1   [viraTa]  kimarthaM pANDavazreSTha bhAryAM duhitaraM mama  pratigrahItuM nemAM tvaM mayA dattAm ihecchasi 2   [arj]  antaHpure 'ham uSitaH sadA pazyan sutAM tava  rahasyaM ca prakAzaM ca vizvastA pitRvan mayi 3  priyo bahumataz cAhaM nartako gItakovidaH  AcAryavac ca mAM nityaM manyate duhitA tava 4  vahaH sthayA tayA rAjan saha saMvatsaroSitaH  ati zaGkA bhavet sthAne tava lokasya cAbhibho 5  tasmAn nimantraye tvAhaM duhituH pRthivIpate  zuddho jitendriyo dAntas tasyAH zuddhiH kRtA mayA 6  snuSAyA duhitur vApi putre cAtmani vA punaH  atra zaGkAM na pazyAmi ten azuddhir bhaviSyati 7  abhiSaGgAd ahaM bhIto mithyAcArAt paraMtapa  snuSArtham uttarAM rAjan pratigRhNAmi te sutAm 8  svasrIyo vAsudevasya sAkSAd deva zizur yathA  dayitaz cakrahastasya bAla evAstra kovidaH 9  abhimanyur mahAbAhuH putro mama vizAM patau  jAmAtA tava yukto vai bhartA ca duhitus tava 10   [virATa]  upapannaM kuruzreSThe kuntIputre dhanaMjaye  ya evaM dharmanityaz ca jAtajJAnaz ca pANDavaH 11  yatkRtyaM manyase pArtha kriyatAM tadanantaram  sarve kAmAH samRddhA me saMbandhI yasya me 'rjunaH 12   [vai]  evaM bruvati rAjendre kuntIputro yudhiSThiraH  anvajAnAt sa saMyogaM samaye matsyapArthayoH 13  tato mitreSu sarveSu vAsudeve ca bhArata  preSayAm Asa kaunteyo virATaz ca mahIpatiH 14  tatas trayodaze varSe nivRtte paJca pANDavAH  upaplavye virATasya samapadyanta sarvazaH 15  tasmin vasaMz ca bIbhatsur AninAya janArdanam  Anartebhyo 'pi dAzArhAn abhimanyuM ca pANDavaH 16  kAzirAjaz ca zaibyaz ca prIyamANau yudhiSThire  akSauhiNIbhyAM sahitAv Agatau pRthivIpate 17  akSauhiNyA ca tejasvI yajJaseno mahAbalaH  draupadyAz ca sutA vIrAH zikhaNDI cAparAjitaH 18  dhRSTadyumnaz ca durdharSaH sava zastrabhRtAM varaH  samastAkSauhiNI pAlA yajvAno bhUridakSiNAH  sarve zastrAstrasaMpannAH sarve zUrAs tanutyajaH 19  tAn AgatAn abhiprekSya matsyo dharmabhRtAM varaH  prIto 'bhavad duhitaraM dattvA tAm abhimanyave 20  tataH prayupayAteSu pArthiveSu tatas tataH  tatrAgamad vAsudeva vanamAlI halAyudhaH  kRtavarmA ca hArdikyo yuyudhAnaz ca sAtyakiH 21  anAdhRSTis tathAkrUraH sAmbo nizaTha eva ca  abhimanyum upAdAya saha mAtrA paraMtapAH 22  indrasenAdayaz caiva rathais taiH susamAhitaiH  AyayuH sahitAH sarve parisaMvatsaroSitAH 23  dazanAgasahasrANi hayAnAM ca zatAyutam  rathAnAm arbudaM pUrNaM nikharvaM ca padAtinAm 24  vRSNyandhakAz ca bahavo bhojAz ca paramaujasaH  anvyayur vRSNizArdUlaM vAsudevaM mahAdyutim 25  pAribarhaM dadau kRSNaH pANDavAnAM mahAtmanAm  striyo ratnAni vAsAMsi pRthakpRthag anekazaH  tato vivAho vidhivad vavRte matsyapArthayoH 26  tataH zaGkhAz ca bheryaz ca gomukhADambarAs tathA  pArthaiH saMyujyamAnasya nedur matsyasya vezmani 27  uccAvacAn mRgAJ jaghnur medhyAMz ca zatazaH pazUn  surA maireya pAnAni prabhUtAny abhyahArayan 28  gAyanAkhyAna zIlAz ca naTA vaitAlikAs tathA  stuvantas tAn upAtiSThan sUtAz ca saha mAgadhaiH 29  sudeSNAM ca puraskRtya matsyAnAM ca varastriyaH  Ajagmuz cArusarvAGgyaH sumRSTamaNikuNDalAH 30  varNopapannAs tA nAryo rUpavatyaH svalaM kRtAH  sarvAz cAbhyabhavat kRSNA rUpeNa yazasA zriyA 31  parivAryottarAM tAs tu rAjaputrIm alaM kRtAm  sutAm iva mahendrasya puraskRtyopatasthire 32  tAM pratyagRhNAt kaunteyaH sutasyArthe dhanaMjayaH  saubhadrasyAnavadyAGgIM virATa tanayAM tadA 33  tatrAtiSThan mahArAjo rUpam indrasya dhArayan  snuSAM tAM pratijagrAha kuntIputro yudhiSThiraH 34  pratigRhya ca tAM pArthaH puraskRtya janArdanam  vivAhaM kArayAm Asa saubhadrasya mahAtmanaH 35  tasmai sapta sahasrANi hayAnAM vAtaraMhasAm  dve ca nAgazate mukhye prAdAd bahudhanaM tadA 36  kRte vivAhe tu tadA dharmaputro yudhiSThiraH  brAhmaNebhyo dadau vittaM yad upAharad acyutaH 37  gosahasrANi ratnAni vastrANi vividhAni ca  bhUSaNAni ca mukhyAni yAnAni zayanAni ca 38  tan mahotsava saMkAzaM hRSTapuSTa janAvRtam  nagaraM matsyarAjasya zuzubhe bharatarSabha   |



 1   [j]  kathaM virATanagare mama pUrvapitAmahAH  ajJAtavAsam uSitA duryodhana bhayArditAH 2  tathA tu sa varAm*l labdhvA dharmAdharmabhRtAM varaH  gatvAzramaM brAhmaNebhya Acakhyau sarvam eva tat 3  kathayitvA tu tat sarvaM brAhmaNebhyo yudhiSThiraH  araNI sahitaM tasmai brAhmaNAya nyavedayat 4  tato yudhiSThiro rAjA dharmaputro mahAmanAH  saMnivartyAnujAn sarvAn iti hovAca bhArata 5  dvAdazemAni varSANi rASTrAd viproSitA vayam  trayodazo 'yaM saMprAptaH kRcchraH paramadurvasaH 6  sa sAdhu kaunteya ito vAsam arjuna rocaya  yatremA vasatIH sarvA vasemAviditAH paraiH 7  tasyaiva varadAnena dharmasya manujAdhipa  ajJAtA vicariSyAmo narANA bharatarSabha 8  kiM tu vAsAya rASTrANi kIrtayiSyAmi kAni cit  ramaNIyAni guptAni teSAM kiM cit sma rocaya 9  santi ramyA janapadA bahv annAH paritaH kurUn  pAJcAlAz cedimatsyAz ca zUrasenAH paTaccarAH  dazArNA nava rASTraM ca mallAH zAlva yugaMdharAH 10  eteSAM katamo rAjan nivAsas tava rocate  vatsyAmo yatra rAjendra saMvatsaram imaM vayam 11  evam etan mahAbAho yathA sa bhagavAn prabhuH  abravIt sarvabhUtezas tat tathA na tad anyathA 12  avazyaM tv eva vAsArthaM ramaNIyaM zivaM sukham  saMmantrya sahitaiH sarvair draSTavyam akutobhayam 13  matsyo virATo balavAn abhirakSet sa pANDavAn  dharmazIlo vadAnyaz ca vRddhaz ca sumahAdhanaH 14  virATanagare tAta saMvatsaram imaM vayam  kurvantas tasya karmANi vihariSyAma bhArata 15  yAni yAni ca karmANi tasya zakSyAmahe vayam  kartuM yo yat sa tat karma bravItu kurunandanAH 16  naradeva kathaM karma rASTre tasya kariSyasi  virATa nRpateH sAdho raMsyase kena karmaNA 17  mRdur vadAnyo hrImAMz ca dhArmikaH satyavikramaH  rAjaMs tvam ApadA kliSTaH kiM kariSyasi pANDava 18  na duHkham ucitaM kiM cid rAjan veda yathA janaH  sa imAm ApadaM prApya kathaM ghorAM tariSyasi 19  zRNudhvaM yat kariSyAmi karma vai kurunandanAH  virATam anusaMprApya rAjAnaM puruSarSabham 20  sabhAstAro bhaviSyAmi tasya rAjJo mahAtmanaH  kaGko nAma dvijo bhUtvA matAkSaH priya devitA 21  vaiDUryAn kAJcanAn dAntAn phalair jyotI rasaiH saha  kRSNAkSAm*l lohitAkSAMz ca nirvartsyAmi manoramAn 22  AsaM yudhiSThirasyAhaM purA prANasamaH sakhA  iti vakSyAmi rAjAnaM yadi mAm anuyokSyate 23  ity etad vo mayAkhyAtaM vihariSyAmy ahaM yathA  vRkodara virATe tvaM raMsyase kena karmaNA   |



 1   [bhm]  paurogavo bruvANo 'haM ballavo nAma nAmataH  upasthAsyAmi rAjAnaM virATam iti me matiH 2  sUpAnasya kariSyAmi kuzalo 'smi mahAnase  kRtapUrvANi yair asya vyaJjanAni suzikSitaiH  tAn apy abhibhaviSyAmi prItiM saMjanayann aham 3  AhariSyAmi dArUNAM nicayAn mahato 'pi ca  tat prekSya vipulaM karma rAjA prIto bhaviSyati 4  dvipA vA balino rAjan vRSabhA vA mahAbalAH  vinigrAhyA yadi mayA nigrahISyAmi tAn api 5  ye ca ke cin niyotsyanti samAjeSu niyodhakAH  tAn ahaM nihaniSyAmi prItiM tasya vivardhayan 6  na tv etAn yudhyamAnAM vai haniSyAmi kathaM cana  tathaitAn pAtayiSyAmi yathA yAsyanti na kSayam 7  ArAliko govikartA sUpakartA niyodhakaH  AsaM yudhiSThirasyAham iti vakSyAmi pRcchataH 8  AtmAnam AtmanA rakSaMz cariSyAmi vizAM pate  ity etat pratijAnAmi vihariSyAmy ahaM yathA 9  yam agnir brAhmaNo bhUtvA samAgacchan nRNAM varam  didhakSuH khANDavaM dAvaM dAzArha sahitaM purA 10  mahAbalaM mahAbAhum ajitaM kurunandanam  so 'yaM kiM karma kaunteyaH kariSyati dhanaMjayaH 11  yo 'yam AsAdya taM tAvaM tarpayAm Asa pAvakam  vijityaika rathenendraM hatvA pannagarakSasAn  zreSThaH pratiyudhAM nAma so 'rjunaH kiM kariSyati 12  sUryaH prapatatAM zreSTho dvipadAM brAhmaNo varaH  AzIviSaz ca sarpANAm agnis tejasvinAM varaH 13  AyudhAnAM varo varjaH kakudmI ca gavAM varaH  hradAnAm udadhiH zreSThaH parjanyo varSatAM varaH 14  dhRtarASTraz ca nAgAnAM hastiSv airAvato varaH  putraH priyANAm adhiko bhAryA ca suhRdAM varA 15  yathaitAni viziSTAni jAtyAM jAtyAM vRkodara  evaM yuvA guDAkezaH zreSThaH sarvadhanurmatAm 16  so 'yam indrAd anavaro vAsudevAc ca bhArata  gANDIvadhanvA zvetAzvo bIbhatsuH kiM kariSyati 17  uSitvA paJcavarSANi sahasrAkSasya vezmani  divyAny astrANy avAptAni devarUpeNa bhAsvatA 18  yaM manye dvAdazaM rudram AdityAnAM trayodazam  yasya bAhU samau dIrghau jyA ghAtakaThina tvacau  dakSiNe caiva savye ca gavAm iva vahaH kRtaH 19  himavAn iva zailAnAM samudraH saritAm iva  tridazAnAM yathA zakro vasUnAm iva havyavAH 20  mRgANAm iva zArdUlo garuDaH patatAm iva  varaH saMnahyamAnAnAm arjunaH kiM kariSyati 21  pratijJAM SaNDhako 'smIti kariSyAmi mahIpate  jyA ghAtau hi mahAntau me saMvartuM nRpa duSkarau 22  karNayoH pratimucyAhaM kuNDale jvalanopame  veNI kRtaziro rAjan nAmnA caiva bRhannaDA 23  paThann AkhyAyikAM nAma strIbhAvena punaH punaH  ramayiSye mahIpAlam anyAMz cAntaHpure janAn 24  gItaM nRttaM vicitraM ca vAditraM vividhaM tathA  zikSayiSyAmy ahaM rAjan virATa bhavane striyaH 25  prajAnAM samudAcAraM bahu karmakRtaM vadan  chAdayiSyAmi kaunteya mAyayAtmAnam AtmanA 26  yudhiSThirasya gehe 'smi draupadyAH paricArikA  uSitAsmIti vakSyAmi pRSTo rAjJA ca bhArata 27  etena vidhinA channaH kRtakena yathA nalaH  vihariSyAmi rAjendra virATa bhavane sukham   |



 1   [vai]  kiM tvaM nakula kurvANas tatra tAta cariSyasi  sukumAraz ca zUraz ca darzanIyaH sukhocitaH 2  azvabandho bhaviSyAmi virATa nRpater aham  granthiko nAma nAmnAhaM karmaitat supriyaM mama 3  kuzalo 'smy azvazikSAyAM tathaivAzvacikitsite  priyAz ca satataM me 'zvAH kururAja yathA tava 4  ye mAm AmantrayiSyanti virATanagare janAH  tebhya evaM pravakSyAmi vihariSyAmy ahaM yathA 5  sahadeva kathaM tasya samIpe vihariSyasi  kiM vA tvaM tAta kurvANaH pracchanno vicariSyasi 6  gosaMkhyAtA bhaviSyAmi virATasya mahIpateH  pratiSeddhA ca dogdhA ca saMkhyAne kuzalo gavAm 7  tantipAla iti khyAto nAmnA viditam astu te  nipuNaM ca cariSyAmi vyetu te mAnaso jvaraH 8  ahaM hi bhavatA goSu satataM prakRtaH purA  tatra me kauzalaM karma avabuddhaM vizAM pate 9  lakSaNaM caritaM cApi gavAM yac cApi maGgalam  tat sarvaM me suviditam anyac cApi mahIpate 10  vRSabhAn api jAnAmi rAjan pUjita lakSaNAn  yeSAM mUtram upAghrAya api vandhyA prasUyate 11  so 'ham evaM cariSyAmi prItir atra hi me sadA  na ca mAM vetsyati paras tat te rocatu pArthiva 12  iyaM tu naH priyA bhAryA prANebhyo 'pi garIyasI  mAteva paripAlyA ca pUjyA jyeSTheva ca svasA 13  kena sma karmaNA kRSNA draupadI vicariSyati  na hi kiM cid vijAnAti karma kartuM yathA striyaH 14  sukumArI ca bAlA ca rAjaputrI yazasvinI  pativratA mahAbhAgA kathaM nu vicariSyati 15  mAlyagandhAn alaMkArAn vastrANi vividhAni ca  etAny evAbhijAnAti yato jAtA hi bhAminI 16  sairandhryo 'rakSitA loke bhujiSyAH santi bhArata  naivam anyAH striyo yAnti iti lokasya nizcayaH 17  sAhaM bruvANA sairandhrI kuzalA kezakarmaNi  AtmaguptA cariSyAmi yan mAM tvam anupRcchasi 18  sudeSNAM pratyupasthAsye rAjabhAryAM yazasvinIm  sA rakSiSyati mAM prAptAM mA te bhUd duHkham IdRzam 19   [y]  kalyANaM bhASase kRSNe kule jAtA yathA vadet  na pApam abhijAnAsi sAdhu sAdhvI vrate sthitA   |

 

 1   [y]  karmANy uktAni yuSmAbhir yAni tAni kariSyatha  mama cApi yathAbuddhirucitAni vinizcayAt 2  purohito 'yam asmAkam agnihotrANi rakSatu  sUdapaurogavaiH sArdhaM drupadasya nivezane 3  indrasena mukhAz ceme rathAn AdAya kevalAn  yAntu dvAravatIM zIghram iti me vartate matiH 4  imAz ca nAryo draupadyAH sarvazaH paricArikAH  pAJcAlAn eva gacchantu sUdapaurogavaiH saha 5  sarvair api ca vaktavyaM na prajJAyanta pANDavAH  gatA hy asmAn apAkIrya sarve dvaitavanAd iti 6  vidite cApi vaktavyaM suhRdbhir anurAgataH  ato 'ham api vakSyAmi hetumAtraM nibodhata 7  hantemAM rAjavasatiM rAjaputrA bravImi vaH  yathA rAjakulaM prApya caran preSyo na riSyati 8  durvasaM tv eva kauravyA jAnatA rAjavezmani  amAnitaiH sumAnArhA ajJAtaiH parivatsaram 9  diSTa dvAro labhed dvAraM na ca rAjasu vizvaset  tad evAsanam anvicched yatra nAbhiSajet paraH 10  nAsya yAnaM na paryaGkaM na pIThaM na jagaM ratham  Arohet saMmato 'smIti sa rAjavasatiM vaset 11  atha yatrainam AsInaM zaGkeran duSTacAriNaH  na tatropavizej jAtu sa rAjavasatiM vaset 12  na cAnuziSyed rAjAnam apRcchantaM kadA cana  tUSNIM tv enam upAsIta kAle samabhipUjayan 13  asUyanti hi rAjAno janAn anRtavAdinaH  tathaiva cAvamanyante mantriNaM vAdinaM mRSA 14  naiSAM dAreSu kurvIta maitrIM prAjJaH kathaM cana  antaHpura carA ye ca dveSTi yAnahitAz ca ye 15  vidite cAsya kurvIta karyANi sulaghUny api  evaM vicarato rAjJo na kSatir jAyate kva cit 16  yatnAc copacared enam agnivad devavac ca ha  anRtenopacIrNo hi hiMsyAd enam asaMzayam 17  yac ca bhartAnuyuJjIta tad evAbhyanuvartayet  pramAdam avalehAM ca kopaM ca parivarjayet 18  samarthanAsu sarvAsu hitaM ca priyam eva ca  saMvarNayet tad evAsya priyAd api hitaM vadet 19  anukUlo bhavec cAsya sarvArtheSu kathAsu ca  apriyaM cAhitaM yat syAt tad asmai nAnuvarNayet 20  nAham asya priyo 'smIti matvA seveta paNDitaH  apramattaz ca yattaz ca hitaM kuryAt priyaM ca yat 21  nAsyAniSTAni seveta nAhitaiH saha saMvaset  svasthAnAn na vikampeta sa rAjavasatiM vaset 22  dakSiNaM vAtha vAmaM vA pArzvam AsIta paNDitaH  rakSiNAM hy AttazastrANAM sthAnaM pazcAd vidhIyate  nityaM vipratiSiddhaM tu purastAd AsanaM mahat 23  na ca saMdarzane kiM cit pravRddham api saMjapet  api hy etad daridrANAM vyalIka sthAnam uttamam 24  na mRSAbhihitaM rAjJo manuSyeSu prakAzayet  yaM cAsUyanti rAjAnaH puruSaM na vadec ca tam 25  zUro 'smIti na dRptaH syAd buddhimAn iti vA punaH  priyam evAcaran rAjJaH priyo bhavati bhogavAn 26  aizvaryaM prApya duSprApaM priyaM prApya ca rAjataH  apramatto bhaved rAjJaH priyeSu ca hiteSu ca 27  yasya kopo mahAbAdhaH prasAdaz ca mahAphalaH  kas tasya manasApIcched anarthaM prAjJasaMmataH 28  na cauSThau nirbhujej jAtu na ca vAkyaM samAkSipet  sadA kSutaM ca vAtaM ca SThIvanaM cAcarec chanaiH 29  hAsyavastuSu cApy asya vartamAneSu keSu cit  nAtigADhaM prahRSyeta na cApy unmattavad dhaset 30  na cAtidhairyeNa cared gurutAM hi vrajet tathA  smitaM tu mRdupUrveNa darzayeta prasAdajam 31  lAbhe na harSayed yas tu na vyathed yo 'vamAnitaH  asaMmUDhaz ca yo nityaM sa rAjavasatiM vaset 32  rAjAnaM rAjaputraM vA saMvartayati yaH sadA  amAtyaH paNDito bhUtvA sa ciraM tiSThati zriyam 33  pragRhItaz ca yo 'mAtyo nigRhItaz ca kAraNaiH  na nirbadhnAti rAjAnaM labhate pragrahaM punaH 34  pratyakSaM ca parokSaM ca guNavAdI vicakSaNaH  upajIvI bhaved rAjJo viSaye cApi yo vaset 35  amAtyo hi balAd bhoktuM rAjAnaM prArthayet tu yaH  na sa tiSThec ciraM sthAnaM gacchec ca prANasaMzayam 36  zreyaH sadAtmano dRSTvA paraM rAjJA na saMvadet  vizeSayen na rAjAnaM yogyA bhUmiSu sarvadA 37  amlAno balavAJ zUraz chAyevAnapagaH sadA  satyavAdI mRdur dAntaH sa rAjavasatiM vaset 38  anyasmin preSyamANe tu purastAd yaH samutpatet  ahaM kiM karavANIti sa rAjavasatiM vaset 39  uSNe vA yadi vA zIte rAtrau vA yadi vA divA  AdiSTo na vikalpeta sa rAjavasatiM vaset 40  yo vai gRhebhyaH pravasan priyANAM nAnusaMsmaret  duHkhena sukham anvicchet sa rAjavasatiM vaset 41  samaveSaM na kurvIta nAtyuccaiH saMnidhau haset  mantraM na bahudhA kuryAd evaM rAjJaH priyo bhavet 42  na karmaNi niyuktaH san dhanaM kiM cid upaspRzet  prApnoti hi haran dravyaM bandhanaM yadi vA vadham 43  yAnaM vastram alaMkAraM yac cAnyat saMprayacchati  tad eva dhArayen nityam evaM priyataro bhavet 44  saMvatsaram imaM tAta tathA zIlA bubhUSavaH  atha svaviSayaM prApya yathAkAmaM cariSyatha 45  anuziSTAH sma bhadraM te naitad vaktAsti kaz cana  kuntIm Rte mAtaraM no viduraM ca mahAmatim 46  yad evAnantaraM kAryaM tad bhavAn kartum arhati  tAraNAyAsya duHkhasya prasthAnAya jayAya ca 47   [vai]  evam uktas tato rAjJA dhaumyo 'tha dvijasattamaH  akarod vidhivat sarvaM prasthAne yad vidhIyate 48  teSAM samidhya tAn agnIn mantravac ca juhAva saH  samRddhi vRddhilAbhAya pRthivI vijayAya ca 49  agniM pradakSiNaM kRtvA brAhmaNAMz ca tapodhanAn  yAjJasenIM puraskRtya SaD evAtha pravavrajuH   |



