtasya tasyaiva sa copabhoktA |
sa vizva-rUpas triguNas trivartmA
prANAdhipaH saJcarati sva-karmabhiH ||7||

aGguSTha-mAtro ravi-tulya-rUpaH
saGkalpAhaGkAra-samanvito yaH |
buddher guNenAtma-guNena caiva
ArAgra-mAtro’py aparo’pi dRSTaH ||8||

bAlAgra-zata-bhAgasya zatadhA kalpitasya ca |
bhAgo jIvaH sa vijJeyaH sa cAnantyAya kalpate ||9||

naiva strI na pumAn eSa na caivAyaM napuMsakaH |
yad yac charIram Adatte tena tena sa yujyate ||10||

saGkalpana-sparzana-dRSTi-mohair
grAsAmbu-vRSTyAtma-vivRddhi-janma |
karmAnugAny anukrameNa dehI
sthAneSu rUpANy abhisamprapadyate ||11||

sthUlAni sUkSmANi bahUni caiva
rUpANi dehI sva-guNair vRNoti |
kriyA-guNair Atma-guNaiz ca teSAM
saMyoga-hetur aparo’pi dRSTaH ||12||

anAdy-anantaM kalilasya madhye
vizvasya sraSTAram aneka-rUpam |
vizvasyaikaM pariveSTitAraM
jJAtvA devaM mucyate sarva-pAzaiH ||13||

bhAva-grAhyam anIDAkhyaM bhAvAbhAva-karaM zivam |
kalA-sarga-karaM devaM ye vidus te jahus tanum ||14||

iti paJcamo'dhyAyaH 
||5||

* * * * * 

(6)
SaSTho’dhyAyaH

svabhAvam eke kavayo vadanti
kAlaM tathAnye parimuhyamAnAH |
devasyaiSa mahimA tu loke
yenedaM bhrAmyate brahma-cakram ||1||

yenAvRtaM nityam idaM hi sarvaM 
jJaH kAla-kAlo guNI sarva-vid yaH |
tenezitaM karma vivartate ha
pRthivy-ap-tejo’nila-khAni cintyam ||2||

tat karma kRtvA vinivartya bhUyas
tattvasya tattvena sametya yogam |
ekena dvAbhyAM tribhir aSTabhir vA
kAlena caivAtma-guNaiz ca sUkSmaiH ||3||

Arabhya karmANi guNAnvitAni
bhAvAMz ca sarvAn viniyojayed yaH |
teSAm abhAve kRta-karma-nAzaH
karma-kSaye yAti sa tattvato’nyaH ||4||

AdiH sa saMyoga-nimitta-hetuH
paras trikAlAd akalo’pi dRSTaH |
taM vizva-rUpaM bhava-bhUtam IDyaM
devaM sva-citta-stham upAsya pUrvam ||5||

sa vRkSa-kAlAkRtibhiH paro’nyo
yasmAt prapaJcaH parivartate’yam |
dharmAvahaM pApa-nudaM bhagezaM
jJAtvAtma-stham amRtaM vizva-dhAma ||6||

tam IzvarANAM paramaM mahezvaraM
taM devatAnAM paramaM ca daivatam |
patiM patInAM paramaM parastAd
vidAma devaM bhuvanezam IDyam ||7||

na tasya kAryaM karaNaM ca vidyate
na tat-samaz cAbhyadhikaz ca dRzyate |
parAsya zaktir vividhaiva zrUyate
svAbhAvikI jJAna-bala-kriyA ca ||8||

na tasya kazcit patir asti loke
na cezitA naiva ca tasya liGgam
sa kAraNaM karaNAdhipAdhipo
na cAsya kazcij janitA na cAdhipaH ||9||

yas tantu-nAbha iva tantubhiH pradhAnajaiH svabhAvataH |
deva ekaH svam AvRNoti sa no dadhAtu brahmApyayam ||10||

eko devaH sarva-bhUteSu gUDhaH
sarva-vyApI sarva-bhUtAntarAtmA |
karmAdhyakSaH sarva-bhUtAdhivAsaH
sAkSI cetA kevalo nirguNaz ca ||11||

eko vazI niSkriyANAM bahUnAm
ekaM bIjaM bahudhA yaH karoti |
tam Atma-sthaM ye’nupazyanti dhIrAs
teSAM sukhaM zAzvataM netareSAm ||12||

nityo nityAnAM cetanaz cetanAnAm
eko bahUnAM yo vidadhAti kAmAn |
tat kAraNaM sAGkhya-yogAdhigamyaM
jJAtvA devaM mucyate sarva-pAzaiH ||13||

na tatra sUryo bhAti na candra-tArakaM
nemA vidyuto bhAnti kuto’yam agniH |
tam eva bhAntam anubhAti sarvaM
tasya bhAsA sarvam idaM vibhAti ||14||

eko haMso bhuvanasyAsya madhye
sa evAgniH salile saMniviSTaH
tam eva viditvAtimRtyum eti
nAnyaH panthA vidyate’yanAya ||15||

sa vizva-kRd vizva-vid Atma-yonir
jJaH kAla-kAlo guNI sarva-vid yaH |
pradhAna-kSetra-jJa-patir guNezaH
saMsAra-mokSa-sthiti-bandha-hetuH ||16||

sa tan-mayo hy amRta Iza-saMstho
jJaH sarvago bhuvanasyAsya goptA |
ya Ize’sya jagato nityam eva
nAnyo hetur vidyata IzanAya ||17||

yo brahmANaM vidadhAti pUrvaM
yo vai vedAMz ca prahiNoti tasmai |
taM ha devaM Atma-buddhi-prakAzaM
mumukSur vai zaraNam ahaM prapadye ||18||

niSkalaM niSkriyaM zAntaM niravadyaM niraJjanam |
amRtasya paraM setuM dagdhendanam ivAnalam ||19||

yadA carmavad AkAzaM veSTayiSyanti mAnavAH |
tadA devam avijJAya duHkhasyAnto bhaviSyati ||20||

tapaH-prabhAvAd deva-prasAdAc ca
brahma ha zvetAzvataro’tha vidvAn |
atyAzramibhyaH paramaM pavitraM
provAca samyag-RSi-saGgha-juSTam ||21||

vedAnte paramaM guhyaM purA-kalpe pracoditam |
nAprazAntAya dAtavyaM nAputrAyAziSyAya vA punaH ||22||

yasya deve parA bhaktiH yathA deve tathA gurau |
tasyaite kathitA hy arthAH prakAzante mahAtmanaH ||23||

oM saha nAv avatu saha nau bhunaktu saha vIryaM karavAvahai
tejasvi nAvadhItam astu mA vidviSAvahai

oM zAntiH zAntiH zAntiH

iti SaSTho’dhyAyaH

|| iti zvetAzvataropaniSat sampUrNA ||

* * * * *