1   [vai]  te vIrA baddhanistriMzAs tatAyudha kalApinaH  baddhagodhAGguli trANAH kAlindIm abhito yayuH 2  tatas te dakSiNaM tIram anvagacchan padAtayaH  vasanto giridurgeSu vanadurgeSu dhanvinaH 3  vidhyanto mRgajAtAni maheSvAsA mahAbalAH  uttareNa dazArNAMs te pAJcAlAn dakSiNena tu 4  antareNa yakRllomAJ zUrasenAMz ca pANDavAH  lubdhA bruvANA matsyasya viSayaM prAvizan vanAt 5  tato janapadaM prApya kRSNA rAjAnam abravIt  pazyaikapadyo dRzyante kSetrANi vividhAni ca 6  vyaktaM dUre virATasya rAjadhAnI bhaviSyati  vasAmeha parAM rAtriM balavAn me parizramaH 7  dhanaMjaya samudyamya pAJcAlIM vaha bhArata  rAjadhAnyAM nivatsyAmo vimuktAz ca vanAditaH 8  tAm AdAyArjunas tUrNaM draupadIM gajarAD iva  saMprApya nagarAbhyAzam avatArayad arjunaH 9  sa rAjadhAnIM saMprApya kaunteyo 'rjunam abravIt  kvAyudhAni samAsajya pravezyAmaH puraM vayam 10  sAyudhAz ca vayaM tAta pravekSyAmaH puraM yati  samudvegaM janasyAsya kariSyAmo na saMzayaH 11  tato dvAdaza varSANi praveSTavyaM vanaM punaH  ekasminn api vijJAte pratijJAtaM hi nas tathA 12  iyaM kUTe manuSyendra gahahA mahatI zamI  bhIma zAkhA durArohA zmazAnasya samIpataH 13  na cApi vidyate kaz cin manuSya iha pArthiva  utpathe hi vane jAtA mRgavyAlaniSevite 14  samAsajyAyudhAny asyAM gacchAmo nagaraM prati  evam atra yathAjoSaM vihariSyAma bhArata 15  evam uktvA sa rAjAnaM dharmAtmAnaM yudhiSThiram  pracakrame nidhAnAya zastrANAM bharatarSabha 16  yena devAn manuSyAMz ca sarpAMz caikaratho 'jayat  sphItAJjanapadAMz cAnyAn ajayat kurunandanaH 17  tad udAraM mahAghoSaM sapatnagaNasUdanam  apajyam akarot pArtho gANDIvam abhayaMkaram 18  yena vIraH kurukSetram abhyarakSat paraMtapaH  amuJcad dhanur as tasya jyAm akSayyAM yudhiSThiraH 19  pAJcAlAn yena saMgrAme bhImaseno 'jayat prabhuH  pratyaSedhad bahUn ekaH sapatnAMz caiva dig jaye 20  nizamya yasya visphAraM vyadravanta raNe pare  parvatasyeva dIrNasya visphoTam azaner iva 21  saindhavaM yena rAjAnaM parAmRSata cAnagha  jyA pAzaM dhanur as tasya bhImaseno 'vatArayat 22  ajayat pazcimAm AzAM dhanuSA yena pANDavaH  tasya maurvIm apAkarSac chUraH saMkrandano yudhi 23  dakSiNAM dakSiNAcAro dizaM yenAjayat prabhuH  apajyam akarod vIraH sahadevas tadAyudham 24  khaDgAMz ca pItAn dIrghAMz ca kalApAMz ca mahAdhanAn  vipAThAn kSura dhArAMz ca dhanur bhir nidadhuH saha 25  tAm upAruhya nakulo dhanUMSi nidadhat svayam  yAni tasyAvakAzAni dRDharUpANy amanyata 26  yatra cApazyata sa vai tiro varSANi varSati  tatra tAni dRDhaiH pAzaiH sugADhaM paryabandhata 27  zarIraM ca mRtasyaikaM samabadhnanta pANDavAH  vivarjayiSyanti narA dUrAd evaM zamIm imAm  AbaddhaM zavam atreti gandham AghrAya pUtikam 28  azItizata varSeyaM mAtA na iti vAdinaH  kuladharmo 'yam asmAkaM pUrvair Acarito 'pi ca  samAsajAnA vRkSe 'sminn iti vai vyAharanti te 29  A gopAlAvi pAlebhya AcakSANAH paraMtapAH  Ajagmur nagarAbhyAzaM pArthAH zatrunibarhaNAH 30  jayo jayanto vijayo jayatseno jayadbalaH  iti guhyAni nAmAni cakre teSAM yudhiSThiraH 31  tato yathApratijJAbhiH prAvizan nagaraM mahat  ajJAtacaryAM vatsyanto rASTraM varSaM trayodazam   |



 1   [vai]  tato virATaM prathamaM yudhiSThiro; rAjA sabhAyAm upaviSTum Avrajat  vaiDUrya rUpAn pratimucya kAJcanAn; akSAn sa kakSe parigRhya vAsasA 2  narAdhipo rASTrapatiM yazasvinaM; mahAyazAH kaurava vaMzavardhanaH  mahAnubhAvo nararAja satkRto; durAsadas tIkSNaviSo yathoragaH 3  bAlena rUpeNa nararSabho mahAn; athArci rUpeNa yathAmaras tathA  mahAbhrajAlair iva saMvRto ravir; yathAnalo bhasma vRtaz ca vIryavAn 4  tam ApatantaM prasamIkSya pANDavaM; virATa rAD indum ivAbhrasaMvRtam  mantridvijAn sUta mukhAn vizas tathA; ye cApi ke cit pariSat samAsate  papraccha ko 'yaM prathamaM sameyivAn; anena yo 'yaM prasamIkSate sabhAm 5  na tu dvijo 'yaM bhavitA narottamaH; patiH pRthivyA iti me manogatam  na cAsya dAso na ratho na kuNDale; samIpato bhrAjati cAyam indravat 6  zarIraliGgair upasUcito hy ayaM; mUrdhAbhiSikto 'yam itIva mAnasam  samIpam AyAti ca me gatavyatho; yathA gajas tAmarasIM madotkaTaH 7  vitarkayantaM tu nararSabhas tadA; yidhiSThiro 'bhyetya virATam abravIt  samrAD vijAnAtv iha jIvitArthinaM; vinaSTa sarvasvam upAgataM dvijam 8  ihAham icchAmi tavAnaghAntike; vastuM yathA kAmacaras tathA vibho  tam abravIt svAgatam ity anantaraM; rAjA prahRSTaH pratisaMgRhANa ca 9  kAmena tAtAbhivadAmy ahaM tvAM; kasyAsi rAjJo viSayAd ihAgataH  gotraM ca nAmApi ca zaMsa tattvataH; kiM cApi zilpaM tava vidyate kRtam 10  yudhiSThirasyAsam ahaM purA sakhA; vaiyAghrapadyaH punar asmi brAhmaNaH  akSAn pravaptuM kuzalo 'smi devitA; kaGketi nAmnAsmi virATa vizrutaH 11  dadAmi te hanta varaM yam icchasi; prazAdhi matsyAn vazago hy ahaM tava  priyA hi dhUrtA mama devinaH sadA; bhavAMz ca devopama rAjyam arhati 12  Apto vivAdaH paramo vizAM pate; na vidyate kiM cana matsyahInataH  na me jitaH kaz cana dhArayed dhanaM; varo mamaiSo 'stu tava prasAdataH 13  hanyAm avadhyaM yadi te 'priyaM caret; pravrAjayeyaM viSayAd dvijAMs tathA  zRNvantu me jAnapadAH samAgatAH; kaGko yathAhaM viSaye prabhus tathA 14  samAnayAno bhavitAsi me sakhA; prabhUtavastro bahu pAnabhojanaH  pazyes tvam antaz ca bahiz ca sarvadA; kRtaM ca te dvAram apAvRtaM mayA 15  ye tvAnuvAdeyur avRtti karzitA; brUyAz ca teSAM vacanena me sadA  dAsyAmi sarvaM tad ahaM na saMzayo; na te bhayaM vidyati saMnidhau mama 16  evaM sa labdhvA tu varaM samAgamaM; virATa rAjena nararSabhas tadA  uvAsa vIraH paramArcitaH sukhI; na cApi kaz cic caritaM bubodha tat   |

 

1   [vai]  athAparo bhImabalaH zriyA jvalann; upAyayau siMhavilAsa vikramaH  khajaM ca darvIM ca kareNa dhArayann; asiM ca kAlAGgam akozam avraNam 2  sa sUdarUpaH parameNa varcasA; ravir yathA lokam imaM prabhAsayan  sukRSNa vAsA girirAjasAravAn; sa matsyarAjaM samupetya tasthivAn 3  taM prekSya rAjA varayann upAgataM; tato 'bravIj jAnapadAn samAgatAn  siMhonnatAMso 'yam atIva rUpavAn; pradRzyate ko nu nararSabho yuvA 4  adRSTapUrvaH puruSo ravir yathA; vitarkayan nAsya labhAmi saMpadam  tathAsya cittaM hy api saMvitarkayan; nararSabhasyAdya na yAmi tattvataH 5  tato virATaM samupetya pANDavaH; sudInarUpo vacanaM mahAmanAH  uvAca sUdo 'smi narendra ballavo; bhajasva mAM vyaJjana kAram uttamam 6  na sUdatAM mAnada zraddadhAmi te; sahasranetra pratimo hi dRzyase  zriyA ca rUpeNa ca vikrameNa ca; prabhAsi tAtAnavaro nareSv iha 7  narendra sUdaH paricArako 'smi te; jAnAmi sUpAn prathamena kevalAn  AsvAditA ye nRpate purAbhavan; yudhiSThireNApi nRpeNa sarvazaH 8  balena tulyaz ca na vidyate mayA; niyuddha zIlaz ca sadaiva pArthiva  gajaiz ca siMhaiz ca sameyivAn ahaM; sadA kariSyAmi tavAnagha priyam 9  dadAmi te hanta varaM mahAnase; tathA ca kuryAH kuzalaM hi bhASase  na caiva manye tava karma tat samaM; samudranemiM pRthivIM tvam arhasi 10  yathA hi kAmas tava tat tathA kRtaM; mahAnase tvaM bhava me puraskRtaH  narAz ca ye tatra mamocitAH purA; bhavasva teSAm adhipo mayA kRtaH 11  tathA sa bhImo vihito mahAnase; virATa rAjJo dayito 'bhavad dRDham  uvAsa rAjan na ca taM pRthagjano; bubodha tatrAnucaraz ca kaz cana   |



 1   [vai]  tataH kezAn samutkSipya vellitAgrAn aninditAn  jugUha dakSiNe pArzve mRdUn asitalocanA 2  vAsaz ca paridhAyaikaM kRSNaM sumalinaM mahat  kRtvA veSaM ca sairandhryAH kRSNA vyacarad Artavat 3  tAM narAH paridhAvantIM striyaz ca samupAdravan  apRcchaMz caiva tAM dRSTvA kA tvaM kiM ca cikIrSasi 4  sA tAn uvAca rAjendra sairandhry aham upAgatA  karma cecchAmi vai kartuM tasya yo mAM pupukSati 5  tasyA rUpeNa veSeNa zlakSNayA ca tathA girA  nAzraddadhata tAM dAsIm annahetor upasthitAm 6  virATasya tu kaikeyI bhAryA paramasaMmatA  avalokayantI dadRze prAsAdAd drupadAtmajAm 7  sA samIkSya tathArUpAm anAthAm ekavAsasam  samAhUyAbravId bhadre kA tvaM kiM ca cikIrSasi 8  sA tAm uvAca rAjendra sairandhry aham upAgatA  karma cecchAmy ahaM kartuM tasya yo mAM pupukSati 9   [sudesNA]  naivaMrUpA bhavanty evaM yathA vadasi bhAmini  preSayanti ca vai dAsIr dAsAMz caivaM vidhAn bahUn 10  gUDhagulphA saMhatorus trigambhIrA SaDunnatA  raktA paJcasu rakteSu haMsagadgada bhASiNI 11  sukezI sustanI zyAmA pInazroNipayodharA  tena tenaiva saMpannA kAzmIrIva turaMgamA 12  svarAla pakSmanayanA bimbauSThI tanumadhyamA  kambugrIvA gUDhasirA pUrNacandranibhAnanA 13  kA tvaM brUhi yathA bhadre nAsi dAsI kathaM cana  yakSI vA yadi vA devI gandharvI yadi vApsarAH 14  alambusA mizrakezI puNDarIkAtha mAlinI  indrANI vAruNI vA tvaM tvaSTur dhAtuH prajApateH  devyo deveSu vikhyAtAs tAsAM tvaM katamA zubhe 15   [drau]  nAsmi devI na gandharvI nAsurI na ca rAkSasI  sairandhrI tu bhujiSyAsmi satyam etad bravImi te 16  kezAJ jAnAmy ahaM kartuM piMSe sAdhu vilepanam  grathayiSye vicitrAz ca srajaH paramazobhanAH 17  ArAdhayaM satyabhAmAM kRSNasya mahiSIM priyAm  kRSNAM ca bhAryAM pANDUnAM kurUNAm ekasundarIm 18  tatra tatra carAmy evaM labhamAnA suzobhanam  vAsAMsi yAvac ca labhe tAvat tAvad rame tathA 19  mAlinIty eva me nAma svayaM devI cakAra sA  sAham abhyAgatA devi sudeSNe tvan nivezanam 20   [sudesNA]  mUrdhni tvAM vAsayeyaM vai saMzayo me na vidyate  no ced iha tu rAjA tvAM gacchet sarveNa cetasA 21  striyo rAjakule pazya yAz cemA mama vezmani  prasaktAs tvAM nirIkSante pumAMsaM kaM na mohayeH 22  vRkSAMz cAvasthitAn pazya ya ime mama vezmani  te 'pi tvAM saMnamantIva pumAMsaM kaM na mohayeH 23  rAjA virATaH suzroNi dRSTvA vapur amAnuSam  vihAya mAM varArohe tvAM gacchet sarvacetasA 24  yaM hi tvam anavadyAGgi naram Ayatalocane  prasaktam abhivIkSethAH sa kAmavazago bhavet 25  yaz ca tvAM satataM pazyet puruSaz cAruhAsini  evaM sarvAnavadyAGgi sa cAnaGga vazo bhavet 26  yathA karkaTakI gharbham Adhatte mRtyum AtmanaH  tathAvidham ahaM manye vAsaM tava zucismite 27   [drau]  nAsmi labhyA virATena nacAnyena kathaM cana  gandharvAH patayo mahyaM yuvAnaH paJca bhAmini 28  putrA gandharvarAjasya mahAsattvasya kasya cit  rakSanti te ca mAM nityaM duHkhAcArA tathA nv aham 29  yo me na dadyAd ucchiSTaM na ca pAdau pradhAvayet  prIyeyus tena vAsena gandharvAH patayo mama 30  yo hi mAM puruSo gRdhyed yathAnyAH prAkRtastriyaH  tAm eva sa tato rAtriM pravized aparAM tanum 31  na cApy ahaM cAlayituM zakyA kena cid aGgane  dukha zIlA hi gandharvAs te ca me balavattarAH 32   [sudesNA]  evaM tvAM vAsayiSyAmi yathA tvaM nandinIcchasi  na ca pAdau na cocchiSTaM sprakSyasi tvaM kathaM cana 33   [vai]  evaM kRSNA virATasya bhAryayA parisAntvitA  na cainAM veda tatrAnyas tattvena janamejaya   |



 1   [vai]  sahadevo 'pi gopAnAM kRtvA veSam anuttamam  bhASAM caiSAM samAsthAya virATam upayAd atha 2  tam AyAntam abhiprekSya bhrAjamAnaM nararSabham  samupasthAya vai rAjA papraccha kurunandanam 3  kasya vA tvaM kuto vA tvaM kiM vA tAta cikIrSasi  na hi me dRSTapUrvas tvaM tattvaM brUhi nararSabha 4  sa prApya rAjAnam amitratApanas; tato 'bravIn meghamahaughaniHsvanaH  vaizyo 'smi nAmnAham ariSTanemir; gosaMkhya AsaM kurupuMgavAnAm 5  vastuM tvayIcchAmi vizAM variSTha; tAn rAjasiMhAn na hi vedmi pArthAn  na zakyate jIvitum anyakarmaNA; na ca tvadanyo mama rocate nRpaH 6   [virATa]  tvaM brAhmaNo yadi vA kSatriyo 'si; samudranemIzvara rUpavAn asi  AcakSva me tattvam amitrakarzana; na vaizyakarma tvayi vidyate samam 7  kasyAsi rAjJo viSayAd ihAgataH; kiM cApi zilpaM tava vidyate kRtam  kathaM tvam asmAsu nivatsyase sadA; vadasva kiM cApi taveha vetanam 8   [saha]  paJcAnAM pANDuputrANAM jyeSTho rAjA yudhiSThiraH  tasyASTa zatasAhasrA gavAM vargAH zataM zatAH 9  apare dazasAhasrA dvis tAvantas tathApare  teSAM gosaMkhya AsaM vai tantipAleti mAM viduH 10  bhUtaM bhavyaM bhaviSyac ca yac ca saMkhyA gataM kva cit  na me 'sty aviditaM kiM cit samantAd dazayojanam 11  guNAH suviditA hy Asan mama tasya mahAtmanaH  AsIc ca sa mayA tuSTaH kururAjo yudhiSThiraH 12  kSipraM hi gAvo bahulA bhavanti; na tAsu rogo bhavatIha kaz cit  tais tair upAyair viditaM mayaitad; etAni zilpAni mayi sthitAni 13  vRSabhAMz cApi jAnAmi rAjan pUjita lakSaNAn  yeSAM mUtram upAghrAya api vandhyA prasUyate 14   [virATa]  zataM sahasrANi samAhitAni; varNasya varNasya vinizcitA guNaiH  pazUn sapAlAn bhavate dadAmy ahaM; tvadAzrayA me pazavo bhavantv iha 15   [vai]  tathA sa rAjJo 'vidito vizAM pate; uvAsa tatraiva sukhaM narezvaraH  na cainam anye 'pi viduH kathaM cana; prAdAc ca tasmai bharaNaM yathepsitam   |



  1   [vai]  athAparo 'dRzyata rUpasaMpadA; strINAm alaMkAradharo bRhat pumAn  prAkAravapre pratimucya kuNDale; dIrghe ca kambU parihATake zubhe 2  bahUMz ca dIrghAMz ca vikIrya mUrdhajAn; mahAbhujo vAraNamattavikramaH  gatena bhUmim abhikampayaMs tadA; virATam AsAdya sabhA samIpataH 3  taM prekSya rAjopagataM sabhA tale; satra praticchannam aripramAthinam  virAjamAnaM parameNa varcasA; sutaM mahendrasya gajendravikramam 4  sarvAn apRcchac ca samIpacAriNaH; kuto 'yam AyAti na me purAzrutaH  na cainam Ucur viditaM tadA narAH; sa vismitaM vAkyam idaM nRpo 'bravIt 5  sarvopapannaH puruSo manoramaH; zyAmo yuvA vAraNayUthapopamAH  vimucya kambU parihATake; zubhe vimucya veNIm apinahya kuNDale 6  zikhI sukezaH paridhAya cAnyathA; bhavasva dhanvI kavacI zarI tathA  Aruhya yAnaM paridhAvatAM bhavAn; sutaiH samo me bhava vA mayA samaH 7  vRddho hy ahaM vai parihAra kAmaH; sarvAn matsyAMs tarasA pAlayasva  naivaMvidhAH klIba rUpA bhavanti; kathaM caneti pratibhAti me manaH 8   [arjuna]  gAyAmi nRtyAmy atha vAdayAmi; bhadro 'smi nRtte kuzalo 'smi gIte  tvam uttarAyAH paridatsva mAM svayaM; bhavAmi devyA naradeva nartakaH 9  idaM tu rUpaM mama yena kiM nu tat; prakIrtayitvA bhRzazokavardhanam  bRhannaDAM vai naradeva viddhi mAM; sutaM sutAM vA pitRmAtRvarjitAm 10   [virATa]  dadAmi te hanta varaM bRhannaDe; sutAM ca me nartaya yAz ca tAdRzIH  idaM tu te karma samaM na me mataM; samudranemiM pRthivIM tvam arhasi 11   [vai]  bRhannaDAM tAm abhivIkSya matsyarAT; kalAsu nRtte ca tathaiva vAdite  apuMstvam apy asya nizamya ca sthiraM; tataH kumArI puram utsasarja tam 12  sa zikSayAm Asa ca gItavAditaM; sutAM virATasya dhanaMjayaH prabhuH  sakhIz ca tasyAH paricArikAs tathA; priyaz ca tAsAM sa babhUva pANDavaH 13  tathA sa satreNa dhanaMjayo 'vasat; priyANi kurvan saha tAbhir AtmavAn  tathAgataM tatra na jajJire janA; bahizcarA vApy atha vAntare carAH   |
 


 1   [vai]  athAparo 'dRzyata pANDavaH prabhur; virATa rAjJas turagAn samIkSataH  tam ApatantaM dadRze pRthagjano; vimuktam abhrAd iva sUryamaNDalam 2  sa vai hayAn aikSata tAMs tatas tataH; samIkSamANaM ca dadarza matsyarAj  tato 'bravIt tAn anugAn amitrahA; kuto 'yam AyAti narAmara prabhaH 3  ayaM hayAn vIkSati mAmakAn dRDhaM; dhruvaM hayajJo bhavitA vicakSaNaH  pravezyatAm eSa samIpam Azu me; vibhAti vIro hi yathAmaras tathA 4  abhyetya rAjAnam amitrahAbravIj; jayo 'stu te pArthiva bhadram astu te  hayeSu yukto nRpa saMmataH sadA; tavAzvasUto nipuNo bhavAmy aham 5   [virATa]  dadAmi yAnAni dhanaM nivezanaM; mamAzvasUto bhavituM tvam arhasi  kuto 'si kasyAsi kathaM tvam AgataH; prabrUhi zilpaM tava vidyate ca yat 6   [nakula]  paJcAnAM pANDuputrANAM jyeSTho rAjA yudhiSThiraH  tenAham azveSu purA prakRtaH zatrukarzana 7  azvAnAM prakRtiM vedmi vinayaM cApi sarvazaH  duSTAnAM pratipattiM ca kRtsnaM caiva cikitsitam 8  na kAtaraM syAn mama jAtu vAhanaM; na me 'sti duSTA vaDavA kuto hayAH  janas tu mAm Aha sa cApi pANDavo; yudhiSThiro granthikam eva nAmataH 9   [virATa]  yad asti kiM cin mama vAjivAhanaM; tad astu sarvaM tvadadhInam adya vai  ye cApi ke cin mama vAjiyojakAs; tvadAzrayAH sArathayaz ca santu me 10  idaM taveSTaM yadi vai suropama; bravIhi yat te prasamIkSitaM vasu  na te 'nurUpaM hayakarma vidyate; prabhAsi rAjeva hi saMmato mama 11  yudhiSThirasyeva hi darzanena me; samaM tavedaM priya darza darzanam  kathaM tu bhRtyaiH sa vinAkRto vane; vasaty anindyo ramate ca pANDavaH 12   [vai]  tathA sa gandharvavaropamo yuvA; virATa rAjJA muditena pUjitaH  na cainam anye 'pi viduH kathaM cana; priyAbhirAmaM vicarantam antarA 13  evaM hi matsye nyavasanta pANDavA; yathApratijJAbhir amoghadarzanAH  ajJAtacaryAM vyacaran samAhitAH; samudranemipatayo 'tiduHkhitAH   |

 

1   [janam]  evaM matsyasya nagare vasantas tatra pANDavAH  ata UrdhvaM mahAvIryAH kim akurvanta vai dvija 2   [vai]  evaM te nyavasaMs tatra pracchannAH kurunandanAH  ArAdhayanto rAjAnaM yad akurvanta tac chRNu 3  yudhiSThiraH sabhAstAraH sabhyAnAm abhavat priyaH  tathaiva ca virATasya saputrasya vizAM pate 4  sa hy akSahRdayajJas tAn krIDayAm Asa pANDavaH  akSavatyAM yathAkAmaM sUtrabaddhAn iva dvijAn 5  ajJAtaM ca virATasya vijitya vasu dharmarAj  bhrAtRbhyaH puruSavyAghro yathArhaM sma prayacchati 6  bhImaseno 'pi mAMsAni bhakSyANi vividhAni ca  ati sRSTAni matsyena vikrINAti yudhiSThire 7  vAsAMsi parijIrNAni labdhAny antaHpure 'rjunaH  vikrINAnaz ca sarvebhyaH pANDavebhyaH prayacchati 8  sahadevo 'pi gopAnAM veSam AsthAya pANDavaH  dadhi kSIraM ghRtaM caiva pANDavebhyaH prayacchati 9  nakulo 'pi dhanaM labdhvA kRte karmaNi vAjinAm  tuSTe tasmin narapatau pANDavebhyaH prayacchati 10  kRSNApi sarvAn bhrAtRRMs tAn nirIkSantI tapasvinI  yathA punar avijJAtA tathA carati bhAminI 11  evaM saMpAdayantas te tathAnyonyaM mahArathAH  prekSamANAs tadA kRSNAm USuz channA narAdhipa 12  atha mAse caturthe tu brahmaNaH sumahotsavaH  AsIt samRddho matsyeSu puruSANAM susaMmataH 13  tatra mallAH samApetur digbhyo rAjan sahasrazaH  mahAkAyA mahAvIryAH kAlakhaJjA ivAsurAH 14  vIryonnaddhA balodagrA rAjJA samabhipUjitAH  sinha skandhakaTi grIvAH svavadAtA manasvinaH  asakRl labdhalakSAs te raGge pArthiva saMnidhau 15  teSAm eko mahAn AsIt sarvamallAn samAhvayat  AvalgamAnaM taM raGge nopatiSThati kaz cana 16  yadA sarve vimanasas te mallA hatacetasaH  atha sUdena taM mallaM yodhayAm Asa matsyarAj 17  codyamAnas tato bhImo duHkhenaivAkaron matim  na hi zaknoti vivRte pratyAkhyAtuM narAdhipam 18  tataH sa puruSavyAghraH zArdUlazithilaM caran  praviveza mahAraGgaM virATam abhiharSayan 19  babandha kakSyAM kaunteyas tatastaM harSayaJ janam  tatas taM vRtra saMkAzaM bhImo mallaM samAhvayat 20  tAv ubhau sumahotsAhAv ubhau tIvraparAkramau  mattAv iva mahAkAyau vAraNau SaSTihAyanau 21  cakarSa dorbhyAm utpATya bhImo mallam amitrahA  vinadantam abhikrozaJ zArdUla iva vAraNam 22  tam udyamya mahAbAhur bhrAmayAm Asa vIryavAn  tato mallAz ca matsyAz ca vismayaM cakrire param 23  bhrAmayitvA zataguNaM gatasattvam acetanam  pratyApiMSan mahAbAhur mallaM bhuvi vRkodaraH 24  tasmin vinihate malle jImUte lokavizrute  virATaH paramaM harSam agacchad bAndhavaiH saha 25  saMharSAt pradadau vittaM bahu rAjA mahAmanaH  ballavAya mahAraGge yathA vaizravaNas tathA 26  evaM sa subahUn mallAn puruSAMz ca mahAbalAn  vinighnan matsyarAjasya prItim Avahad uttamAm 27  yadAsya tulyaH puruSo na kaz cit tatra vidyate  tato vyAghraiz ca siMhaiz ca dviradaiz cApy ayodhayat 28  punar antaHpura gataH strINAM madhye vRkodaraH  yodhyate sma virATeNa siMhair mattair mahAbalaiH 29  bIbhatsur api gItena sunRttena ca pANDavaH  virATaM toSayAm Asa sarvAz cAntaHpura striyaH 30  azvair vinItair javanais tatra tatra samAgataiH  toSayAm Asa nakulo rAjAnaM rAjasattama 31  tasmai pradeyaM prAyacchat prIto rAjA dhanaM bahu  vinItAn vRSabhAn dRSTvA sahadevasya cAbhibho 32  evaM te nyavasaMs tatra pracchannAH puruSarSabhAH  karmANi tasya kurvANA virATa nRpates tadA   |

 

 1   [vai]  vasamAneSu pArtheSu matsyasya nagare tadA  mahAratheSu channeSu mAsA dazasamatyayuH 2  yAjJasenI sudeSNAM tu zuzrUSantI vizAM pate  avasat paricArArhA suduHkhaM janamejaya 3  tathA carantIM pAJcAlIM sudeSNAyA nivezane  senApatir virATasya dadarza jalajAnanAm 4  tAM dRSTvA devagarbhAbhAM carantIM devatAm iva  kIcakaH kAmayAm Asa kAmabANaprapIDitaH 5  sa tu kAmAgnisaMtaptaH sudeSNAm abhigamya vai  prahasann iva senA nIr idaM vacanam abravIt 6  neyaM purA jAtu mayeha dRSTA; rAjJo virATasya nivezane zubhA  rUpeNa conmAdayatIva mAM bhRzaM; gandhena jAtA madireva bhAminI 7  kA devarUpA hRdayaMgamA zubhe; AcakSva me kA ca kutaz ca zobhanA  cittaM hi nirmathya karoti mAM vaze; na cAnyad atrauSadham adya me matam 8  aho taveyaM paricArikA zubhA; pratyagra rUpA pratibhAti mAm iyam  ayuktarUpaM hi karoti karma te; prazAstu mAM yac ca mamAsti kiM cana 9  prabhUtanAgAzvarathaM mahAdhanaM; samRddhi yuktaM bahu pAnabhojanam  manoharaM kAJcanacitrabhUSaNaM; gRhaM mahac chobhayatAm iyaM mama 10  tataH sudeSNAm anumantrya kIcakas; tataH samabhetya narAdhipAtma jAm  uvAca kRSNAm abhisAntvayaMs tadA; mRgendra kanyAm iva jambuko vane 11  idaM ca rUpaM prathamaM ca te vayo; nirarthakaM kevalam adya bhAmini  adhAryamANA srag ivottamA yathA; na zobhase sundari zobhanA satI 12  tyajAmi dArAn mama ye purAtanA; bhavantu dAsyas tava cAruhAsini  ahaM ca te sundari dAsavat sthitaH; sadA bhaviSye vazagovarAnane 13   [drau]  aprArthanIyAm iha mAM sUtaputrAbhimanyase  vihInavarNAM sairandhrIM bIbhatsAM kezakArikAm 14  paradArAsmi bhadraM te na yuktaM tvayi sAMpratam  dayitAH prANinAM dArA dharmaM samanucintaya 15  parapAre na te buddhir jAtu kAryA kathaM cana  vivarjanaM hy akAryANAm etat satpuruSavratam 16  mithyAbhigRdhno hi naraH pApAtmA moham AsthitaH  ayazaH prApnuyAd ghoraM sumahat prApnuyAd bhayam 17  mA sUtaputra hRSyasva mAdya tyakSyasi jIvitam  durlabhAm abhimanvAno mAM vIrair abhirakSitAm 18  na cApy ahaM tvayA zakyA gandharvAH patayo mama  te tvAM nihanyuH kupitAH sAdhvalaM mA vyanInazaH 19  azakyarUpaiH puruSair adhvAnaM gantum icchasi  yathA nizcetano bAlaH kUlasthaH kUlam uttaram  tartum icchati mandAtmA tathA tvaM kartum icchasi 20  antar mahIM vA yadi vordhvam utpateH; samudrapAraM yadi vA pradhAvasi  tathApi teSAM na vimokSam arhasi; pramAthino deva sutA hi me varAH 21  tvaM kAlarAtrIm iva kaz cid AturaH; kiM mAM dRDhaM rArthayase 'dya kIcaka  kiM mAtur aGke zayito yathA zizuz; candraM jighRkSur iva manyase hi mAm   |


 1   [vai]  pratyAkhyAto rAjaputryA sudeSNAM kIcako 'bravIt  amaryAdena kAmena ghoreNAbhipariplutaH 2  yathA kaikeyi sairandhryA sameyAM tad vidhIyatAm  tAM sudeSNe parIpsasva mAhaM prANAn prahAsizam 3  tasya tAM bahuzaH zrutvA vAcaM vilapatas tadA  virATa mahiSI devI kRpAM cakre manasvinI 4  svam artham abhisaMdhAya tasyArtham anucintya ca  udvegaM caiva kRSNAyAH sudeSNA sUtam abravIt 5  parviNIM tvaM samuddiSya surAm annaM ca kAraya  tatrainAM preSayiSyAmi surA hArIM tavAntikam 6  tatra saMpreSitAm enAM vijane niravagrahAm  sAntvayethA yathAkAmaM sAntvyamAnA ramed yadi 7  kIcakas tu gRhaM gatvA bhaginyA vacanAt tadA  surAm AhArayAm Asa rAjArhAM suparisrutAm 8  AjaurabhraM ca subhRzaM bahUMz coccAvacAn mRgAn  kArayAm Asa kuzalair annapAnaM suzobhanam 9  tasmin kRte tadA devI kIcakenopamantritA  sudeSNA preSayAm Asa sairandhrIM kIcakAlayam 10   [sudesNA]  uttiSTha gaccha sairandhir kIcakasya nivezanam  pAnam Anaya kalyANi pipAsA mAM prabAdhate 11   [drau]  na gaccheyam ahaM tasya rAjaputri nivezanam  tvam eva rAjJi jAnAsi yathA sa nirapatrapaH 12  na cAham anavadyAGgi tava vezmani bhAmini  kAmavRttA bhaviSyAmi patInAM vyabhicAriNI 13  tvaM caiva devi jAnAsi yathA sa samayaH kRtaH  pravizantyA mayA pUrvaM tava vezmani bhAmini 14  kIcakaz ca sukezAnte mUDho madanadarpitaH  so 'vamaMsyati mAM dRSTvA na yAsye tatra zobhane 15  santi bahvyas tava preSyA rAjaputri vazAnugAH  anyAM preSaya bhadraM te sa hi mAm avamaMsyate 16   [sudesNA]  naiva tvAM jAtu hiMsyAt sa itaH saMpreSitAM mayA 17   [vai]  ity asyAH pradadau kAMsyaM sa pidhAnaM hiraNmayam  sA zaGkamAnA rudatI daivaM zaraNam IyuSI  prAtiSThata surA hArI kIcakasya nivezanam 18   [drau]  yathAham anyaM pANDubhyo nAbhijAnAmi kaM cana  tena satyena mAM prAptAM kIcako mA vaze kRthAH 19   [vai]  upAtiSThata sA sUryaM muhUrtam abalA tataH  sa tasyAs tanumadhyAyAH sarvaM sUryo 'vabuddhavAn 20  antarhitaM tatas tasyA rakSo rakSArtham Adizat  tac cainAM nAjahAt tatra sarvAvasthAsv aninditAm 21  tAM mRgIm iva vitrastAM dRSTvA kRSNAM samIpagAm  udatiSThan mudA sUto nAvaM labdhveva pAragaH   |

 

 1   [kIcaka]  svAgataM te sukezAnte suvyuSTA rajanI mama  svAminI tvam anuprAptA prakuruSva mama priyam 2  suvarNamAlAH kambUz ca kuNDale parihATake  Aharantu ca vastrANi kauzikAny ajinAni ca 3  asti me zayanaM zubhraM tvadartham upakalpitam  ehi tatra mayA sArdhaM pibasva madhumAdhavIm 4   [drau]  apraiSId rAjaputrI mAM surA hArIM tavAntikam  pAnam Anaya me kSipraM pipAsA meti cAbravIt 5   [kIcaka]  anyA bhadre nayiSyanti rAjaputryAH parisrutam 6   [vai]  ity enAM dakSiNe pANau sUtaputraH parAmRzat  sA gRhItA vidhunvAnA bhUmAv AkSipya kIcakam  sabhAM zaraNam AdhAvad yatra rAjA yudhiSThiraH 7  tAM kIcakaH pradhAvantIM kezapakSe parAmRzat  athainAM pazyato rAjJaH pAtayitvA padAvadhIt 8  tato yo 'sau tadArkeNa rAkSasaH saMniyojitaH  sa kIcakam apovAha vAtavegena bhArata 9  sa papAta tato bhUmau rakSobalasamAhataH  vighUrNamAno nizceSTaz chinnamUla iva drumaH 10  tAM cAsInau dadRzatur bhImasena yudhiSThirau  amRSyamANau kRSNAyAH kIcakena padA vadham 11  tasya bhImo vadhaprepsuH kIcakasya durAtmanaH  dantair dantAMs tadA roSAn nispipeSa mahAmanaH 12  athAGguSThenAvamRdnAd aGguSThaM tasya dharmarAj  prabodhanabhayAd rAjan bhImasya pratyaSedhayat 13  sA sahA dvAram AsAdya rudatI matsyam abravIt  avekSamANA suzroNI patIMs tAn dInacetasaH 14  AkAram abhirakSantI pratijJAM dharmasaMhitAm  dahyamAneva raudreNa cakSur A drupadAtmajA 15   [drau]  yeSAM vairI na svapiti padA bhUmim upaspRzan  teSAM mAM mAninIM bhAryAM sUtaputraH padAvadhIt 16  ye dadyur na ca yAceyur brahmaNyAH satyavAdinaH  teSAM mAM mAninIM bhAryAM sUtaputraH padAvadhIt 17  yeSAM dundubhinirghoSo jyAghoSaH zrUyate 'nizam  teSAM mAM mAninIM bhAryAM sUtaputraH padAvadhIt 18  ye te tejasvino dAntA balavanto 'bhimAninaH  teSAM mAM mAninIM bhAryAM sUtaputraH padAvadhIt 19  sarvalokam imaM hanyur dharmapAzasitAs tu ye  teSAM mAM mAninIM bhAryAM sUtaputraH padAvadhIt 20  zaraNaM ye prapannAnAM bhavanti zaraNArthinAm  caranti loke pracchannAH kva nu te 'dya mahArathAH 21  kathaM te sUtaputreNa vadhyamAnAM priyAM satIm  marSayanti yathA klIbA balavanto 'mitaujasaH 22  kva nu teSAm amarSaz ca vIryaM tejaz ca vartate  na parIpsanti ye bhAryAM vadhyamAnAM durAtmanA 23  mayAtra zakyaM kiM kartuM virATe dharmadUSaNam  yaH pazyan mAM marSayati vadhyamAnam anAgasam 24  na rAjan rAjavat kiM cit samAcarasi kIcake  dasyUnAm iva dharmas te na hi saMsadi zobhate 25  na kIcakaH svadharmastho na ca matsyaH kathaM cana  sabhA sado 'py adharmajJA ya imaM paryupAsate 26  nopAlabhe tvAM nRpatau virATa janasaMsadi  nAham etena yuktA vai hantuM matsyatavAntike  sabhA sadas tu pazyantu kIcakasya vyatikramam 27   [virATa]  parokSaM nAbhijAnAmi vigrahaM yuvayor aham  arthatattvam avijJAya kiM nu syAt kuzalaM mama 28   [vai]  tatas tu sabhyA vijJAya kRSNAM bhUyo 'bhyapUjayan  sAdhu sAdhv iti cApy AhuH kIcakaM ca vyagarhayan 29   [sabhyA]  yasyeyaM cArusarvAGgI bhAryA syAd AyatekSaNA  paro lAbhaz ca tasya syAn na sa zocet kadA cana 30   [vai]  evaM saMpUjayaMs tatra kRSNAM prekSya sabhA sadaH  yudhiSThirasya kopAt tu lalATe sveda Asajat 31  athAbravId rAjaputrIM kauravyo mahiSIM priyAm  gaccha sairandhri mAtrasthAH sudeSNAyA nivezanam 32  bhartAram anurudhyantyaH klizyante vIra patnayaH  zuzrUSayA klizyamAnAH patilokaM jayanty uta 33  manye na kAlaM krodhasya pazyanti patayas tava  tena tvAM nAbhidhAvanti gandharvAH sUryavarcasaH 34  akAlajJAsi sairandhri zailUSIva vidhAvasi  vighnaM karoSi matsyAnAM dIvyatAM rAjasaMsadi  gaccha sairandhri gandharvAH kariSyanti tava priyam 35   [drau]  atIva teSAM ghRNinAm arthe 'haM dharmacAriNI  tasya tasyeha te vadhyA yeSAM jyeSTho 'kSadevitA 36   [vai]  ity uktvA prAdravat kRSNA sudeSNAyA nivezanam  kezAn muktvA tu suzroNI saMrambhAl lohitekSaNA 37  zuzubhe vadanaM tasyA rudantyA virataM tadA  meghalokhA vinirmuktaM divIva zazimaNDalam 38   [sudesNA]  kas tvAvadhId varArohe kasmAd rodiSi zobhane  kasmAd ya na sukhaM bhadre kena te vipriyaM kRtam 39   [drau]  kIcako mAvadhIt tatra surA hArIM gatAM tava  sabhAyAM pazyato rAjJo yathaiva vijane tathA 40   [sudesNA]  ghAtayAmi sukezAnte kIcakaM yadi manyase  yo sau tvAM kAmasaMmatto durlabhAm abhimanyate 41   [drau]  anye vai taM vadhiSyanti yeSAm AgaH karoti saH  manye cAdyaiva suvyaktaM paralokaM gamiSyati   |

 

 1   [vai]  sA hatA sUtaputreNa rAjaputrI samajvalat  vadhaM kRSNA parIpsantI senA vAhasya bhAminI  jagAmAvAsam evAtha tadA sA drupadAtma jA 2  kRtvA zaucaM yathAnyAyaM kRSNA vai tanumadhyamA  gatrANi vAsasI caiva prakSAlya salilena sA 3  cintayAm Asa rudatI tasya duHkhasya nirNayam  kiM karomi kva gacchAmi kathaM kAryaM bhaven mama 4  ity evaM cintayitvA sA bhImaM vai manasAgamat  nAnyaH kartA Rte bhImAn mamAdya manasaH priyam 5  tata utthAya rAtrau sA vihAya zayanaM svakam  prAdravan nAtham icchantI kRSNA nAthavatI satI  duHkhena mahatA yuktA mAnasena manasvinI 6  sA vai mahAnase prApya bhImasenaM zucismitA  sarvazveteva mAheyI vane jAtA trihAyanI  upAtiSThata pAJcAlI vAziteva mahAgajam 7  sA lateva mahAzAlaM phullaM gomati tIrajam  bAhubhyAM parirabhyainaM prAbodhayad aninditA  siMhaM suptaM vane durge mRgarAjavadhUr iva 8  vINeva madhurAbhASA gAndhAraM sAdhu mUrcchitA  abhyabhASata pAJcAlI bhImasenam aninditA 9  uttiSThottiSTha kiM zeSe bhImasena yathA mRtaH  nAmRtasya hi pApIyAn bhAryAm Alabhya jIvati 10  tasmiJ jIvati pApiSThe senA vAhe mama dviSi  tat karmakRtavaty adya kathaM nidrAM niSevase 11  sa saMprahAya zayanaM rAjaputryA prabodhitaH  upAtiSThata meghAbhaH paryaGke sopasaMgrahe 12  athAbravId rAjaputrIM kauravyo mahiSIM priyAm  kenAsy arthena saMprAptA tvariteva mamAntikam 13  na te prakRtimAn varNaH kRzA pANDuz ca lakSyase  AcakSva parizeSeNa sarvaM vidyAm ahaM yathA 14  sukhaM vA yadi vA duHkhaM dveSyaM vA yadi vA priyam  yathAvat sarvam AcakSva zrutvA jJAsyAmi yat param 15  aham eva hi te kRSNe vizvAsyaH sarvakarmasu  aham Apatsu cApi tvAM mokSayAmi punaH punaH 16  zIghram uktvA yathAkAmaM yat te kAryaM vivakSitam  gaccha vai zayanAyaiva purA nAnyo 'vabudhyate   |



 1   [drau]  azocyaM nu kutas tasyA yasyA bhartA yudhiSThiraH  jAnaM sarvANi duHkhAni kiM mAM tvaM paripRcchasi 2  yan mAM dAsI pravAdena prAtikAmI tadAnayat  sabhAyAM pArSado madhye tan mAM dahati bhArata 3  pArthivasya sutA nAma kA nu jIveta mAdRzI  anubhUya bhRzaM duHkham anyatra draupadIM prabho 4  vanavAsa gatAyAz ca saindhavena durAtmanA  parAmarzaM dvitIyaM ca soDhum utsahate nu kA 5  matsyarAjJaH samakSaM ca tasya dhUrtasya pazyataH  kIcakena padA spRSTA kA nu jIveta mAdRzI 6  evaM bahuvidhaiH klezaiH klizyamAnAM ca bhArata  na mAM jAnAsi kaunteya kiM phalaM jIvitena me 7  yo 'yaM rAjJo virATasya kIcako nAma bhArata  senA nIH puruSavyAghra syAlaH paramadurmatiH 8  sa mAM sairandhi veSeNa vasantIM rAjavezmani  nityam evAha duSTAtmA bhAryA mama bhaveti vai 9  tenopamantryamANAyA vadhArheNa sapatnahan  kAleneva phalaM pakvaM hRdayaM me vidIryate 10  bhrAtaraM ca vigarhasva jyeSThaM durdyUta devinam  yasyAsmi karmaNA prAptA dukham etad anantakam 11  ko hi rAjyaM parityajya sarvasvaM cAtmanA saha  pravrajyAyaiva dIvyeta vinA durdyUta devinam 12  yadi niSkasahasreNa yac cAnyat sAravad dhanam  sAyamprAtar adeviSyad api saMvatsarAn bahUn 13  rukmaM hiraNyaM vAsAMsi yAnaM yugyam ajAvikam  azvAzvatara saMghAMz ca na jAtu kSayam Avahet 14  so 'yaM dyUtapravAdena zriyA pratyavaropitaH  tUSNIm Aste yathA mUDhaH svAni karmANi cintayan 15  dazanAgasahasrANi padminAM hemamAlinAm  yaM yAntam anuyAntIha so 'yaM dyUtena jIvati 16  tathA zatasahasrANi nRNAm amitatejasAm  upAsate mahArAjam indraprasthe yudhiSThiram 17  zataM dAsI sahasrANi yasya nityaM mahAnase  pAtrI hastaM divArAtram atithIn bhojayanty uta 18  eSa niSkasahasrANi pradAya dadatAM varaH  dyUtajena hy anarthena mahatA samupAvRtaH 19  enaM hi svarasaMpannA bahavaH sUtamAgadhAH  sAyaMprAtar upAtiSThan sumRSTamaNikuNDalAH 20  sahasram RSayo yasya nityam Asan sabhA sadaH  tapaH zrutopasaMpannAH sarvakAmair upasthitAH 21  andhAn vRddhAMs tathAnAthAn sarvAn rASTreSu durgatAn  bibharty avimanA nityam AnRzaMsyAd yudhiSThiraH 22  sa eSa nirayaM prApto matsyasya paricArakaH  sabhAyAM devitA rAjJaH kaGko brUte yudhiSThiraH 23  indraprasthe nivasataH samaye yasya pArthivAH  Asan balibhRtaH sarve so 'dyAnyair bhRtim icchati 24  pArthivAH pRthivIpAlA yasyAsan vazavartinaH  sa vaze vivazo rAjA pareSAm adya vartate 25  pratApya pRthivIM sarvAM razmivAn iva tejasA  so 'yaM rAjJo virATasya sabhA stAro yudhiSThiraH 26  yam upAsanta rAjAnaH sabhAyAm RSibhiH saha  tam upAsInam adyAnyaM pazya pANDava pANDavam 27  atadarhaM mahAprAjJaM jIvitArthe 'bhisaMzritam  dRSTvA kasya na duHkhaM syAd dharmAtmAnaM yudhiSThiram 28  upAste sma sabhAyAM yaM kRtSNA vIra vasuMdharA  tam upAsInam adyAnyaM pazya bhArata bhAratam 29  evaM bahuvidhair duHkhaiH pIDyamAnAm anAthavat  zokasAragamadhyasthAM kiM mAM bhIma na pazyasi   |



  1   [drau]  idaM tu me mahad duHkhaM yat pravakSyAmi bhArata  na me 'bhyasUyA kartavyA duHkhAd etad bravImy aham 2  zArdUlair mahiSaiH siMhair AgAre yudhyase yadA  kaikeyyAH prekSamANAyAs tadA me kazmalo bhavet 3  prekSA samutthitA cApi kaikeyI tAH striyo vadet  prekSya mAm anavadyAGgI kazmalopahatAm iva 4  snehAt saMvAsajAn manye sUdam eSA zucismitA  yodhyamAnaM mahAvIryair imaM samanuzocati 5  kalyANa rUpA sairandhrI ballavaz cAti sundaraH  strINAM ca cittaM durjJeyaM yuktarUpau ca me matau 6  sairandhrI priya saMvAsAn nityaM karuNavedinI  asmin rAjakule cemau tulyakAlanivAsinau 7  iti bruvANA vAkyAni sA mAM nityam avedayat  krudhyantIM mAM ca saMprekSya samazaGkata mAM tvayi 8  tasyAM tathA bruvatyAM tu duHkhaM mAM mahad Avizat  zoke yaudhiSThire magnA nAhaM jIvitum utsahe 9  yaH sa devAn manuSyAMz ca sarpAM caikaratho 'jayat  so 'yaM rAjJo virATasya kanyAnAM nartako yuvA 10  yo 'tarpayad ameyAtmA khANDave jAtavedasam  so 'ntaHpura gataH pArthaH kUpe 'gnir iva saMvRtaH 11  yasmAd bhayam amitrANAM sadaiva puruSarSabhAt  sa lokaparibhUtena veSeNAste dhanaMjayaH 12  yasya jyAtalanirghoSAt samakampanta zatravaH  striyo gItasvanaM tasya muditAH paryupAsate 13  kirITaM sUryasaMkAzaM yasya mUrdhani zobhate  veNI vikRtakezAntaH so 'yam adya dhanaMjayaH 14  yasminn astrANi divyAni samastAni mahAtmani  AdhAraH sarvavidyAnAM sa dhArayati kuNDale 15  yaM sma rAjasahasrANi tejasApratimAni vai  samare nAtivartante velAm iva mahArNavaH 16  so 'yaM rAjJo virATasya kanyAnAM nartako yuvA  Aste veSapraticchannaH kanyAnAM paricArakaH 17  yasya sma rathaghoSeNa samakampata medinI  sa parvata vanA bhIma sahasthAvarajaGgamA 18  yasmiJ jAte mahAbhAge kuntyAH zoko vyanazyata  sa zocayati mAm adya bhImasena tavAnujaH 19  bhUSitaM tam alaMkAraiH kuNDalaiH parihATakaiH  kambupANinam AyAntaM dRSTvA sIdati me manaH 20  taM veNI kRtakezAntaM bhImadhanvAnam arjunam  kanyA parivRtaM dRSTvA bhIma sIdati me manaH 21  yadA hy enaM parivRtaM kanyAbhir devarUpiNam  prabhinnam iva mAtaGgaM parikIrNaM kareNubhiH 22  matsyam arthapatiM pArthaM virATaM samupasthitam  pazyAmi tUryamadhya sthaM diza nazyanti me tadA 23  nUnam AryA na jAnAti kRcchraM prAptaM dhanaMjayam  ajAtazatruM kauravyaM magnaM dUdyUta devinam 24  tathA dRSTvA yavIyAMsaM sahadevaM yudhAM patim  goSu goveSam AyAntaM pANDubhUtAsmi bhArata 25  sahadevasya vRttAni cintayantI punaH punaH  na vindAmi mahAbAho sahadevasya duSkRtam  yasminn evaMvidhaM duHkhaM prApnuyAt satyavikramaH 26  dUyAmi bharatazreSTha dRSTvA te bhrAtaraM priyam  goSu govRSasaMkAzaM matsyenAbhinivezitam 27  saMrabdhaM raktanepathyaM gopAlAnAM purogamam  virATam abhinandantam atha me bhavati jvaraH 28  sahadevaM hi me vIraM nityam AryA prazaMsati  mahAbhijana saMpanno vRttavAJ zIlavAn iti 29  hrIniSedho madhuravAg dhArmikaz ca priyaz ca me  sa te 'raNyeSu boddhavyo yAjJaseni kSapAsv api 30  taM dRSTvA vyApRtaM goSu vatsa carma kSapAzayam  sahadevaM yudhAM zreSThaM kiM nu jIvAmi pANDava 31  yas tribhir nityasaMpanno rUpeNAstreNa medhayA  so 'zvabandho virATasya pazya kAlasya paryayam 32  abhyakIryanta vRndAni dAma granthim udIkSatAm  vinayantaM janenAzvAn mahArAjasya pazyataH 33  apazyam enaM zrImantaM matsyaM bhrAjiSNum uttamam  virATam upatiSThantaM darzayantaM ca vAjinaH 34  kiM nu mAM manyase pArtha sukhiteti paraMtapa  evaM duHkhazatAviSTA yudhiSThira nimittataH 35  ataH prativiziSTAni duHkhAny anyAni bhArata  vartante mayi kaunteya vakSyAmi zRNu tAny api 36  yuSmAsu dhriyamANeSu duHkhAni vividhAny uta  zoSayanti zarIraM me kiM nu kuHkham ataH param   |



  1   [drau]  ahaM sairandhi veSeNa carantI rAjavezmani  zaucadAsmi sudeSNAyA akSadhUrtasya kAraNAt 2  vikriyAM pazya me tIvrAM rAjaputryAH paraMtapa  Ase kAlam upAsInA sarvaM duHkhaM kilArtavat 3  anityA kila martyAnAm arthasiddhir jayAjayau  iti kRtvA pratIkSAmi bhartRRNAm udayaM punaH 4  ya eva hetur bhavati puruSasya jayAvahaH  parAjaye ca hetuH sa iti ca pratipAlaye 5  dattvA yAcanti puruSA hatvA vadhyanti cApare  pAtayitvA ca pAtyante parair iti ca me zrutam 6  na daivasyAti bhAro 'sti na daivasyAti vartanam  iti cApy AgamaM bhUyo daivasya pratipAlaye 7  sthitaM pUrvaM jalaM yatra punas tatraiva tiSThati  iti paryAyam icchantI pratIkSAmy udayaM punaH 8  daivena kila yasyArthaH sunIto 'pi vipadyate  daivasya cAgame yatnas tena kAryo vijAnatA 9  yat tu me vacanasyAsya kathitasya prayojanam  pRccha mAM duHkhitAM tat tvam apRSTA vA bravImi te 10  mahiSI pANDuputrANAM duhitA drupadasya ca  imAm avasthAM saMprAptA kA mad anyA jijIviSet 11  kurUn paribhavan sarvAn pAJcAlAn api bhArata  pANDaveyAMz ca saMprApto mama klezo hy ariMdama 12  bhrAtRbhiH zvazuraiH putrair bahubhiH paravIra han  evaM samuditA nArI kA nv anyA duHkhitA bhavet 13  nUnaM hi bAlayA dhAtur mayA vai vipriyaM kRtam  yasya prasAdAd durnItaM prAptAsmi bharatarSabha 14  varNAvakAzam api me pazya pANDava yAdRzam  yAdRzo me na tatrAsId duHkhe paramake tadA 15  tvam eva bhIma jAnISe yan me pArtha sukhaM purA  sAhaM dAsatvam ApannA na zAntim avazA labhe 16  nAdaivikam idaM manye yatra pArtho dhanaMjayaH  bhIma dhanvA mahAbAhur Aste zAnta ivAnalaH 17  azakyA vedituM pArtha prANinAM vai gatir naraiH  vinipAtam imaM manye yuSmAkam avicintitam 18  yasyA mama mukhaprekSA yUyam indrasamAH sadA  sA prekSe mukham anyAsAm avarANAM varA satI 19  pazya pANDava me 'vasthAM yathA nArhAmi vai tathA  yuSmAsu dhriyamANeSu pazya kAlasya paryayam 20  yasyAH sAgaraparyantA pRthivI vazavartinI  AsIt sAdya sudeSNAyA bhItAhaM vazavartinI 21  yasyAH puraHsarA Asan pRSThataz cAnugAminaH  sAham adya sudeSNAyAH puraH pazcAc ca gAminI  idaM tu duHkhaM kaunteya mamAsahyaM nibodha tat 22  yA na jAtu svayaM piMSe gAtrodvartanam AtmanaH  anyatra kuntyA bhadraM te sAdya piMSAmi candanam  pazya kaunteya pANI me naivaM yau bhavataH purA 23   [vai]  ity asya darzayAm Asa kiNabaddhau karAv ubhau 24   [drau]  bibhemi kuntyA yA nAhaM yuSmAkaM vA kadA cana  sAdyAgrato virATasya bhItA tiSThAmi kiMkarI 25  kiM nu vakSyati samrAN mAM varNakaH sukRto na vA  nAnyapiSTaM hi matsyasya candanaM kila rocate 26   [vai]  sA kIrtayantI duHkhAni bhImasenasya bhAminI  ruroda zanakaiH kRSNA bhImasenam udIkSatI 27  sA bASpakalayA vAcA niHzvasantI punaH punaH  hRdayaM bhImasenasya ghaTTayantIdam abravIt 28  nAlpaM kRtaM mayA bhIma devAnAM kilbiSaM purA  abhAgyA yat tu jIvAmi martavye sati pANDava 29  tatas tasyAH karau zUnau kiNabaddhau vRkodaraH  mukham AnIya vepantyA ruroda paravIra hA 30  tau gRhItvA ca kaunteyo bASpam utsRjya vIryavAn  tataH paramaduHkhArta idaM vacanam abravIt   |



 1   [bhImas]  dhig astu me bAhubalaM gANDIvaM phalgunasya ca  yat te raktau purA bhUtvA pANI kRtakiNAv ubhau 2  sabhAyAM sma virATasya karomi kadanaM mahat  tatra mAM dharmarAjas tu kaTAkSeNa nyavArayat  tad ahaM tasya vijJAya sthita evAsmi bhAmini 3  yac ca rASTrAt pracyavanaM kurUNAm avadhaz ca yaH  suyodhanasya karNasya zakuneH saubalasya ca 4  duHzAsanasya pApasya yan mayA na hRtaM ziraH  tan me dahati kalyANi hRdi zalyam ivArpitam  mA dharmaM jahi suzroNi krodhaM jahi mahAmate 5  imaM ca samupAlambhaM tvatto rAjA yudhiSThiraH  zRNuyAd yadi kalyANi kRtsnaM jahyAt sa jIvitam 6  dhanaMjayo vA suzroNi yamau vA tanumadhyame  lokAntara gateSv eSu nAhaM zakSyAmi jIvitum 7  sukanyA nAma zAryAtI bhArgavaM cyacanaM vane  valmIka bhUtaM zAmyantam anvapadyata bhAminI 8  nADdAyanI cendrasenA rUpeNa yadi te zrutA  patim anvacarad vRddhaM purA varSasahasriNam 9  duhitA janakasyApi vaidehI yadi te zrutA  patim anvacarat sItA mahAraNyanivAsinam 10  rakSasA nigrahaM prApya rAmasya mahiSI priyA  klizyamAnApi suzroNI rAmam evAnvapadyata 11  lopAmudrA tathA bhIru vayo rUpasamanvitA  agastyam anvayAd dhitvA kAmAn sarvAn amAnuSAn 12  yathaitAH kIrtitA nAryo rUpavatyaH pativratAH  tathA tvam api kalyANi sarvaiH samuditA guNaiH 13  mA dIrghaM kSama kAlaM tvaM mAsam adhyardhasaMmitam  pUrNe trayodaze varSe rAjJo rAjJI bhaviSyasi 14   [drau]  Artayaitan mayA bhImakRtaM bASpavimokSaNam  apArayantyA duHkhAni na rAjAnam upAlabhe 15  vimuktena vyatItena bhImasena mahAbala  pratyupasthita kAlasya kAryasyAnantaro bhava 16  mameha bhImakaikeyI rUpAbhibhava zaGkayA  nityam udjivate rAjA kathaM neyAd imAm itI 17  tasyA viditvA taM bhAvaM svayaM cAnRta darzanaH  kIcako 'yaM suduSTAtmA sadA prArthayate hi mAm 18  tam ahaM kupitA bhIma punaH kopaM niyamya ca  abruvaM kAmasaMmUDham AtmAnaM rakSa kIcaka 19  gandharvANAm ahaM bhAryA paJcAnAM mahiSI priyA  te tvAM nihanyur durdharSAH zUrAH sAhasa kAriNaH 20  evam uktaH sa duSTAtmA kIcakaH pratyuvAca ha  nAhaM bibhemi sairandhir gandharvANAM zucismite 21  zataM sahasram api vA gandharvANAm ahaM raNe  samAgataM haniSyAmi tvaM bhIru kuru me kSaNam 22  ity ukte cAbruvaM sUtaM kAmAturam ahaM punaH  na tvaM pratibalas teSAM gandharvANAM yazasvinAm 23  dharme sthitAsmi satataM kulazIlasamanvitA  necchAmi kaM cid vadhyantaM tena jIvasi kIcaka 24  evam uktaH sa duSTAtmA prahasya svanavat tadA  na tiSThati sma san mArge na ca dharmaM bubhUSati 25  pApAtmA pApabhAvaz ca kAmarAgavazAnugaH  avinItaz ca duSTAtmA pratyAkhyAtaH punaH punaH  darzane darzane hanyAt tathA jahyAM ca jIvitam 26  tad dharme yatamAnAnAM mahAn dharmo naziSyati  samayaM rakSamANAnAM bhAryA vo na bhaviSyati 27  bhAryAyAM rakSyamANAyAM prajA bhavati rakSitA  prajAyAM rakSyamANAyAm AtmA bhavati rakSitaH 28  vadatAM varNadharmAMz ca brAhmaNAnAM hi me zrutam  kSatriyasya sadA dharmo nAnyaH zatrunibarhaNAt 29  pazyato dharmarAjasya kIcako mAM padAvadhIt  tava caiva samakSaM vai bhImasena mahAbala 30  tvayA hy ahaM paritrAtA tasmAd ghorAj jaTAsurAt  jayadrathaM tathaiva tva majaiSIr bhrAtRbhiH saha 31  jahImam api pApaM tvaM yo 'yaM mAm avamanyate  kIcako rAjavAllabhyAc chokakRn mama bhArata 32  tam evaM kAmasaMmmattaM bhindhi kumbham ivAzmani  yo nimittam anarthAnAM bahUnAM mama bhArata 33  taM cej jIvantam AdityaH prAtar abhyudayiSyati  viSam AloDya pAsyAmi mAM kIcaka vazaM gamam  zreyo hi maraNaM mahyaM bhImasena tavAgrataH 34   [vai]  ity uktvA prArudat kRSNA bhImasyoraH samAzritA  bhImaz ca tAM pariSvajya mahat sAntvaM prayujya ca  kIcakaM manasAgacchat sRkkiNI parisaMlihan   |

 

 1   [bhImas]  tathA bhadre kariSyAmi yathA tvaM bhIru bhASase  adya taM sUdayiSyAmi kIcakaM saha bAndhavam 2  asyAH pradoSe zarvaryAH kuruSvAnena saMgamam  duHkhaM zokaM ca nirdhUya yAjJaseni zucismite 3  yaiSA nartana zAlA vai matsyarAjena kAritA  divAtra kanyA nRtyanti rAtrau yAnti yathA gRham 4  tatrAsti zayanaM bhIru dRjDhAGgaM supratiSThitam  tatrAsya darzayiSyAmi pUrvapretAn pitAmahAn 5  yathA ca tvAM na pazyeyuH kurvANAM tena saMvidam  kuryAs tathA tvaM kalyANi yathA saMnihito bhavet 6   [vai]  tathA tau kathayitvA tu bASpam utsRjya duHkhitau  rAtrizeSaM tad atyugraM dhArayAm Asatur hRdA 7  tasyAM rAtryAM vyatItAyAM prAtar utthAya kIcakaH  gatvA rAjakulAyaiva draupadIm idam abravIt 8  sabhAyAM pazyato rAjJaH pAtayitvA padAhanam  na caivAlabhathAs trANam abhipannA balIyasA 9  pravAdena hi matsyAnAM rAjA nAmnAyam ucyate  aham eva hi matsyAnAM rAjA vai vAhinIpatiH 10  sA sukhaM pratipadyasva dAsabhIru bhavAmi te  ahnAya tava suzroNizataM niSkAn dadAmy aham 11  dAsI zataM ca te dadyAM dAsAnAm api cAparam  rathaM cAzvatarI yuktam astu nau bhIru saMgamaH 12   [drau]  ekaM me samayaM tv adya pratipadyasva kIcaka  na tvAM sakhA vA bhrAtA vA jAnIyAt saMgataM mayA 13  avabodhAd dhi bhItAsmi gandharvANAM yazasvinAm  evaM me pratijAnIhi tato 'haM vazagA tava 14   [kIcaka]  evam etat kariSyAmi yathA suzroNi bhASase  eko bhadre gamiSyAmi zUnyam AvasathaM tava 15  samAgamArthaM rambhoru tvayA madanamohitaH  yathA tvAM nAvabhotsyanti gandharvAH sUryavarcasaH 16   [drau]  yad idaM nartanAgAraM matsyarAjena kAritam  divAtra kanyA nRtyanti rAtrau yAnti yathA gRham 17  tamisre tatra gacchethA gandharvAs tan na jAnate  tatra doSaH parihRto bhaviSyati na saMzayaH 18   [vai]  tam arthaM pratijalpantyAH kRSNAyAH kIcakena ha  divasArdhaM samabhavan mAsenaiva samaM nRpa 19  kIcako 'tha gRhaM gatvA bhRzaM harSapariplutaH  sairandhrI rUpiNaM mUDho mRtyuM taM nAvabuddhavAn 20  gandhAbharaNa mAlyeSu vyAsaktaH sa vizeSataH  alaM cakAra so ''tmAnaM sa tvaraH kAmamohitaH 21  tasya tat kurvataH karmakAlo dIrgha ivAbhavat  anucintayataz cApi tAm evAyata locanAm 22  AsId abhyadhikA cAsya zrIH zriyaM pramumukSataH  nirvANakAle dIpasya vartIm iva didhakSataH 23  kRtasaMpratyayas tatra kIcakaH kAmamohitaH  nAjAnAd divasaM yAntaM cintayAnaH samAgamam 24  tatas tu draupadI gatvA tadA bhImaM mahAnase  upAtiSThata kalyANI kauravyaM patim antikAt 25  tam uvAca sukezAntA kIcakasya mayA kRtaH  saMgamo nartanAgAre yathAvocaH paraMtapa 26  zUnyaM sa nartanAgAram AgamiSyati kIcakaH  eko nizi mahAbAho kIcakaM taM niSUdaya 27  taM sUtaputraM kaunteya kIcakaM madadarpitam  gatvA tvaM nartanAgAraM nirjIvaM kurupANDava 28  darpAc ca sUtaputro 'sau gandharvAn avamanyate  taM tvaM praharatAM zreSTha naDaM nAga ivoddhara 29  azruduHkhAbhibhUtAyA mama mArjasva bhArata  Atmanaz caiva bhadraM te kuru mAnaM kulasya ca 30   [bhImas]  svAgataM te varArohe yan mAM vedayase priyam  na hy asya kaM cid icchAmi sahAyaM varavarNini 31  yA me prItis tvayAkhyAtA kIcakasya samAgame  hatvA hiDimbaM sA prItir mamAsId varavarNini 32  satyaM bhratRRMz ca dharmaM ca puraskRtya bravImi te  kIcakaM nihaniSyAmi vRtraM devapatir yathA 33  taM gahvare prakAze vA pothayiSyAmi kIcakam  atha ced avabhotsyanti haMsye matsyAn api dhruvam 34  tato duryodhanaM hatvA pratipatsye vasuMdharAm  kAmaM matsyam upAstAM hi kuntIputro yudhiSThiraH 35   [drau]  yathA na saMtyajethAs tvaM satyaM vai matkRte vibho  nigUDhas tvaM tathA vIra kIcakaM vinipAtaya 36   [bhImas]  evam etat kariSyAmi yathA tvaM bhIru bhASate  adRzyamAnas tasyAdya tamasvinyAm anindite 37  nAgo bilvam ivAkramya pothayiSyAmy ahaM ziraH  alabhyAm icchatas tasya kIcakasya durAtmanaH 38   [vai]  bhImo 'tha prathamaM gatvA rAtrau channa upAvizat  mRgaM harir ivAdRzyaH pratyAkAGkSat sa kIcakam 39  kIcakaz cApy alaM kRtyayathAkAmam upAvrajat  tAM velAM nartanAgAre pAJcAlI saMgamAzayA 40  manyamAnaH sa saMketam AgAraM prAvizac ca tam  pravizya ca sa tad vezma tamasA saMvRtaM mahat 41  pUrvAgataM tatas tatra bhImam apratimaujasam  ekAntam AsthitaM cainam AsasAda sudurmatiH 42  zayAnaM zayane tatra mRtyuM sUtaH parAmRzat  jAjvalyamAnaM kopena kRSNA dharSaNajena ha 43  upasaMgamya caivainaM kIcakaH kAmamohitaH  harSonmathita cittAtmA smayamAno 'bhyabhASata 44  prApitaM te mayA vittaM bahurUpam anantakam  sat sarvaM tvAM samuddizya sahasA samupAgataH 45  nAkasmAn mAM prazaMsanti sadA gRhagatAH striyaH  suvAsA darzanIyaz ca nAnyo 'sti tvA dRzaH pumAn 46   [bhImas]  diSTyA tvaM darzanIyo 'si diSTyAtmAnaM prazaMsasi  IdRzas tu tvayA sparzaH spRSTapUrvo na karhi cit 47   [vai]  ity uktvA taM mahAbAhur bhImo bhImaparAkramaH  samutpatya ca kaunteyaH prahasya ca narAdhamam  bhImo jagrAha kezeSu mAlyavatsu sugandhiSu 48  sa kezeSu parAmRSTo balena balinAM varaH  AkSipya kezAn vegena bAhvor jagrAha pANDavam 49  bAhuyuddhaM tayor AsIt kruddhayor narasiMhayoH  vasante vAsitA hetor balavad gajayor iva 50  ISad AgalitaM cApi krodhAc cala padaM sthitam  kIcako balavAn bhImaM jAnubhyAm AkSipad bhuvi 51  pAtito bhuvi bhImas tu kIcakena balIyasA  utpapAtAtha vegena daNDAhata ivoragaH 52  spardhayA ca balonmattau tAv ubhau sUta pANDavau  nizIthe paryakarSetAM balinau nizi nirjane 53  tatas tad bhavanazreSThaM prAkampata muhur muhuH  balavac cApi saMkruddhAv anyonyaM tAv agarjatAm 54  talAbhyAM tu sa bhImena vakSasy abhihato balI  kIcako roSasaMtaptaH padAn na calitaH padam 55  muhUrtaM tu sa taM vegaM sahitvA bhuvi duHsaham  balAd ahIyata tadA sUto bhImabalArditaH 56  taM hIyamAnaM vijJAya bhImaseno mahAbalaH  vakSasy AnIya vegena mamanthainaM vicetasam 57  krodhAviSTo viniHzvasya punaz cainaM vRkodaraH  jagrAha jayatAM zreSThaH kezeSv eva tadA bhRzam 58  gRhItvA kIcakaM bhImo virurAva mahAbalaH  zArdUlaH pizitAkAGkSI gRhItveva mahAmRgam 59  tasya pAdau ca pANI ca zirogrIvAM ca sarvazaH  kAye pravezayAm Asa pazor iva pinAka dhRk 60  taM saMmathita sarvAGgaM mAMsapiNDopamaM kRtam  kRSNAyai darzayAm Asa bhImaseno mahAbalaH 61  uvAca ca mahAtejA draupadIM pANDunandanaH  pazyainam ehi pAJcAli kAmuko 'yaM yathA kRtaH 62  tathA sa kIcakaM hatvA gatvA roSasya vai zamam  Amantrya draupadIM kRSNAM kSipram AyAn mahAnasam 63  kIcakaM ghAtayitvA tu draupadI yoSitAM varA  prahRSTA gatasaMtApA sabhA pAlAn uvAca ha 64  kIcako 'yaM hataH zete gandharvaiH patibhir mama  parastrI kAmasaMmattaH samAgacchata pazyata 65  tac chrutvA bhASitaM tasyA nartanAgAra rakSiNaH  sahasaiva samAjagmur AdAyokAH sahasrazaH 66  tato gatvAtha tad vezma kIcakaM vinipAtitam  gatAsuM dadRzur bhUmau rudhireNa samukSitam 67  kvAsya grIvA kva caraNau kva pANI kva ziras tathA  iti sma taM parIkSante gandharveNa hataM tadA   |

 

 1   [vai]  tasmin kAle samAgamya sarve tatrAsya bAndhavAH  ruruduH kIcakaM dRSTvA parivArya samantataH 2  sarve saMhRSTaromANaH saMtrastAH prekSya kIcakam  tathA sarvAGgasaMbhugnaM kUrmaM sthala ivoddhRtam 3  pothitaM bhImasenena tam indreNeva dAnavam  saMskArayitum icchanto bahir netuM pracakramuH 4  dadRzus te tataH kRSNAM sUtaputrAH samAgatAH  adUrAd anavadyAGgIM stambham AliGgya tiSThatIm 5  samaveteSu sUteSu tAn uvAcopakIcakaH  hanyatAM zIghram asatI yatkRte kIcako hataH 6  atha vA neha hantavyA dahyatAM kAminA saha  mRtasyApi priyaM kAryaM sUtaputrasya sarvathA 7  tato virATam Ucus te kIcako 'syAH kRte hataH  sahAdyAnena dahyeta tadanujJAtum arhasi 8  parAkramaM tu sUtAnAM matvA rAjAnvamodata  sairandhryAH sUtaputreNa saha dAhaM vizAM pate 9  tAM samAsAdya vitrastAM kRSNAM kamalalocanAm  momuhyamAnAM te tatra jagRhuH kIcakA bhRzam 10  tatas tu tAM samAropya nibadhya ca sumadhyamAm  jagmur udyamya te sarve zmazAnam abhitas tadA 11  hriyamANA tu sA rAjan sUtaputrair aninditA  prAkrozan nAtham icchantI kRSNA nAthavatI satI 12   [drau]  jayo jayanto vijayo jayatseno yajadbalaH  te me vAcaM vijAnantu sUtaputrA nayanti mAm 13  yeSAM jyAtalanirghoSo visphUrjitam ivAzaneH  vyazrUyata mahAyuddhe bhImaghoSas tarasvinAm 14  rathaghoSaz ca balavAn gandharvANAM yazasvinAm  te me vAcaM vijAnantu sUtaputrA nayanti mAm 15   [vai]  tasyAs tAH kRpaNA vAcaH kRSNAyAH paridevitAH  zrutvaivAbhyapatad bhImaH zayanAd avicArayan 16   [bhImas]  ahaM zRNomi te vAcaM tvayA sairandhi bhASitAm  tasmAt te sUtaputrebhyo na bhayaM bhIru vidyate 17   [vai]  ity uktvA sa mahAbAhur vijajRmbhe jighAMsayA  tataH sa vyAyataM kRtvA veSaM viparivartya ca  advAreNAbhyavaskandya nirjagAma bahis tadA 18  sa bhImasenaH prAkArAd Arujya tarasA drumam  zmazAnAbhimukhaH prAyAd yatra te kIcakA gatAH 19  sa taM vRkSaM dazavyAmaM sa skandhaviTapaM balI  pragRhyAbhyadravat sUtAn daNDapANir ivAntakaH 20  Uruvegena tasyAtha nyagrodhAzvattha kiMzukAH  bhUmau nipatitA vRkSAH saMghazas tatra zerate 21  taM siMham iva saMkruddhaM dRSTvA gandharvam Agatam  vitresuH sarvataH sUtA viSAdabhayakampitAH 22  tam antakam ivAyAntaM gandharvaM prekSya te tadA  didhakSantas tadA jyeSThaM bhrAtaraM hy upakIcakAH  parasparam athocus te viSAdabhayakampitAH 23  gandharvo balavAn eti kruddha udyamya pAdapam  sairandhrI mucyatAM zIghraM mahan no bhayam Agatam 24  te tu dRSTvA tam AviddhaM bhImasenena pAdapam  vimucya draupadIM tatra prAdravan nagaraM prati 25  dravatas tAMs tu saMprekSya savajrI dAnavAn iva  zataM paJcAdhikaM bhImaH prAhiNod yamasAdanam 26  tata AzvAsayat kRSNAM pravimucya vizAM pate  uvAca ca mahAbAhuH pAJcAlIM tatra draupadIm  azrupUrNamukhIM dInAM durdharSaH sa vRkodaraH 27  evaM te bhIru vadhyante ye tvAM kliSyanty anAgasam  praihi tvaM nagaraM kRSNe na bhayaM vidyate tava  anyenAhaM gamiSyAmi virATasya mahAnasam 28  paJcAdhikaM zataM tac ca nihataM tatra bhArata  mahAvanam iva chinnaM zizye vigalitadrumam 29  evaM te nihatA rAjaJ zataM paJca ca kIcakAH  sa ca senApatiH sUrvam ity etat sUta SaT Satam 30  tad dRSTvA mahad AzcaryaM narA nAryaz ca saMgatAH  viSmayaM paramaM gatvA nocuH kiM cana bhArata   |



 1   [vai]  te dRSTvA nihatAn sUtAn rAjJe gatvA nyavedayan  gandharvair nihatA rAjan sUtaputrAH paraHzatAH 2  yathA vajreNa vai dIrNaM parvatasya mahac chiraH  vinikIrNaM pradRzyeta tathA sUtA mahItale 3  sairandhrI ca vimuktAsau punar AyAti te gRham  sarvaM saMzayitaM rAjan nagaraM te bhaviSyati 4  tathArUpA hi sairandhrI gandharvAz ca mahAbalAH  puMsAm iSTaz ca viSayo maithunAya na saMzayaH 5  yathA sairandhri veSeNa na te rAjann idaM puram  vinAzam eti vai kSipraM tathA nItir vidhIyatAm 6  teSAM tad vacanaM zrutvA virATo vAhinIpatiH  abravIt kriyatAm eSAM sUtAnAM paramakriyA 7  ekasminn eva te sarve susamiddhe hutAzane  dahyantAM kIcakAH zIghraM ratnair gandhaiz ca sarvazaH 8  sudeSNAM cAbravId rAjA mahiSIM jAtasAdhvasaH  sairandhrIm AgatAM brUyA mamaiva vacanAd idam 9  gaccha sairandhri bhadraM te yathAkAmaM carAbale  bibheti rAjA suzroNi gandharvebhyaH parAbhavAt 10  na hi tAm utsahe vaktuM svayaM gandharvarakSitAm  striyas tv adoSAs tAM vaktum atas tvAM prabravImy aham 11  atha muktA bhayAt kRSNA sUtaputrAn nirasya ca  mokSitA bhImasenena jagAma nagaraM prati 12  trAsiteva mRgI bAlA zArdUlena manasvinI  gAtrANi vAsasI caiva prakSAlya salilena sA 13  tAM dRSTvA puruSA rAjan prAdravanta dizo daza  gandharvANAM bhayatrastAH ke cid dRSTIr nyamIlayan 14  tato mahAnasa dvAri bhImasenam avasthitam  dadarza rAjan pAJcAlI yathAmattaM mahAdvipam 15  taM vismayantI zanakaiH saMjJAbhir idam abravIt  gandharvarAjAya namo yenAsmi parimocitA 16   [bhImas]  ye yasyA vicarantIha puruSA vazavartinaH  tasyAs te vacanaM zrutvA anRNA vicaranty uta 17   [vai]  tataH sA nartanAgAre dhanaMjayam apazyata  rAjJaH kanyA virATasya nartayAnaM mahAbhujam 18  tatas tA nartanAgArAd vinizkramya sahArjunAH  kanyA dadRzur AyAntIM kRSNAM kliSTAm anAgasam 19   [kanyAh]  diSTyA sairandhri muktAsi diSTyAsi punarAgatA  diSTyA vinihatAH sUtA ye tvAM klizyanty anAgasam 20   [bRhan]  kathaM sairandhri muktAsi kathaM pApAz ca te hatAH  icchAmi vai tava zrotuM sarvam eva yathAtatham 21   [sair]  bRhannaDe kiM nu tava sairandhryA kAryam adya vai  yA tvaM vasasi kalyANi sadA kanyA pure sukham 22  na hi duHkhaM samApnoSi sairandhrI yad upAznute  tena mAM duHkhitAm evaM pRcchase prahasann iva 23   [bRhan]  bRhannaDApi kalyANi duHkham Apnoty anuttamam  tiryagyonigatA bAle na cainAm avabudhyase 24   [vai]  tataH sahaiva kanyAbhir draupadI rAjavezma tat  praviveza sudeSNAyAH samIpam apalAyinI 25  tAm abravId rAjaputrI virATa vacanAd idam  sairandhri gamyatAM zIghraM yatra kAmayase gatim 26  rAjA bibheti bhadraM te gandharvebhyaH parAbhavAt  tvaM cApi taruNI subhru rUpeNApratimA bhuvi 27   [sair]  trayodazAha mAtraM me rAjA kSamatu bhAmini  kRtakRtyA bhaviSyanti gandharvAs te na saMzayaH 28  tato mAM te 'paneSyanti kariSyanti ca te priyam  dhruvaM ca zreyasA rAjA yoSkyate saha bAndhavaiH   |

 

 1   [vai]  kIcakasya tu ghAtena sAnujasya vizAM pate  atyAhitaM cintayitvA vyasmayanta pRthagjanAH 2  tasmin pure janapade saMjalpo 'bhUc ca sarvazaH  zauryAd dhi vallabho rAjJo mahAsattvaz ca kIcakaH 3  AsIt prahartA ca nRNAM dArAmarzI ca durmatiH  sa hataH khalu pApAtmA gandharvair duSTapUruSaH 4  ity ajalpan mahArAjan parAnIka vizAtanam  deze deze manuSyAz ca kIcakaM duSpradharSaNam 5  atha vai dhArtarASTreNa prayuktA ya bahizcarAH  mRgayitvA bahUn grAmAn rASTrANi nagarANi ca 6  saMvidhAya yathAdiSTaM yathA dezapradarzanam  kRtacintA nyavartanta te ca mAga puraM prati 7  tatra dRSTvA tu rAjAnaM kauravyaM dhRtarASTra jam  dorNa karNa kRpaiH sArdhaM bhISmeNa ca mahAtmanA 8  saMgataM bhrAtRbhiz cApi trigartaiz ca mahArathaiH  duryodhanaM sabhAmadhye AsInam idam abruvan 9  kRto 'smAbhiH paro yatnas teSAm anveSaNe sadA  pANDavAnAM manuSyendra tasmin mahati kAnane 10  nirjane mRgasaMkIrNe nAnAdrumalatAvRte  latApratAna bahule nAnAgulmasamAvRte 11  na ca vidmo gatA yena pArthAH syur dRDhavikramAH  mArgamANAH padanyAsaM teSu teSu tathA tathA 12  girikUTeSu tuGgeSu nAnAjanapadeSu ca  janAkIrNeSu dezeSu kharvaTeSu pareSu ca 13  narendra bahuzo 'nviSTA naiva vidmaz ca pANDavAn  atyantabhAvaM naSTAs te bhadraM tubhyaM nararSabha 14  vartmAny anviSyamANAs tu rathAnAM rathasattama  kaM cit kAlaM manuSyendra sUtAnAm anugA vayam 15  mRgayitvA yathAnyAyaM viditArthAH sma tattvataH  prAptA dvAravatIM sUtA Rte pArthaiH paraMtapa 16  na tatra pANDavA rAjan nApi kRSNA pativratA  sarvathA vipranaSTAs te namas te bharatarSabha 17  na hi vidmo gatiM teSAM vAsaM vApi mahAtmanAm  pANDavAnAM pravRttiM vA vidmaH karmApi vA kRtam  sa naH zAdhi manuSyendra ata UrdhvaM vizAM pate 18  anveSaNe pANDavAnAM bhUyaH kiM karavAmahe  imAM ca naH priyAm IkSa vAcaM bhadravatIM zubhAm 19  yena trigarttA nikRtA balena mahatA nRpa  sUtena rAjJo matsyasya kIcakena mahAtmanA 20  sa hataH patitaH zete gandharvair nizi bhArata  adRzyamAnair duSTAtmA saha bhrAtRbhir acyuta 21  priyam etad upazrutya zatrUNAM tu parAbhavam  kRtakRtyaz ca kauravya vidhatsva yad anantaram   |

 

1   [vai]  tato duryodhano rAjA zrutvA teSAM vacas tadA  ciram antar manA bhUtvA pratyuvAca sabhA sadaH 2  suduHkhA khalu kAryANAM gatir vijJAtum antataH  tasmAt sarve udIkSadhvaM kva nu syuH pANDavA gatAH 3  alpAvaziSTaM kAlasya gatabhUyiSTham antataH  teSAm ajJAtacaryAyAm asmin varSe trayodaze 4  asya varSasya zeSaM ced vyatIyur iha pANDavAH  nivRttasamayAs te hi satyavrataparAyaNAH 5  kSaranta iva nAgendrAH sarva AzIviSopamAH  duHkhA bhaveyuH saMrabdhAH kauravAn prati te dhruvam 6  arvAk kAlasya vijJAtAH kRcchrarUpadharAH punaH  pravizeyur jitakrodhAs tAvad eva punar vanam 7  tasmAt kSipraM bubhutsadhvaM yathA no 'tyantam avyayam  rAjyaM nirdvandvam avyagraM niHsapatnaM ciraM bhavet 8  athAbravIt tataH karNaH kSipraM gacchantu bhArata  anye dhUrtatarA dakSA nibhRtAH sAdhukAriNaH 9  carantu dezAn saMvItAH sphItAJ janapadAkulAn  tatra goSThISv athAnyAsu siddhapravrajiteSu ca 10  paricAreSu tIrtheSu vividheSv AkareSu ca  vijJAtavyA manuSyais tais tarkayA suvinItayA 11  vividhais tatparaiH samyak tajjJair nipuNa saMvRtaiH  anveSTavyAz ca nipuNaM pANDavAz channavAsinaH 12  nadI kuJjeSu tIrtheSu grAmeSu nagareSu ca  AzrameSu ca ramyeSu parvateSu guhAsu ca 13  athAgrajAnantarajaH pApabhAvAnurAgiNam  jyeSThaM duHzAsanas tatra bhrAtA bhrAtaram abravIt 14  etac ca karNo yat prAha sarvam IkSAmahe tathA  yathoddiSTaM carAH sarve mRgayantu tatas tataH  ete cAnye ca bhUyAMso dezAd dezaM yathAvidhi 15  na tu teSAM gatir vAsaH pravRttiz copalabhyate  atyAhitaM vA gUDhAs te pAraM vormimato gatAH 16  vyAlair vApi mahAraNye bhakSitAH zUramAninaH  atha vA viSamaM prApya vinaSTAH zAzvatIH samAH 17  tasmAn mAnasam avyagraM kRtvA tvaM kurunandana  kuru kAryaM yathotsAhaM manyase yan narAdhipa   |

 

 1   [vai]  athAbravIn mahAvIryo droNas tattvArtha darzivAn  na tAdRzA vinazyanti nApi yAnti parAbhavam 2  zUrAz ca kRtavidyAz ca buddhimanto jitendriyAH  dharmajJAz ca kRtajJAz ca dharmarAjam anuvratAH 3  nItidharmArthatattvajJaM pitRvac ca samAhitam  dharme sthitaM satyadhRtiM jyeSThaM jyeSThApacAyinam 4  anuvratA mahAtmAnaM bhrAtaraM bhrAtaro nRpa  ajAtazatruM hrImantaM taM ca bhrAtRRn anuvratam 5  teSAM tathAvidheyAnAM nibhRtAnAM mahAtmanAm  kimarthaM nItimAn pArthaH zreyo naiSAM kariSyati 6  tasmAd yatnAt pratIkSante kAlasyodayam Agatam  na hi te nAzam Rccheyur iti pazyAmy ahaM dhiyA 7  sAMprataM caiva yat kAryaM tac ca kSipram akAlikam  kriyatAM sAdhu saMcintya vAsaz caiSAM pracintyatAm 8  yathAvat pANDuputrANAM sarvArtheSu dhRtAtmanAm  durjJeyAH khalu zUrAs te apApAs tapasA vRtAH 9  zuddhAtmA guNavAn pArthaH satyavAn nItimAJ zuciH  tejorAzir asaMkhyeyo gRhNIyAd api cakSur I 10  vijJAya kriyatAM tasmAd bhUyaz ca mRgayAmahe  brAhmaNaiz cArakaiH siddhair ye cAnye tadvido janAH   |

 

 1   [vai]  tataH zAMtanavo bhISmo bharatAnAM pitAmahaH  zrutavAn dezakAlajJas tattvajJaH sarvadharmavit 2  AcArya vAkyoparame tad vAkyam abhisaMdadhat  hitArthaM sa uvAcemAM bhAratIM bhAratAn prati 3  yudhiSThire samAsaktAM dharmajJe dharmasaMzritAm  asatsu durlabhAM nityaM satAM cAbhimatAM sadA  bhISmaH samavadat tatra giraM sAdhubhir arcitAm 4  yathaiSa brAhmaNaH prAha droNaH sarvArthavattva vit  sarvalakSaNasaMpannA nAzaM nArhanti pANDavAH 5  zrutavRttopasaMpannA sAdhuvratasamanvitAH  vRddhAnuzAsane magnAH satyavrataparAyaNAH 6  samayaM samayajJAs te pAlayantaH zucivratAH  nAvasIditum arhanti udvahantaH satAM dhuram 7  dharmataz caiva guptAs te svavIryeNa ca pANDavAH  na nAzam adhigaccheyur iti me dhIyate matiH 8  tatra buddhiM praNeSyAmi pANDavAn prati bhArata  na tu nItiH sunItasya zakyate 'nveSituM paraiH 9  yat tu zakyam ihAsmAbhis tAn vai saMcintya pANDavAn  buddhyA pravaktuM na drohAt pravakSyAmi nibodha tat 10  sA tv iyaM sAdhu vaktavyA na tv anItaH kathaM cana  vRddhAnuzAsane tAta tiSThataH satyazIlinaH 11  avazyaM tv iha dhIreNa satAM madhye vivakSatA  yathAmativivaktavyaM sarvazo dharmalipsayA 12  tatra nAhaM tathA manye yathAyam itaro janaH  pure janapade vApi yatra rAjA yudhiSThiraH 13  nAsUyako na cApIrSur nAtivAdI na matsarI  bhaviSyati janas tatra svaM svaM dharmam anuvrataH 14  brahmaghoSAz ca bhUyAMsaH pUrNAhutyas tathaiva ca  kratavaz ca bhaviSyanti bhUyAMso bhUridakSiNAH 15  sadA ca tatra parjanyaH samyag varSI na saMzayaH  saMpannasasyA ca mahI nirItIkA bhaviSyati 16  rasavanti ca dhAnyAni guNavanti phalAni ca  gandhavanti ca mAlyAni zubhazabdA ca bhAratI 17  vAyuz ca sukhasaMsparzo nispratIpaM ca darzanam  bhayaM nAbhyAvizet tatra yatra rAjA yudhiSThiraH 18  gAvaz ca bahulAs tatra na kRzA na ca durduhAH  payAMsi dadhi sarpIMSi rasavanti hitAni ca 19  guNavanti ca pAnAni bhojyAni rasavanti ca  tatra deze bhaviSyanti yatra rAjA yudhiSThiraH 20  rasAH sparzAz ca gandhAz ca zabdAz cApi guNAnvitAH  dRzyAni ca prasannAni yatra rAjA yudhiSThiraH 21  svair svair guNaiH susaMyuktAs tasmin varSe trayodaze  deze tasmin bhaviSyanti tAta pANDava saMyute 22  saMprItimAJ janas tatra saMtuSTaH zucir avyayaH  devatAtithipUjAsu sarvabhUtAnurAgavAn 23  iSTadAno mahotsAhaH zazvad dharmaparAyaNaH  azubha dvic chubhaprepsur nityayajJaH zubhavrataH  bhaviSyati janas tatra yatra rAjA yudhiSThiraH 24  tyaktavAkyAnRtas tAta zubhakalyANa maGgalaH  zubhArthepSuH zubhamatir yatra rAjA yudhiSThiraH  bhaviSyati janas tatra nityaM ceSTa priyavrataH 25  dharmAtmA sa tadAdRzyaH so 'pi tAta dvijAtibhiH  kiM punaH prAkRtaiH pArthaH zakyo vijJAtum antataH 26  yasmin satyaM dhRtir dAnaM parA zAntir dhruvA kSamA  hrIH zrIH kIrtiH paraM teja AnRzaMsyam athArjavam 27  tasmAt tatra nivAsaM tu channaM satreNa dhImataH  gatiM vA paramAM tasya notsahe vaktum anyathA 28  evam etat tu saMcintya yatkRtaM manyase hitam  tat kSipraM kuru kauravya yady evaM zraddadhAsi me   |



 1   [vai]  tataH zAradvato vAkyam ity uvAca kRpas tadA  yuktaM prAptaM ca vRddhena pANDavAn prati bhASitam 2  dharmArthasahitaM zlakSNaM tattvataz ca sa hetumat  tatrAnurUpaM bhISmeNa mamApy atra giraM zRNu 3  teSAM caiva gatis tIrthair vAsaz caiSAM pracintyatAm  nItir vidhIyatAM cApi sAMprataM yA hitA bhavet 4  nAvajJeyo ripus tAta prAkRto 'pi bubhUSatA  kiM punaH pANDavAs tAta sarvAstrakuzalA raNe 5  tasmAt satraM praviSTeSu pANDaveSu mahAtmasu  gUDhabhAveSu channeSu kAle codayam Agate 6  svarASTra pararASTreSu jJAtavyaM balam AtmanaH  udaye pANDavAnAM ca prApte kAle na saMzayaH 7  nivRttasamayAH pArthA mahAtmAno mahAbalAH  mahotsAhA bhaviSyanti pANDavA hy ati tejasaH 8  tasmAd balaM ca kozaM ca nItiz cApi vidhIyatAm  yathAkAlodaye prApte samyak taiH saMdadhAmahe 9  tAta manyAmi tat sarvaM budhyasva balam AtmanaH  niyataM sarvamitreSu balavatsv abaleSu ca 10  uccAvacaM balaM jJAtvA madhyasthaM cApi bhArata  prahRSTam aprahRSTaM ca saMdadhAma tathA paraiH 11  sAmnA bhedena dAnena daNDena balikarmaNA  nyAyenAnamya ca parAn balAc cAnamya durbalAn 12  sAntvayitvA ca mitrANi balaM cAbhASyatAM sukham  sakoza balasaMvRddhaH samyak siddhim avApsyasi 13  yotsyase cApi balibhir aribhiH pratyupasthitaiH  anyais tvaM pANDavair vApi hInasvabalavAhanaiH 14  evaM sarvaM vinizcitya vyavasAyaM svadharmataH  yathAkAlaM manuSyendra ciraM sukham avApsyasi   |



1   [vai]  atha rAjA trigartAnAM suzarmA rathayUthapaH  prAptakAlam idaM vAkyam ucAva tvarito bhRzam 2  asakRn nikRtaH pUrvaM matsyaiH sAlveyakaiH saha  sUtena caiva matsyasya kIcakena punaH punaH 3  bAdhito bandhubhiH sArdhaM balAd balavatA vibho  sa karNam abhyudIkSyAtha duryodhanam abhASata 4  asakRn matsyarAjJA me rASTraM bAdhitam ojasA  praNetA kIcakaz cAsya balavAn abhavat purA 5  krUro 'marSI sa duSTAtmA bhuvi prakhyAtavikramaH  nihatas tatra gandharvaiH pApakarmA nRzaMsavAn 6  tasmiMz ca nihate rAjan hInadarpo nirAzrayaH  bhaviSyati nirutsAho virATa iti me matiH 7  tatra yAtrA mama matA yadi te rocate 'nagha  kauravANAM ca sarveSAM karNasya ca mahAtmanaH 8  etat prAptam ahaM manye kAryam AtyayikaM hitam  rASTraM tasyAbhiyAtv Azu bahu dhAnyasamAkulam 9  AdadAmo 'sya ratnAni vividhAni vasUni ca  grAmAn rASTrANi vA tasya hariSyAmo vibhAgazaH 10  atha vA gosahasrANi bahUni ca zubhAni ca  vividhAni hariSyAmaH pratipIDya puraM balAt 11  kauravaiH saha saMgamya trigartaiz ca vizAM pate  gAs tasyApaharAmAzu saha sarvaiH susaMhatAH 12  saMdhiM vA tena kRtvA tu nibadhnImo 'sya pauruSam  hatvA cAsya camUM kRtsnAM vazam anvAnayAmahe 13  taM vaze nyAyataH kRtvA sukhaM vatsyAmahe vayam  bhavato balavRddhiz ca bhaviSyati na saMzayaH 14  tac chrutvA vacanaM tasya karNo rAjAnam abravIt  sUktaM suzarmaNA vAkyaM prAptakAlaM hitaM ca naH 15  tasmAt kSipraM viniryAmo yojayitvA varUthinIm  vibhajya cApy anIkAni yathA vA manyase 'nagha 16  prajJAvAn kuruvRddho 'yaM sarveSAM naH pitAmahaH  AcAryaz ca tathA droNaH kRpaH zAradvatas tathA 17  manyante te yathA sarve tathA yAtrA vidhIyatAm  saMmantrya cAzu gacchAmaH sAdhanArthaM mahIpateH 18  kiM ca naH pANDavaiH kAryaM hInArthabalapauruSaiH  atyarthaM vA pranaSTAs te prAptA vApi yamakSayam 19  yAmo rAjann anudvignA virATa viSayaM vayam  AdAsyAmo hi gAs tasya vividhAni vasUmi ca 20  tato duryodhano rAjA vAkyam AdAya tasya tat  vaikartanasya karNasya kSipram AjJApayat svayam 21  zAsane nityasaMyuktaM duHzAsanam anantaram  saha vRddhais tu saMmantrya kSipraM yojaya vAhinIm 22  yathoddezaM ca gacchAmaH sahitAH sarvakauravaiH  suzarmA tu yathoddiSTaM dezaM yAtu mahArathaH 23  trigartaiH sahito rAjA samagrabalavAhanaH  prAg eva hi susaMvIto matsyasya viSayaM prati 24  jaghanyato vayaM tatra yAsyAmo divasAntaram  viSayaM matsyarAjasya susamRddhaM susaMhatAH 25  te yAtvA sahasA tatra virATanagaraM prati  kSipraM gopAn samAsAdya gRhNantu vipulaM dhanam 26  gavAM zatasahasrANi zrImanti guNavanti ca  vayam api nigRhNImo dvidhAkRtvA varUthinIm 27  sa sma gatvA yathoddiSTAM dizaM vahner mahIpatiH  Adatta gAH suzarmAtha gharmapakSasya saptamIm 28  aparaM divasaM sarve rAjan saMbhUya kauravAH  aSTamyAM tAny agRhNanta gokulAni sahasrazaH   |

 

 1   [vai]  tatas teSAM mahArAja tatraivAmita tejasAm  chadma liGgapraviSTAnAM pANDavAnAM mahAtmanAm 2  vyatItaH samayaH samyag vasatAM vai purottame  kurvatAM tasya karmANi virATasya mahIpateH 3  tatas trayodazasyAnte tasya varSasya bhArata  suzarmaNA gRhItaM tu godhanaM tarasA bahu 4  tato javena mahatA gopAH puram athAvrajat  apazyan matsyarAjaM ca rathAt praskandya kuNDalI 5  zUraiH parivRtaM yodhaiH kuNDalAGgada dhAribhiH  sadbhiz ca mantribhiH sArdhaM pANDavaiz ca nararSabhaiH 6  taM sabhAyAM mahArAjam AsInaM rASTravardhanam  so 'bravId upasaMgamya virATaM praNatas tadA 7  asmAn yudhi vinirjitya paribhUya sa bAndhavAn  gavAM zatasahasrANi trigartAH kAlayanti te  tAn parIpsa manuSyendra mA nezuH pazavas tava 8  tac chrutvA nRpatiH senAM matsyAnAM samayojayat  rathanAgAzvakalilAM pattidhvajasamAkulAm 9  rAjAno rAjaputrAz ca tanutrANy atra bhejire  bhAnumanti vicitrANi sUpasevyAni bhAgazaH 10  savajrAyasa garbhaM tu kavacaM taptakAJcanam  virATasya priyo bhrAtA zatAnIko 'bhyahArayat 11  sarvapAra savaM varma kalyANa paTalaM dRDham  zatAnIkAd avarajo madirAzvo 'bhyahArayat 12  zatasUryaM zatAvartaM zatabindu zatAkSimat  abhedyakalpaM matsyAnAM rAjA kavacam Aharat 13  utsedhe yasya padmAni zataM saugandhikAni ca  suvarNapRSThaM sUryAbhaM sUryadattAbhyahArayat 14  dRDham Ayasa garbhaM tu zvetaM varma zatAkSimat  virATasya suto jyeSTho vIraH zaGkho 'bhyahArayat 15  zatazaz ca tanutrANi yathA svAni mahArathAH  yotsyamAnAbhyanahyanta devarUpAH prahAriNaH 16  sUpaskareSu zubhreSu mahatsu ca mahArathAH  pRthak kAJcanasaMnAhAn ratheSv azvAn ayojayan 17  sUryacandra pratIkAzo rathe divye hiraNmayaH  mahAnubhAvo matsyasya dhvaja ucchizriye tadA 18  athAnyAn vividhAkArAn dhvajAn hemavibhUSitAn  yathA svaM kSatriyAH zUrA ratheSu samayojayan 19  atha matsyo 'bravId rAjA zatAnIkaM jaghanyajam  kaGkaballava gopAlA dAma granthiz ca vIryavAn  yudhyeyur iti me buddhir vartate nAtra saMzayaH 20  eteSAm api dIyantAM rathA dhvajapatAkinaH  kavacAni vicitrANi dRDhAni ca mRdUni ca  pratimuJcantu gotreSu dIyantAm AyudhAni ca 21  vIrAGgarUpAH puruSA nAgarAjakaropamAH  neme jAtu na yudhyerann iti me dhIyate matiH 22  etac chrutvA tu nRpater vAkyaM tvaritamAnasaH  zatAnIkas tu pArthebhyo rathAn rAjan samAdizat  sahadevAya rAjJe ca bhImAya nakulAya ca 23  tAn prahRSTAs tataH sUtA rAjabhaktipuraskRtAH  nirdiSTAn naradevena rathAJ zIghram ayojayan 24  kavacAni vicitrANi dRDhAni ca mRdUni ca  virATaH prAdizad yAni teSAm akliSTakarmaNAm  tAny Amucya zarIreSu daMzitAs te paraMtapAH 25  tarasvinaz chinnarUpAH sarve yuddhavizAradAH  virATam anvayuH pazcAt sahitAH kurupuMgavAH  catvAro bhrAtaraH zUrAH pANDavAH satyavikramAH 26  bhImAz ca mattamAtaGgAH prabhinnakaraTA mukhAH  kSaranta iva jImUtAH sudantAH SaSTihAyanAH 27  svArUDhA yuddhakuzalaiH zikSitair hastisAdibhiH  rAjAnam anvayuH pazcAc calanta iva parvatAH 28  vizAradAnAM vazyAnAM hRSTAnAM cAnuyAyinAm  aSTau rathasaraHsrANi dazanAgazatAni ca  paSTiz cAzvasahasrANi matsyAnAm abhiniryayuH 29  tad anIkaM virATasya zuzubhe bharatarzabha  saMprayAtaM mahArAja ninISantaM gavAM padam 30  tad balAgryaM virATasya saMprasthitam azobhata  dRDhAyudha janAkIrNaM jagAzvarathasaMkulam   |

 

 1   [vai]  niryAya nagarAc chUrA vyUDhAnIkAH prahAriNaH  trigartAn aspRzan matsyAH sUrye pariNate sati 2  te trigartAz ca matsyAz ca saMrabdhA yuddhadurmadAH  anyonyam abhigarjanto goSu gRddhA mahAbalAH 3  bhImAz ca mattamAtaGgAs tomarAGkuzacoditAH  grAmaNIyaiH samArUDhAH kuzalair hastisAdibhiH 4  teSAM samAgamo ghoras tumulo lomaharSaNaH  devAsurasamo rAjann AsIt sUryevilambati 5  udatiSThad rajo bhaumaM na prajJAyata kiM cana  pakSiNaz cApatan bhUmau sainyena rajasAvRtAH 6  iSubhir vyatisaMyadbhir Adityo 'ntaradhIyata  khadyotair iva saMyuktam antarikSaM vyarAjata 7  rukmapRSThAni cApAni vyatiSaktAni dhanvinAm  patatAM lokavIrANAM savyadakSiNam asyatAm 8  rathA rathaiH samAjagmuH pAdAtaiz ca padAtayaH  sAdibhiH sAdinaz caiva gajaiz cApi mahAgajAH 9  asibhiH paTTizaiH prAsaiH zaktibhis tomarair api  saMrabdhAH samare rAjan nijaghnur itaretaram 10  nighnantaH samare 'nyonyaM zUrAH parighabAhavaH  na zekur abhisaMrabdhAH zUrAn kartuM parAGmukhAn 11  klRptottarauSThaM sunasaM klRpta kezam alaM kRtam  adRzyata ziraz chinnaM rajodhvastaM sakuNDalam 12  adRzyaMs tatra gAtrANi zaraiz chinnAni bhAgazaH  zAlaskandhanikAzAni kSatriyANAM mahAmRdhe 13  nAgabhoganikAzaiz ca bAhubhiz candanokSitaiH  AkIrNA vasudhA tatra ziro bhiz ca sakuNDalaiH 14  upazAmyad rajo bhaumaM rudhireNa prasarpatA  kazmalaM prAvizad ghoraM nirmaryAdam avartata 15  zatAnIkaH zataM hatvA vizAlAkSaz catuHzatam  praviSTau mahatIM senAM trigartAnAM mahArathau  ArcchetAM bahu saMrabdhau kezAkezi nakhAnakhi 16  lakSayitvA trigartAnAM tau praviSTau rathavrajam  jagmatuH sUryadattaz ca madirAzvaz ca pRSThataH 17  virATas tatra saMgrAme hatvA paJcazatAn rathAn  hayAnAM ca zatAny atra hatvA paJca mahArathAn 18  caran sa vividhAn mArgAn ratheSu rathayUthapaH  trigartAnAM suzarmANam Arcchad rukmarathaM raNe 19  tau vyAvaharatAM tatra mahAtmAnau mahAbalau  anyonyam abhigarjantau goSThe govRSabhAv iva 20  tato rathAbhyAM rathinau vyatiyAya samantataH  zarAn vyasRjatAM zIghraM toyadhArA ghanAv iva 21  anyonyaM cAtisaMrabdhau viceratur amarSaNau  kRtAstrau nizitair bANair asi zaktigadA bhRtau 22  tato rAjA suzarmANaM vivyAdha dazabhiH zaraiH  paJcabhiH paJcabhiz cAsya vivyAdha caturo hayAn 23  tathaiva matsyarAjAnaM suzarmA yuddhadurmadaH  paJcAzatA zitair bANair vivyAdha paramAstra vit 24  tataH sainyaM samAvRtya matsyarAjasuzarmaNoH  nAbhyajAnaMs tadAnyonyaM pradoSe rajasAvRte   |



 1   [vai]  tamasAbhiplute loke rajasA caiva bhArata  vyatiSThan vai muhUrtaM tu vyUDhAnIkAH prahAriNaH 2  tato 'ndhakAraM praNudann udatiSThata candramAH  kurvANo vimalAM rAtriM nandayan kSatriyAn yudhi 3  tataH prakAzam AsAdya punar yuddham avartata  ghorarUpaM tatas te sma nAvekSanta parasparam 4  tataH suzarmA traigartaH saha bhrAtrA yavIyasA  abhyadravan matsyarAjaM rathavrAtena sarvazaH 5  tato rathAbhyAM praskandya bhrAtarau kSatriya rSabhau  gadApANI susaMrabdhau samabhyadravatAM hayAn 6  tathaiva teSAM tu balAni tAni; kruddhAny athAnyonyam abhidravanti  gadAsikhaDgaiz ca parazvadhaiz ca; prAsaiz ca tIkSNAgrasupItadhAraiH 7  balaM tu matsyasya balena rAjA; sarvaM trigartAdhipatiH suzarmA  pramathya jitvA ca prasahya matsyaM; virATam ojasvinam abhyadhAvat 8  tau nihatya pRthag dhuryAv ubhau ca pArSNisArathI  virathaM matsyarAjAnaM jIvagrAham agRhNatAm 9  tam unmathya suzarmA tu rudatIM vadhukAm iva  syandanaM svaM samAropya prayayau zIghravAhanaH 10  tasmin gRhIte virathe virATe balavattare  prAdravanta bhayAn matsyAs trigartair arditA bhRzam 11  teSu saMtrAsyamAneSu kuntIputro yudhiSThiraH  abhyabhASan mahAbAhuM bhImasenam ariMdamam 12  matsyarAjaH parAmRSTas trigartena suzarmaNA  taM mokSaya mahAbAho na gacched dviSatAM vazam 13  uSitAH smaH sukhaM sarve sarvakAmaiH supUjitAH  bhImasena tvayA kAryA tasya vAsasya niSkRtiH 14   [bhImas]  aham enaM paritrAsye zAsanAt tava pArthiva  pazya me sumahat karma yudhyataH saha zatrubhiH 15  svabAhubalam Azritya tiSTha tvaM bhrAtRbhiH saha  ekAntam Azrito rAjan pazya me 'dya parAkramam 16  suskandho 'yaM mahAvRkSo gadA rUpa iva sthitaH  enam eva samArujya drAvayiSyAmi zAtravAn 17   [vai]  taM mattam iva mAtaGgaM vIkSamANaM vanaspatim  abravId bhrAtaraM vIraM dharmarAjo yudhiSThiraH 18  mA bhIma sAhasaM kArSIs tiSThatv eSa vanaspatiH  mA tvA vRkSeNa karmANi kurvANam ati mAnuSam  janAH samavabudhyeran bhImo 'yam iti bhArata 19  anyad evAyudhaM kiM cit pratipadyasva mAnuSam  cApaM vA yadi vA zaktiM nistriMzaM vA parazvadham 20  yad eva mAnuSaM bhIma bhaved anyair alakSitam  tad evAyudham AdAya mokSayAzu mahIpatim 21  yamau ca cakrarakSau te bhavitArau mahAbalau  vyUhataH samare tAta matsyarAjaM parIpsataH 22  tataH samastAs te sarve turagAn abhyacodayan  divyam astraM vikurvANAs trigartAn pratyamarSaNAH 23  tAn nivRttarathAn dRSTvA pANDavAn sA mahAcamUH  vairATI paramakruddhA yuyudhe paramAdbhutam 24  sahasraM nyavadhIt tatra kuntIputro yudhiSThiraH  bhImaH saptazatAn yodhAn paralokam adarzayat  nakulaz cApi saptaiva zatAni prAhiNoc charaiH 25  zatAni trINi zUrANAM sahadevaH pratApavAn  yudhiSThira samAdiSTo nijaghne puruSarSabhaH  bhittvA tAM mahatIMsenAM trigartAnAM nararSabha 26  tato yudhiSThiro rAjA tvaramANo mahArathaH  abhidrutya suSarmANaM zarair abhyatudad bhRzam 27  suzarmApi susaMkruddhas tvaramANo yudhiSThiram  avidhyan navabhir bANaiz caturbhiz caturo hayAn 28  tato rAjann Azu kArI kuntIputro vRkodaraH  samAsAdya suzarmANam azvAn asya vyapothayat 29  pRSThagopau ca tasyAtha hatvA paramasAyakaiH  athAsya sArathiM kruddho rathopasthAd apAharat 30  cakrarakSaz ca zUraz ca zoNAzvo nAma vizrutaH  sa bhayAd dvairathaM dRSTvA traigartaM prAjahat tadA 31  tato virATaH praskandya rathAd atha suzarmaNaH  gadAm asya parAmRzya tam evAjaghnivAn balI  sa cacAra gadApANir vRddho 'pi taruNo yathA 32  bhImas tu bhImasaMkAzo rathAt praskandya kuNDalI  trigartarAjam Adatta siMhakzudra mRgaM yathA 33  tasmin gRhIte virathe trigartAnAM mahArathe  abhajyata balaM sarvaM traigartaM tadbhayAturam 34  nivartya gAs tataH sarvAH pANDuputrA mahAbalAH  avajitya suzarmANaM dhanaM cAdAya sarvazaH 35  svabAhubalasaMpannA hrIniSedhA yatavratAH  saMgrAmaziraso madhye tAM rAtriM sukhino 'vasan 36  tato virATaH kaunteyAn ati mAnuSavikramAn  arcayAm Asa vittena mAnena ca mahArathAn 37   [virATa]  yathaiva mama ratnAni yuSmAkaM tAni vai tathA  kAryaM kuruta taiH sarve yathAkAmaM yathAsukham 38  dadAny alaM kRtAH kanyA vasUni vividhAni ca  manasaz cApy abhipretaM yad vaH zatrunibarhaNAH 39  yuSmAkaM vikramAd adya mukto 'haM svastimAn iha  tasmAd bhavanto matsyAnAm IzvarAH sarva eva hi 40   [vai]  tathAbhivAdinaM matsyaM kauraveyAH pRthak pRthak  UcuH prAJjalayaH sarve yudhiSThirapurogamAH 41  pratinandAma te vAkyaM sarvaM caiva vizAM pate  etenaiva pratItAH smo yat tvaM mukto 'dya zatrubhiH 42  athAbravIt prItamanA matsyarAjo yudhiSThiram  punar eva mahAbAhur virATo rAjasattamaH  ehi tvAm abhiSekSyAmi matsyarAjo 'stu no bhavAn 43  manasaz cApy abhipretaM yat te zatrunibarhaNa  tat te 'haM saMpradAsyAmi sarvam arhati no bhavAn 44  ratnAni gAH suvarNaM ca maNimuktam athApi vA  vaiyAghrapadya viprendra sarvathaiva namo 'stu te 45  tvatkRte hy adya pazyAmi rAjyam AtmAnam eva ca  yataz ca jAtaH saMrambhaH sa ca zatrur vazaMgataH 46  tato yudhiSThiro matsyaM punar evAbhyabhASata  pratinandAmi te vAkyaM mano jJaM matsyabhASase 47  AnRzaMsya paro nityaM susukhaH satataM bhava  gacchantu dUtAs tvaritaM nagaraM tava pArthiva  suhRdAM priyam AkhyAtuM ghoSayantu ca te jayam 48  tatas tad vacanAn matsyo dUtAn rAjA samAdizat  AcakSadhvaM puraM gatvA saMgrAme vijayaM mama 49  kumArAH samalaM kRtyaparyAgacchantu me purAt  vAditrANi ca sarvANi gaNikAz ca svalaM kRtAH 50  te gatvA kevalAM rAtrim atha sUryodayaM prati  virATasya purAbhyAze dUtA jayam aghoSayan   |



 1   [vai]  yAte trigartaM matsye tu pazUMs tAn svAn parIpsati  duryodhanaH sahAmAtyo virATam upayAd atha 2  bhISmo droNaz ca karNaz ca kRpaz ca paramAstra vit  drauNiz ca saubalaz caiva tathA duHkzAsanaH prabhuH 3  viviMzatir vikarNaz ca citrasenaz ca vIryavAn  durmukho duHsahaz caiva ye caivAnye marA rathAH 4  ete matsyAn upAgamya virATasya mahIpateH  ghoSAn vidrAvya tarasA godhanaM jahrur ojasA 5  SaSTiM gavAM sahasrANi kuravaH kAlayanti te  mahatA rathavaMzena parivArya samantataH 6  gopAlAnAM tu ghoSeSu hanyatAM tar mahArathaiH  ArAvaH sumahAn AsIt saMprahAre bhayaMkare 7  gavAdhyakSas tu saMtrasto ratham AsthAya sa tvaraH  jagAma nagarAyaiva parikrozaMs tadArtavat 8  sa pravizya puraM rAjJo nRpa vezmAbhyayAt tataH  avatIrya rathAt tUrNam AkhyAtuM praviveza ha 9  dRSTvA bhUmiMjayaM nAma putraM matsyasya mAninam  tasmai tat sarvam AcaSTa rASTrasya pazukarSaNam 10  SaSTiM gavAM sahasrANi kuravaH kAlayanti te  tad vijetuM samuttiSTha godhanaM rASTravardhanam 11  rAjaputra hitaprepsuH kSipraM niryAhi vai svayam  tvAM hi matsyo mahIpAlaH zUnyapAlam ihAkarot 12  tvayA pariSado madhye zlAghate sa narAdhipaH  putro mamAnurUpaz ca zUraz ceti kulodvahaH 13  iSvastre nipuNo yodhaH sadA vIraz ca me sutaH  tasya tat satyam evAstu manuSyendrasya bhASitam 14  Avartaya kurUJ jitvA pazUn pazumatAM vara  nirdahaiSAm anIkAni bhImena zaratejasA 15  dhanuzcyutai rukmapuGkhaiH zaraiH saMnataparvabhiH  dviSatAM bhindhy anIkAni gajAnAm iva yUthapaH 16  pAzopadhAnAM jyAtantrIM cApadaNDAM mahAsvanAm  zaravarNAM dhanur vINAM zatrumadhye pravAdaya 17  zvetA rajatasaMkAzA rathe yujyantu te hayAH  dhvajaM ca siMhaM sauvarNam ucchrayantu tavAbhibhoH 18  rukmapaGkhAH prasannAgrA muktA hastavatA tvayA  chAdayantu zarAH sUryaM rAjJAm Ayur nirodhinaH 19  raNe jitvA kurUn sarvAn varja pANir ivAsurAn  yazo mahad avApya tvaM pravizedaM puraM punaH 20  tvaM hi rASTrasya paramA gatir matsyapateH sutaH  gatimanto bhavantv adya sarve viSayavAsinaH 21  strImadhya uktas tenAsau tad vAkyam abhayaMkaram  antaHpure zlAghamAna idaM vacanam abravIt   |



 1   [uttara]  adyAham anugaccheyaM dRDhadhanvA gavAM padam  yadi me sArathiH kaz cid bhaved azveSu kovidaH 2  tam eva nAdhigacchAmi yo me yantA bhaven naraH  pazyadhvaM sAradhiM kSipraM mama yuktaM prayAsyataH 3  aSTAviMzati rAtraM vA mAsaM vA nUnam antataH  yat tad AsI mahad yuddhaM tatra me sArathir hataH 4  sa labheyaM yadi tv anyaM hara yAnavidaM naram  tvarAvAn adya yAtvAhaM samucchritamahAdhvajam 5  vigAhya tatparAnIkaM gajavAjir athAkulam  zastrapratApa nirvIryAn kurUJ jitvAnaye pazUn 6  duryodhanaM zAMtanavaM karNaM vaikartanaM kRpam  droNaM ca saha putreNa maheSvAsAn samAgatAn 7  vitrAsayitvA saMgrAme dAnavAn iva vajrabhRt  anenaiva muhUrtena punaH pratyAnaye pazUn 8  zUnyam AsAdya kuravaH prayAnty AdAya godhanam  kiM nu zakyaM mayA kartuM yad ahaM tatra nAbhavam 9  pazyeyur adya me vIryaM kuravas te samAgatAH  kiM nu pArtho 'rjunaH sAkSAd ayam asmAn prabAdhate 10   [vai]  tasya tad vacanaM strISu bhASataH sma punaH punaH  nAmarSayata pAJcAlI bIbhatsoH parikIrtanam 11  athainam upasaMgamya strImadhyAt sA tapasvinI  vrIDamAneva zanakair idaM vacanam abravIt 12  yo 'sau bRhad vAraNAbho yuvA supriya darzanaH  bRhannaDeti vikhyAtaH pArthasyAsIt sa sArathiH 13  dhanuSy anavaraz cAsIt tasya ziSyo mahAtmanaH  dRSTapUrvo mayA vIra carantyA pANDavAn prati 14  yadA tat pAvako dAvam adahat khANDavaM mahat  arjunasya tadAnena saMgRhItA hayottamAH 15  tena sArathinA pArthaH sarvabhUtAni sarvazaH  ajayat khANDava prasthe na hi yantAsti tAdRzaH 16  yeyaM kumArI suzroNI bhaginI te yavIyasI  asyAH sa vacanaM vIrakariSyati na saMzayaH 17  yadi vai sArathiH sa syAt kurUn sarvAn asaMzayam  jitvA gAz ca samAdAya dhruvam AgamanaM bhavet 18  evam uktaH sa sairandhyA bhaginIM pratyabhASata  gaccha tvam anavadyAGgi tAm Anaya bRhannaDAm 19  sA bhrAtrA preSitA zIghram agacchan nartanA gRham  yatrAste sa mahAbAhuz channaH satreNa pANDavaH   |



 1   [vai]  sa tAM dRSTvA vizAlAkSIM rAjaputrIM sakhIM sakhA  prahasann abravId rAjan kutrAgamanam ity uta 2  tam abravId rAjaputrI samupetya nararSabham  praNayaM bhAvayantI sma sakhImadhya idaM vacaH 3  gAvo rASTrasya kurubhiH kAlyante no bRhannaDe  tAn vijetuM mama bhrAtA prayAsyati dhanurdharaH 4  naciraM ca hatas tasya saMgrAme rathasArathiH  tena nAsti samaH sUto yo 'sya sArathyam Acaret 5  tasmai prayatamAnAya sArathyarthaM bRhannaDe  AcacakSe hayajJAne sairandhrI kauzalaM tava 6  sA sArathyaM mama bhrAtuH kuru sAdhu bRhannaDe  purA dUrataraM gAvo hriyante kurubhir hi naH 7  athaitad vacanaM me 'dya niyuktA na kariSyasi  praNayAd ucyamAnA tvaM parityakSyAmi jIvitam 8  evam uktas tu suzroNyA tayA sakhyA paraMtapaH  jagAma rAjaputrasya sakAzam amitaujasaH 9  taM sA vrajantaM tvaritaM prabhinnam iva kuJjaram  anvagacchad vizAlAkSI zizur gajavadhUr iva 10  dUrAd eva tu taM prekSya rAjaputrAbhyabhASata  tvayA sArathinA pArthaH khANDave 'gnim atarpayat 11  pRthivIm ajayat kRtsnAM kuntIputro dhanaMjayaH  sairandhrI tvAM samAcaSTa sA hi jAnAti pANDavAn 12  saMyaccha mAmakAn azvAMs tathaiva tvaM bRhannaDA  kurubhir yotsyamAnasya godhanAni parIpsataH 13  arjunasya kilAsIs tvaM sArathir dayitaH purA  tvayAjayat sahAyena pRthivIM pANDavarSabhaH 14  evam uktA pratyuvAca rAjaputraM bRhannaDA  kA zaktir mama sArathyaM kartuM saMgrAmamUrdhani 15  gItaM vA yadi vA nRttaM vAditraM vA pRthagvidham  tat kariSyAmi bhadraM te sArathyaM tu kuto mayi 16   [uttara]  bRhannaDe gAyano vA nartano vA punar bhava  kSipraM me ratham AsthAya nigRhNISva hayottamAn 17   [vai]  sa tatra narma saMyuktam akarot pANDavo bahu  uttarAyAH pramukhataH sarvaM jAnann ariMdama 18  Urdhvam utkSipya kavacaM zarIre pratyamuJcata  kumAryas tatra taM dRSTvA prAhasan pRthulocanAH 19  sa tu dRSTvA vimuhyantaM svayam evottaras tataH  kavacena mahArheNa samanahyad bRhannaDAm 20  sa bibhrat kavacaM cAgryaM svayam apy aMzumat prabham  dhvajaM ca siMham ucchritya sArathye samakalpayat 21  dhanUMSi ca mahArhANi bANAMz ca rucirAn bahUn  AdAya prayayau vIraH sa bRhannaDa sArathiH 22  athottarA ca kanyAz ca sakhyas tAm abruvaMs tadA  bRhannaDe AnayethA vAsAMsi rucirANi naH 23  pAJcAli kAryaM sUkSmANi citrANi vividhAni ca  vijitya saMgrAmagatAn bhISmadroNamukhAn kurUn 24  atha tA bruvatIH kanyAH sahitAH pANDunandanaH  pratyuvAca hasan pArtho meghadundubhi niHsvanaH 25  yady uttaro 'yaM saMgrAme vijeSyati mahArathAn  athAhariSye vAsAMsi divyAni rucirANi ca 26  evam uktvA tu bIbhatsus tataH prAcodayad dhayAn  kurUn abhimukhAJ zUro nAnA dhvajapatAkinaH   |

 

 1   [vai]  sa rAjadhAnyA niryAya vairATiH pRthivIM jayaH  prayAhIty abravIt sUtaM yatra te kuravo gatAH 2  samavetAn kurUn yAvaj jigIzUn avajitya vai  gAz caiSAM kSipram AdAya punar AyAmi svaM puram 3  tatas tAMz codayAm Asa sadazvAn pANDunandanaH  te hayA narasiMhena coditA vAtaraMhasaH  Alikhanta ivAkAzam UhuH kAJcanamAlinaH 4  nAtidUram atho yAtvA matsyaputra dhanaMjayau  avekSetAm amitraghnau kurUNAM balinAM balam  zmazAnam abhito gatvA AsasAda kurUn atha 5  tad anIkaM mahat teSAM vibabhau sAgarasvanam  sarpamANam ivAkAze vanaM bahula pAdapam 6  dadRze pArthivo reNur janitas tena sarpatA  dRSTipraNAzo bhUtAnAM divaspRz narasattama 7  tad anIkaM mahad dRSTvA jagAzvarathasaMkulam  karNaduryodhana kRpair guptaM zAMtanavena ca 8  droNena ca saputreNa maheSvAsena dhImatA  hRSTaromA bhayodvignaH pArthaM vairATir abravIt 9  notsahe kurubhir yoddhuM romaharSaM hi pazya me  bahu pravIram atyugraM devair api durAsadam  pratiyoddhuM na zakSyAmi kurusainyam anantakam 10  nAzaMse bhAratIM senAM praveSTuM bhImakArmukAm  rathanAgAzvakalilAM pattidhvajasamAkulAm  dRSTvaiva hi parAn AjAv AtmA pravyathatIva me 11  yatra droNaz ca bhISmaz ca kRpaH karNo viviMzatiH  azvatthAmA vikarNaz ca somadatto 'tha bAhlikaH 12  duryodhanas tathA vIro rAjA ca rathinAM varaH  dyutimanto maheSvAsAH sarve yuddhavizAradAH 13  dRSTvaiva hi kurUn etAn vyUDhAnIkAn prahAriNaH  hRSitAni ca romANI kazmalaM cAgataM mama 14   [vai]  aviyAto viyAtasya maurkhyAd dhUrtasya pazyataH  paridevayate mandaH sakAze savyasAcinaH 15  trigartAn sa pitA yAtaH zUnye saMpraNidhAya tAm  sarvAM senAm upAdAya na me santIha sainikAH 16  so 'ham eko bahUn bAlaH kRtAstrAn akRtazramaH  pratiyoddhuM na zakyAmi nivartasva bRhan naDe 17   [arj]  bhayena dInarUpo 'si dviSatAM harSavardhanaH  na ca tAvat kRtaM kiM cit paraiH karma raNAjire 18  svayam eva ca mAm Attha vaha mAM kauravAn prati  so 'haM tvAM tatra neSyAmi yatraite bahulA dhvajAH 19  madhyaMm AmiSa gRdhrANAM kurUNAm AtatAyinAm  neSyAmi tvAM mahAbAho pRthivyAm api yudhyatAm 20  tathA strISu pratizrutya pauruSaM puruSeSu ca  katthamAno 'bhiniryAya kimarthaM na yuyutsase 21  na ced vijitya gAs tAs tvaM gRhAn vai pratiyAsyasi  prahasiSyanti vIra tvAM narA nAryaz ca saMgatAH 22  aham apy atra sairandhryA stutaH sArathya karmaNi  na hi zakSyAmy anirjitya gAH prayAtuM puraM prati 23  stotreNa caiva sairandhryAs tava vAkyena tena ca  kathaM na yudhyeyam ahaM kurUn sarvAn sthiro bhava 24   [uttara]  kAmaM harantu matsyAnAM bhUyAMsaM kuravo dhanam  prahasantu ca mAM nAryo narA vApi bRhannaDe 25   [vai]  ity uktvA prAdravad bhIto rathAt praskandya kuNDalI  tyaktvA mAnaM sa mantAtmA visRjya sa zaraM dhanuH 26   [bRhan]  naiSa pUrvaiH smRto dharmaH kSatriyasya palAyanam  zreyas te maraNaM yuddhe na bhItasya palAyanam 27   [vai]  evam uktvA tu kaunteyaH so 'vaplutya rathottamAt  tam anvadhAvad dhAvantaM rAjaputraM dhanaMjayaH  dIrghAM veNIM vidhunvAnaH sAdhu rakte ca vAsasI 28  vidhUya veNIM dhAvantam ajAnanto 'rjunaM tadA  sainikAH prAhasan ke cit tathArUpam avekSya tam 29  taM zIghram abhidhAvantaM saMprekSya kuravo 'bruvan  ka eSa veSapracchanno bhasmaneva hutAzanaH 30  kiM cid asya yathA puMsaH kiM cid asya yathA striyaH  sArUpyam arjunasyeva klIba rUpaM bibharti ca 31  tad evaitac chiro grIvaM tau bAhU parighopamau  tadvad evAsya vikrAntaM nAyam anyo dhanaMjayAt 32  amareSv iva devendro mAnuSeSu dhanaMjayaH  ekaH so 'smAn upAyAyAd anyo loke dhanaMjayAt 33  ekaH putro virATasya zUnye saMnihitaH pure  sa eSa kila niryAto bAlabhAvAn na pauruSAt 34  satreNa nUnaM channaM hi carantaM pArtham arjunam  uttaraH sArathiM kRtvA niryAto nagarAd bahiH 35  sa no manye dhvajAn dRSTvA bhIta eSa palAyati  taM nUnam eSa dhAvantaM jighRkSati dhanaMjayaH 36  iti sma kuravaH sarve vimRzantaH pRthak pRthak  na ca vyavasituM kiM cid uttaraM zaknuvanti te  channaM tathA taM satreNa pANDavaM prekSya bhArata 37  uttaraM tu pradhAvantam anudrutya dhanaMjayaH  gatvA padazataM tUrNaM kezapakSe parAmRzat 38  so 'rjunena parAmRSTaH paryadevayad Artavat  bahulaM kRpaNaM caiva virATasya sutas tadA 39  zAtakumbhasya zuddhasya zataM niSkAn dadAmite  maNIn iSTau ca vaiDUryAn hemabaddhAn mahAprabhAn 40  hemadaNDapraticchannaM rathaM yuktaM ca suvrajaiH  mattAMz ca daza mAtaGgAn muJca mAM tvaM bRhaNNaDe 41   [vai]  evamAdIni vAkyAni vilapantam acetasam  prahasya puruSavyAghro rathasyAntikam Anayat 42  athainam abravIt pArtho bhayArtaM naSTacetasam  yadi notsahase yoddhuM zatrubhiH zatrukarzana  ehi me tvaM hayAn yaccha yudhyamAnasya zatrubhiH 43  prayAhy etad rathAnIkaM madbAhubalarakSitaH  apradhRSyatamaM ghoraM guptaM vIrair mahArathaiH 44  mA bhais tvaM rAjaputrAgrya kSatriyo 'si paraMtapa  ahaM vai kurubhir yotsyAmy avajeSyAmi te pazUn 45  pravizyaitad rathAnIkam apradhRSyaM durAsadam  yantA bhUs tvaM narazreSTha yotsye 'haM kurubhiH saha 46  evaM bruvANo bIbhatsur vairATim aparAjitaH  samAzvAsya muhUrtaM tam uttaraM bharatarSabha 47  tata enaM viceSTantam akAmaM bhayapIDitam  ratham AropayAm Asa pArthaH praharatAM varaH   |



 1   [vai]  taM dRSTvA klIva veSeNa rathasthaM narapuMgavam  zamIm abhimukhaM yAntaM ratham Aropya cottaram 2  bhISmadroNamukhAs tatra kurUNAM rathasattamAH  vitrastamanasaH sarve dhanaMjaya kRtAd bhayAt 3  tAn avekSya hatotsAhAn utpAtAn api cAdbhutAn  guruH zastrabhRtAM zreSTho bhAradvAjo 'bhyabhASata 4  calAz ca vAtAH saMvAnti rUkSAH paruSaniHsvanAH  bhasma varNaprakAzena tamasA saMvRtaM nabhaH 5  rUkSavarNAz ca jaladA dRzyante 'dbhutadarzanAH  niHsaranti ca kozebhyaH SastrANi vividhAni ca 6  zivAz ca vinadanty etA dIptAyAM dizi dAruNAH  hayAz cAzrUNi muJcanti dhvajAH kampanty akampitAH 7  yAdRzAny atra rUpANi saMdRzyante bahUny api  yattA bhavantas tiSThantu syAd yuddhaM samupasthitam 8  rakSadhvam api cAtmAnaM vyUhadhvaM vAhinIm api  vaizasaM ca pratIkSadhvaM rakSadhvaM cApi godhanam 9  eSa vIro maheSvAsaH sarvazastrabhRtAM varaH  AgataH klIba veSeNa pArtho nAsty atra saMzayaH 10  sa eSa pArtho vikrAntaH savyasAcI paraMtapaH  nAyuddhena nivarteta sarvair api marudgaNaiH 11  klezitaz ca vane zUro vAsavena ca zikSitaH  amarSavazam Apanno yotsyate nAtra saMzayaH 12  nehAsya pratiyoddhAram ahaM pazyAmi kauravAH  mahAdevo 'pi pArthena zrUyate yudhi toSitaH 13   [karNa]  sadA bhavAn phalgunasya guNair asmAn vikatthase  na cArjunaH kalA pUrNA mama duryodhanasya vA 14   [dur]  yady eSa pArtho rAdheya kRtaM kAryaM bhaven mama  jJAtAH punaz cariSyanti dvAdazAnyAn hi vatsarAn 15  athaiSa kaz cid evAnyaH klIba veSeNa mAnavaH  zarair enaM sunizitaiH pAtayiSyAmi bhUtale 16   [vai]  tasmin bruvati tad vAkyaM dhArtarASTre paraMtape  bhISmo droNaH kRpo drauNiH pauruSaM tad apUjayan   |



1   [vai]  tAM zamIm upasaMgamya pArtho vairATim abravIt  sukumAraM samAjJAtaM saMgrAme nAtikovidam 2  samAdiSTo mayA kSipraM dhanUMSy avaharottara  nemAni hi tvadIyAni soDhuM zakyanti me balam 3  bhAraM vApi guruM hartuM kuJjaraM vA pramarditum  mama vA bAhuvikSepaM zatrUn iha vijeSyataH 4  tasmAd bhUmiMjayAroha zamIm etAM palAzinIm  asyAM hi pANDuputrANAM dhanUMSi nihitAny uta 5  yuthiSThirasya bhImasya bIbhatSor yamayos tathA  dhvajAH zarAz ca zUrANAM divyAni kavacAni ca 6  atra caitan mahAvIryaM dhanuH pArthasya gANDivam  ekaM zatasahasreNa saMmitaM rASTravardhanam 7  vyAyAmasaham atyarthaM tRNarAjasamaM mahat  sarvAyudhamahAmAtraM zatrusaMbAdha kArakam 8  suvarNavikRtaM divyaM zlakSNam Ayatam avraNam  alaM bhAraM guruM voDhuM dAruNaM cArudarzanam  tAdRzAny eva sarvANi balavanti dRDhAni ca 9   [uttara]  asmin vRkSe kilodbaddhaM zarIram iti naH zrutam  tad ahaM rAjaputraH san spRzeyaM pANinA katham 10  naivaMvidhaM mayA yuktam AlabdhuM kSatrayoninA  mahatA rAjaputreNa mantrayajJavidA satA 11  spRSTavantaM zarIraM mAM zavavAham ivAzucim  kathaM vA vyavahAryaM vai kurvIthAs tvaM bRhannaDe 12   [bRhan]  vyavahAryaz ca rAjendra zuciz caiva bhaviSyasi  dhanUMSy etAni mAM bhais tvaM zarIraM nAtra vidyate 13  dAyAdaM matsyarAjasya kule jAtaM manasvinam  kathaM tvA ninditaM karma kArayeyaM nRpAtmaja 14   [vai]  evam uktaH sa pArthena rathAt praskandya kuNDalI  Aruroha zamI vRkSaM vairATir avazas tadA 15  tam anvazAsac chatrughno rathe tiSThan dhanaMjayaH  pariveSTanam eteSAM kSipraM caiva vyapAnuda 16  tathA saMnahanAny eSAM parimucya samantataH  apazyad gANDivaM tatra caturbhir aparaiH saha 17  teSAM vimucyamAnAnAM dhanur Am arkavarcasAm  vinizreruH prabhA divyA grahANAm udayeSv iva 18  sa teSAM rUpam Alokya bhoginAm iva jRmbhatAm  hRSTaromA bhayodvignaH kSaNena samapadyata 19  saMspRzya tAni cApAni bhAnumanti bRhanti ca  vairATir arjunaM rAjann idaM vacanam abravIt 20   [uttara]  bindavo jAtarUpasya zataM yasmin nipAtitAH  sahasrakoTi sauvarNAH kasyaitad dhanur uttamam 21  vAraNA yasya sauvarNAH pRSThe bhAsanti daMzitAH  supArzvaM sugrahaM caiva kasyaitad dhanuruttamam 22  tapanIyasya zuddhasya SaSTir yasyendragopakAH  pRSThe vibhaktAH zobhante kasyaitad dhanur uttamam 23  sUryA yatra ca sauvarNAs trayo bhAsanti daMzitAH  tejasA prajvalanto hi kasyaitad dhanur uttamam 24  zAlabhA yatra sauvarNAs tapanIyavicitritAH  suvarNamaNicitraM ca kasyaitad dhanur uttamam 25  ime ca kasya nArAcAH sahasrA lomavAhinaH  samantAt kaladhautAgrA upAsaMge hiraNmaye 26  vipAThAH pRthavaH kasya gArdhrapatrAH zilAzitAH  hAridravarNAH sunasAH pItAH sarvAyasAH zarAH 27  kasyAyam asitAvApaH paJca zArdUlalakSaNaH  varAhakarNa vyAmizraH zarAn dhArayate daza 28  kasyeme pRthavo dIrghAH sarvapArazavAH zarAH  zatAnisapta tiSThanti nArAcA rudhirAzanAH 29  kasyeme zukapatrAbhaiH pUrvair ardhaiH suvAsasaH  uttarair AyasaiH pItair hemapuGkhaiH zilAzitaiH 30  kasyAyaM sAyako dIrghaH zilI pRSThaH zilImukhaH  vaiyAghrakoze nihito hemacitratsarur mahAn 31  suphalaz citrakozaz ca kiGkiNI sAyako mahAn  kasya hematsarur divyaH khaDgaH paramanirvraNaH 32  kasyAyaM vimalaH khaDgo gavye koze samarpitaH  hematsarur anAdhRSyo naiSadhyo bhArasAdhanaH 33  kasya pAJca nakhe koze sAyako hemavigrahaH  pramANa rUpasaMpannaH pIta AkAzasaMnibhaH 34  kasya hemamaye koze sutapte pAvakaprabhe  nistriMzo 'yaM guruH pItaH saikyaH paramanirvraNaH 35  nirdizasva yathAtattvaM mayA pRSTA bRhannaDe  vismayo me paro jAto dRSTvA sarvam idaM mahat 36   [bRhan]  yan mAM pUrvam ihApRcchaH zatrusenAnibarhaNam  gANDIvam etat pArthasya lokeSu viditaM dhanuH 37  sarvAyudhamahAmAtraM zAtakumbhapariSkRtam  etat tad arjunasyAsId gANDIvaM paramAyudham 38  yat tac chatasahasreNa saMmitaM rASTravardhanam  yena devAn manuSyAMz ca pArtho viSahate mRdhe 39  devadAnavagandharvaiH pUjitaM zAzvatIH samAH  etad varSasahasraM tu brahmA pUrvam adhArayat 40  tato 'nantaram evAtha prajApatir adhArayat  trINi paJcazataM caiva zakro 'zIti ca paJca ca 41  somaH paJcazataM rAjA tathaiva varuNaH zatam  pArthaH paJca ca SaSTiM ca varSANi zvetavAhanaH 42  mahAvIryaM mahad divyam etat tad dhanur uttamam  pUjitaM suramartyeSu bibharti paramaM vapuH 43  supArzvaM bhImasenasya jAtarUpagrahaM dhanuH  yena pArtho 'jayat kRtsnAM dizaM prAcIM paraMtapaH 44  indragopaka citraM ca yad etac cAru vigraham  rAjJo yudhiSThirasyaitad vairAte dhanur uttamam 45  sUryA yasmiMs tu sauvarNAH prabhAsante prabhAsinaH  tejasA prajvalanto vai nakulasyaitad Ayudham 46  zalabhA yatra sauvarNAs tapanIyavicitritAH  etan mAdrI sutasyApi sahadevasya kArmukam 47  ye tv ime kSura saMkAzAH sahasrA lomavAhinaH  etArjunasya vairAte zarAH sarpaviSopamAH 48  ete jvalantaH saMgrAme tejasA zIghragAminaH  bhavanti vIrasyAkSayyA vyUhataH samare ripUn 49  ye ceme pRthavo dIrghAz candra bimbArdha darzanAH  ete bhImasya nizitA ripukSayakarAH zarAH 50  hAridra varNA ye tv ete hemapuGkhAH zilAzitAH  nakulasya kalApo 'yaM paJca zArdUlalakSaNaH 51  yenAsau vyajayat kRtsnAM pratIcIM dizam Ahave  kalApo hy eSa tasyAsIn mAdrIputrasya dhImataH 52  ye tv ime bhAskarAkArAH sarvapArazavAH zarAH  ete citrAH kriyopetAH sahadevasya dhImataH 53  ye tv ime nizitAH pItAH pRthavo dIrghavAsasaH  hemapuGkhAs triparvANo rAjJa ete mahAzarAH 54  yas tvAyaM sAyako dIrghaH zilI pRSTaH zilImukhaH  arjunasyaiSa saMgrAme gurubhArasaho dRDhaH 55  vaiyAghrakozas tu mahAn bhImasenasya sAyakaH  gurubhArasaho vidyaH zAtravANAM bhayaMkaraH 56  suphalaz citrakozaz ca hematsarur anuttamaH  nistriMzaH kauravasyaiSa dharmarAjasya dhImataH 57  yas tu pAJca nakhe koze nihitaz citrasevane  nalukasyaiSa nistriMzo gurubhArasaho dRDhaH 58  yas tv ayaM vimalaH khaDgo gavye koze samarpitaH  sahadevasya viddhy enaM sarvabhAra sahaM dRDham   |

 

 1   [uttara]  suvarNavikRtAnImAny AyudhAni mahAtmanAm  rucirANi prakAzante pArthAnAm Azu kAriNAm 2  kva nu svid arjunaH pArthaH pauravyo vA yudhiSThiraH  nakulaH sahadevaz ca bhImasenaz ca pANDavaH 3  sarva eva mahAtmAnaH sarvAmitra vinAzanAH  rAjyam akSaiH parAkIrya na zrUyante kadA cana 4  draupadI kva ca pAJcAlI strIratnam iti vizrutA  jitAn akSais tadA kRSNA tAn evAnvagamad vanam 5   [arj]  aham asmy arjunaH pArthaH sabhAstAro yudhiSThiraH  ballavo bhImasenas tu pitus te rasapAcakaH 6  azvabandho 'tha nakulaH sahadevas tu gokule  sairandhIM draupadIM viddhi yatkRte kIcakA hatAH 7   [uttara]  daza pArthasya nAmAni yAni pUrvaM zrutAni me  prabrUyAs tAni yadi me zraddadhyAM sarvam eva te 8   [arj]  hanta te 'haM samAcakSe daza nAmAni yAni me  arjunaH phalguno jiSNuH kirITI zvetavAhanaH  bIbhatsur vijayaH kRSNaH savyasAcI dhanaMjayaH 9   [uttara]  kenAsi vijayo nAma kenAsi zvetavAhanaH  kirITI nAma kenAsi savyasAcI kathaM bhavAn 10  arjunaH phalguno jiSNuH kRSNo bIbhatsur eva ca  dhanaMjayaz ca kenAsi prabrUhi mama tattvataH  zrutA me tasya vIrasya kevalA nAma hetavaH 11   [arj]  sarvAJ janapadAJ jitvA vittam Acchidya kevalam  madhye dhanasya tiSThAmi tenAhur mAM dhanaMjayam 12  abhiprayAmi saMgrAme yad ahaM yuddhadurmadA  nAjitvA vinivartAmi tena mAM vijayaM viduH 13  zvetAH kAJcanasaMnAhA rathe yujyanti me hayAH  saMgrAme yudhyamAnasya tenAhaM zvetavAhanaH 14  uttarAbhyAM ca pUrvAbhyAM phalgunIbhyAm ahaM divA  jAto himavataH pRSThe tena mAM phalgunaM viduH 15  purA zakreNa me dattaM yudhyato dAnavarSabhaiH  kirITaM mUrdhni sUryAbhaM tena mAhuH kirITinam 16  na kuryAM karma bIbhatsaM yudhyamAnaH kathaM cana  tena devamanuSyeSu bIbhatsur iti mAM viduH 17  ubhau me dakSiNau pANI gANDIvasya vikarSaNe  tena devamanuSyeSu savyasAcIti mAM viduH 18  pRthivyAM caturantAyAM varNo me durlabhaH samaH  karomi karma zulkaM ca tena mAm arjunaM viduH 19  ahaM durApo durdharSo damanaH pAkazAsaniH  tena devamanuSyeSu jiSNu nAmAsmi vizrutaH 20  kRSNa ity eva dazamaM nAma cakre pitA mama  kRSNAvadAtasya sataH priyatvAd bAlakasya vai 21   [vai]  tataH pArthaM sa vairATir abhyavAdayad antikAt  ahaM bhUmiM jayo nAma nAmnAham api cottaraH 22  diSTyA tvAM pArtha pazyAmi svAgataM te dhanaMjaya  lohitAkSa mahAbAho nAgarAjakaropama  yad ajJAnAd avocaM tvAM kSantum arhasi tan mama 23  yatas tvayA kRtaM pUrvaM vicitraM karma duSkaram  ato bhayaM vyatItaM me prItiz ca paramA tvayi   |

 

 1   [uttara]  AsthAya vipulaM vIra rathaM sArathinA mayA  katamaM yAsyase 'nIkam ukto yAsyAmy ahaM tvayA 2   [arj]  prIto 'smi puruSavyAghra na bhayaM vidyate tava  sarvAn nudAmi te zatrUn raNe raNavizArada 3  svastho bhava mahAbuddhe pazya mAM zatrubhiH saha  yudhyamAnaM vimarde 'smin kurvANaM bhairavaM mahat 4  etAn sarvAn upAsaGgAn kSipraM badhnIhi me rathe  etaM cAhara nistriMzaM jAtarUpapariSkRtam  ahaM vai kurubhir yotsyAmy avajeSyAmi te pazUn 5  saMkalpapakSa vikSepaM bAhuprAkAratoraNam  tridaNDatUNa saMbAdham anekadhvajasaMkulam 6  jyA kSepaNaM krodhakRtaM nemI ninadadundubhiH  nagaraM te mayA guptaM rathopasthaM bhaviSyati 7  adhiSThito mayA saMkhye ratho gANDIvadhanvanA  ajeyaH zatrusainyAnAM vairATe vyetu te bhayam 8   [uttara]  bibhemi nAham eteSAM jAnAmi tvAM sthiraM yudhi  kezavenApi saMgrAme sAkSAd indreNa vA samam 9  idaM tu cintayann eva parimuhyAmi kevalam  nizcayaM cApi durmedhA na gacchAmi kathaM cana 10  evaM vIrAGgarUpasya lakSaNair ucitasya ca  kena karma vipAkena klIbatvam idam Agatam 11  manye tvAM klIba veSeNa carantaM zUlapANinam  gandharvarAjapratimaM devaM vApi zatakratum 12   [arj]  bhrAtur niyogAj jyeSThasya saMvatsaram idaM vratam  carAmi brahmacaryaM vai satyam etad bravImi te 13  nAsmi klIbo mahAbAho paravAn dharmasaMyutaH  samAptavratam uttIrNaM viddhi mAM tvaM nRpAtmaja 14   [uttara]  paramo 'nugraho me 'dya yat pratarko na me vRthA  na hIdRzAH klIba rUpA bhavantIha narottamAH 15  sahAyavAn asmi raNe yudhyeyam amarair api  sAdhvasaM tat pranaSTaM me kiM karomi bravIhi me 16  ahaM te saMgrahISyAmi hayAJ zatrurathArujaH  zikSito hy asmi sArathye tIrthataH puruSarSabha 17  dAruko vAsudevasya yathA zakrasya mAtaliH  tathA mAM viddhi sArathye zikSitaM narapuMgava 18  yasya yAte na pazyanti bhUmau prAptaM padaM padam  dakSiNaM yo dhuraM yuktaH sugrIva sadRzo hayaH 19  yo 'yaM dhuraM dhuryavaro vAmaM vahati zobhanaH  taM manye meghapuSpasya javena sadRzaM hayam 20  yo 'yaM kAJcanasaMnAhaH pArSNiM vahati zobhanaH  vAmaM sainyasya manye taM javena balavattaram 21  yo 'yaM vahati te pArSNiM dakSiNAm aJcitodyataH  balAhakAd api mataH sa jave vIryavattaraH 22  tvAm evAyaM ratho voDhuM saMgrAme 'rhati dhanvinam  tvaM cemaM ratham AsthAya yoddhum arho mato mama 23   [vai]  tato nirmucya bAhubhyAM valayAni sa vIryavAn  citre dundubhisaMnAde pratyamuJcat tale zubhe 24  kRSNAn bhaGgImataH kezAJ zvetenodgrathya vAsasA  adhijyaM tarasA kRtvA gANDIvaM vyAkSipad dhanuH 25  tasya vikSipyamANasya dhanuSo 'bhUn mahAsvanaH  yathA zailasya mahataH zailenaivAbhijaghnur aH 26  sa nirghatAbhavad bhUmir dikSu vAyur vavau bhRzam  bhrAntadvijaM khaM tadAsIt prakampitamahAdrumam 27  taM zabdaM kuravo 'jAnan visphoDam azaner iva  yad arjuno dhanuHzreSThaM bAhubhyAm AkSipad rathe   |


  1   [vai]  uttaraM sArathiM kRtvA zamIM kRtvA pradakSiNam  AyudhaM sarvam AdAya tataH prAyAd dhanaMjayaH 2  dhvajaM siMhaM rathAt tasmAd apanIya mahArathaH  praNidhAya zamI mUle prAyAd uttarasArathiH 3  daivIM mAyAM rathe yuktvA vihitAM vizvakarmaNA  kAJcanaM siMhalAGgUlaM dhvajaM vAnaralakSaNam 4  manasA cintayAm Asa prasAdaM pAvakasya ca  sa ca tac cintitaM jJAtvA dhvaje bhUtAny acodayat 5  sa patAkaM vicitrAGgaM sopAsaGgaM mahArathaH  ratham AsthAya bIbhatsuH kaunteyaH zvetavAhanaH 6  badhAsiH sa tanutrANaH pragRhItazarAsanaH  tataH prAyAd udIcIM sa kapipravara ketanaH 7  svanavantaM mahAzaGkhaM balavAn arimardanaH  prAdhamad balam AsthAya dviSatAM lomaharSaNam 8  tata te javanA dhuryA jAnubhyAm agaman mahIm  uttaraz cApi saMtrasto rathopastha upAvizat 9  saMsthApya cAzvAn kaunteyaH samudyamya ca razmibhiH  uttaraM ca pariSvajya samAzvAsayad arjunaH 10  mA bhais tvaM rAjaputrAgrya kSatriyo 'si paraMtapa  kathaM puruSazArdUla zatrumadhye viSIdasi 11  zrutAs te zaGkhazabdAz ca bherIzabdAz ca puSkalAH  kuJjarANAM ca nadatAM vyUDhAnIkeSu tiSThatAm 12  sa tvaM katham ihAnena zaGkhazabdena bhISitaH  viSaNNarUpo vitrastaH puruSaH prAkRto yathA 13   [uttara]  zrutA me zaGkhazabdAz ca bherIzabdAz ca puSkalAH  kuJjarANAM ca ninadA vyUDhAnIkeSu tiSThatAm 14  naivaMvidhaH zaGkhazabdaH purA jAtu mayA zrutaH  dhvajasya cApi rUpaM me dRSTapUrvaM na hIdRzam  dhanur az caiva nirghoSaH zrutapUrvo na me kva cit 15  asya zaGkhasya zabdena dhanuSo nisvanena ca  rathasya ca ninAdena mano muhyati me bhRzam 16  vyAkulAz ca dizaH sarvA hRdayaM vyathatIva me  dhvajena pihitAH sarvA dizo na pratibhAnti me  gANDIvasya ca zabdena kauNau me badhirI kRtau 17   [arj]  ekAnte ratham AsthAya padbhyAM tvam avapIDaya  dRDhaM ca razmIn saMyaccha zaGkhaM dhmAsyAmy ahaM punaH 18   [vai]  tasya zaGkhasya zabdena rathanemi svanena ca  gANDIvasya ca ghoSeNa pRthivIsamakampata 19   [droNa]  yathA rathasya nirghoSo yathA zaGkha udIryate  kampate ca yathA bhUmir naiSo 'nyaH savyasAcinaH 20  zastrANi na prakAzante na prahRSyanti vAjinaH  agnayaz ca na bhAsante samiddhAs tan na zobhanam 21  praty AdityaM ca naH sarve mRgA ghorapravAdinaH  dhvajeSu ca nilIyante vAyasAs tan na zobhanam  zakunAz cApasavyA no vedayanti mahad bhayam 22  gomAyur eSa senAyA ruvan madhye 'nudhAvati  anAhataz ca niSkrAnto mahad vedayate bhayam  bhavatAM romakUpANi prahRSTAny upalakSaye 23  parAbhUtA ca vaH senA na kaz cid yoddhum icchati  vivarNamukha bhUyiSThAH sarve yoghA vicetasaH  gAH saMprasthApya tiSThAmo vyUDhAnIkAH prahAriNaH   |

 

 1   [vai]  atha duryodhano rAjA samare bhISmam abravIt  droNaM ca rathazArdUlaM kRkpaM ca sumahAratham 2  ukto 'yam artha AcAryo mayA karNena cAsakRt  punar eva ca vakSyAmi na hi tRpyAmi taM bruvan 3  parAjitair hi vastavyaM taiz ca dvAdaza vatsarAn  vane janapade 'jJAtair eSa eva paNo hi naH 4  teSAM na tAvan nirvRttaM vartate tu trayodazam  ajJAtavAsaM bIbhatsur athAsmAbhiH samAgataH 5  anivRtte tu nirvAse yadi bIbhatsur AgataH  punar dvAdaza varSANi vane vatsyanti pANDavAH 6  lobhAd vA te na jAnIyur asmAn vA moha Avizat  hInAtiriktam eteSAM bhISmo veditum arhati 7  arthAnAM tu punar dvaidhe nityaM bhavati saMzayaH  anyathA cintito hy arthaH punar bhavati cAnyathA 8  uttaraM mArgamANAnAM matsyasenAM yuyutsatAm  yadi bIbhatsur AyAtas teSAM kaH syAt parAGmukhaH 9  trigartAnAM vayaM hetor matsyAn yoddhum ihAgatAH  matsyAnAM viprakArAMs te bahUn asmAn akIrtayan 10  teSAM bhayAbhipannAnAM tad asmAbhiH pratizrutam  prathamaM tair grahItavyaM matsyAnAM godhanaM mahat 11  saptamIm aparAhNe vai tathA nas taiH samAhitam  aSTamyAM punar asmAbhir AdityasyodayaM prati 12  te vA gAvo na pazyanti yadi va syuH parAjitAH  asmAn vApy atisaMdhAya kuryur matsyena saMgatam 13  atha vA tAn upAyAto matsyo jAnapadaiH saha  sarvayA senayA sArdham asmAn yoddhum upAgataH 14  teSAm eva mahAvIryaH kaz cid eva puraHsaraH  asmAJ jetum ihAyAto matsyo vApi svayaM bhavet 15  yady eSa rAjA matsyAnAM yadi bIbhatsur AgataH  sarvair yoddhavyam asmAbhir iti naH samayaH kRtaH 16  atha kasmAt sthitA hy ete ratheSu rathasattamAH  bhISmo droNaH kRpaz caiva vikarNo drauNir eva ca 17  saMbhrAntamanasaH sarve kAle hy asmin mahArathAH  nAnyatra yuddhAc chreyo 'sti tathAtmA praNidhIyatAm 18  Acchinne godhane 'smAkam api devena varjiNA  yamena vApi saMgrAme ko hAstinapuraM vrajet 19  zarair abhipraNunnAnAM bhagnAnAM gahane vane  ko hi jIvet padAtInAM bhaved azveSu saMzayaH  AcAryaM pRSThataH kRtvA tathA nItir vidhIyatAm 20  jAnAti hi mataM teSAm atas trAsayatIva naH  arjunenAsya saMprItim adhikAm upalakSaye 21  tathA hi dRSTvA bIbhatsum upAyAntaM prazaMsati  yathA senA na bhajyeta tathA nItir vidhIyatAm 22  adezikA mahAraNye grISme zatruvazaM gatA  yathA na vibhramet senA tathA nItir vidhIyatAm 23  azvAnAM heSitaM zrutvA kA prazaMsA bhavet pare  sthAne vApi vrajanto vA sadA heSanti vAjinaH 24  sadA ca vAyavo vAnti nityaM varSati vAsavaH  stanayitnoz ca nirghoSaH zrUyate bahuzas tathA 25  kim atra kAryaM pArthasya kathaM vA sa prazasyate  anyatra kAmAd dveSAd vA roSAd vAsmAsu kevalAt 26  AcAryA vai kAruNikAH prAjJAz cApAya darzinaH  naite mahAbhaye prApte saMpraSTavyAH kathaM cana 27  prAsAdeSu vicitreSu goSThISv AvasatheSu ca  kathA vicitrAH kurvANAH piNDitAs tatra zobhanAH 28  bahUny AzcaryarUpANi kurvanto janasaMsadi  iSvastre cAru saMdhAne paNDitAs tatra zobhanAH 29  pareSAM vivara jJAne manuSyAcariteSu ca  annasaMskAra doSeSu paNDitAs tatra zobhanAH 30  paNDitAn pRSThataH kRtvA pareSAM guNavAdinaH  vidhIyatAM tathA nItir yatha vadhyeta vai paraH 31  gAvaz caiva pratiSThantAM senAM vyUhantu mAciram  ArakSAz ca vidhIyantAM yatra yotsyAmahe parAn   |



 1   [karNa]  sarvAn AyuSmato bhItAn saMtrastAn iva lakSaye  ayuddhamanasaz caiva sarvAMz caivAnavasthitAn 2  yady eSa rAjA matsyAnAM yadi bIbhatsur AgataH  aham AvArayiSyAmi veleva makarAlayam 3  mama cApapramuktAnAM zarANAM nataparvaNAm  nAvRttir gacchatAm asti sarpANAm iva sarpatAm 4  rukmapuGkhAH sutIkSNAgrA muktA hastavatA mayA  chAdayantu zarAH pArthaM zalabhA iva pAdapam 5  zarANAM puGkhasaktAnAM maurvyAbhihatayA dRDham  zrUyatAM talayoH zabdo bheryor Ahatayor iva 6  samAhito hi bIbhatsur varSANy aSTau ca paJca ca  jAtasnehaz ca yuddhasya mayi saMprahariSyati 7  pAtrI bhUtaz ca kaunteyo brAhmaNo guNavAn iva  zaraughAn pratigRhNAtu mayA muktAn sahasrazaH 8  eSa caiva maheSvAsas triSu lokeSu vizrutaH  ahaM cApi kuruzreSThA arjunAn nAvaraH kva cit 9  itaz cetaz ca nirmuktaiH kAJcanair gArdhravAjitaiH  dRzyatAm adya vai vyoma khadyotair iva saMvRtam 10  adyAham RNam akSayyaM purA vAcA pratizrutam  dhArtarASTrasya dAsyAmi nihatya samare 'rjunam 11  antarA chidyamAnAnAM puGkhAnAM vyatizIryatAm  zalabhAnAm ivAkAze pracAraH saMpradRzyatAm 12  indrAzanisamasparzaM mahendrasamatejasam  ardayiSyAmy ahaM pArtham ulkAbhir iva kuJjaram 13  tam agnim iva durdharSam asi zaktizarendhanam  pANDavAgnim ahaM dIptaM pradahantam ivAhitAn 14  ava vegapuro vAto rathaughastanayitnumAn  zaradhAro mahAmeghaH zamayiSyAmi pANDavam 15  matkArmukavinirmuktAH pArtham AzIviSopamAH  zarAH samabhisarpantu valmIkam iva pannagAH 16  jAmadagnyAn mayA hy astraM yat prAptam RSisattamAt  tad upAzritya vIryaM ca yudhyeyam api vAsavam 17  dhvajAgre vAnaras tiSThan bhallena nihato mayA  adyaiva patatAM bhUmau vinadan bhairavAn ravAn 18  zatror mayAbhipannAnAM bhUtAnAM dhvajavAsinAm  dizaH pratiSThamAnAnAm astu zabdo divaM gataH 19  adya duryodhanasyAhaM zalyaM hRdi cirasthitam  sa mUlam uddhariSyAmi bIbhatsuM pAtayan rathAt 20  hatAzvaM virathaM pArthaM pauruSe paryavasthitam  niHzvasantaM yathA nAgam adya pazyantu kauravAH 21  kAmaM gacchantu kuravo dhanam AdAya kevalam  ratheSu vApi tiSThanto yuddhaM pazyantu mAmakam   |



 1   [kRpa]  sadaiva tava rAdheya yuddhe krUratarA matiH  nArthAnAM prakRtiM vettha nAnubandham avekSase 2  nayA hi bahavaH santi zAstrANy Azritya cintitAH  teSAM yuddhaM tu pApiSThaM vedayanti purA vidaH 3  dezakAlena saMyuktaM yuddhaM vijayadaM bhavet  hInakAlaM tad eveha phalavan na bhavaty uta  deze kAle ca vikrAntaM kalyANAya vidhIyate 4  AnukUlyena kAryANAm antaraM saMvidhIyatAm  bhAraM hi rathakArasya na vyavasyanti paNDitAH 5  paricintya tu pArthena saMnipAto na naH kSamaH  ekaH kurUn abhyarakSad ekaz cAgnim atarpayat 6  ekaz ca paJcavarSANi brahmacaryam adhArayat  ekaH subhadrAm Aropya dvairathe kRSNam Ahvayat  asminn eva vane kRSNo hRtAM kRSNAm avAjayat 7  ekaz ca paJcavarSANi zakrAd astrANy azikSata  ekaH sAmyaminIM jitvA kurUNAm akarod yazaH 8  eko gandharvarAjAnaM citrasenam ariMdamaH  vijigye tarasA saMkhye senAM cAsya sudurjayAm 9  tathA nivAtakavacAH kAlakhaJjAz ca dAnavAH  daivatair apy avadhyAs te ekena yudhi pAtitAH 10  ekena hi tvayA karNa kiMnAmeha kRtaM purA  ekaikena yathA teSAM bhUmipAlA vazIkRtAH 11  indro 'pi hi na pArthena saMyuge yoddhum arhati  yas tenAzaMsate yoddhuM kartavyaM tasya bheSajam 12  AzIviSasya kruddhasya pANim udyamya dakSiNam  avimRzya pradeziNyA daMSTrAm AdAtum icchasi 13  atha vA kuJjaraM mattam eka eva caran vane  anaGkuzaM samAruhya nagaraM gantum icchasi 14  samiddhaM pAvakaM vApi ghRtamedo vasA hutam  ghRtAktaz cIravAsAs tvaM madhyenottartum icchasi 15  AtmAnaM yaH samudbadhya kaNDhe baddhvA mahAzilAm  samudraM pratared dorbhyAM tatra kiMnAma pauruSam 16  akRtAstraH kRtAstraM vai balavantaM sudurbalaH  tAdRzaM karNa yaH pArthaM yoddhum icchet sa durmatiH 17  asmAbhir eSa nikRto varSANIha trayodaza  siMhaH pAzavinirmukto na naH zeSaM kariSyati 18  ekAnte pArtham AsInaM kUpe 'gnim iva saMvRtam  ajJAnAd abhyavaskandya prAptAH smo bhayam uttamam 19  saha yudhyAmahe pArtham AgataM yuddhadurmadam  sainyAs tiSThantu saMnaddhA vyUDhAnIkAH prahAriNaH 20  droNo duryodhano bhISmo bhavAn drauNis tathA vayam  sarve yudhyAmahe pArthaM karNa mA sAhasaM kRthAH 21  vayaM vyavasitaM pArthaM vajrapANim ivodyatam  SaD rathAH pratiyudhyema tiSThema yadi saMhatAH 22  vyUDhAnIkAni sainyAni yattAH paramadhanvinaH  yudhyAmahe 'rjunaM saMkhye dAnavA vAsavaM yathA   |

 

 1   [aSvatth]  na ca tAvaj jitA gAvo na ca sImAntaraM gatAH  na hAstinapuraM prAptAs tvaM ca karNa vikatthase 2  saMgrAmAn subahUJ jitvA labdhvA ca vipulaM dhanam  vijitya ca parAM bhUmiM nAhuH kiM cana pauruSam 3  pacaty agnir avAkyas tu tUSNIM bhAti divAkaraH  tUSNIM dhArayate lokAn vasudhA sa carAcarAn 4  cAturvarNyasya karmANi vihitAni manISibhiH  dhanaM yair adhigantavyaM yac ca kurvan na duSyati 5  adhItya brAhmaNo vedAn yAjayeta yajeta ca  kSatriyo dhanur Azritya jayetaiva na yAjayet  vaizyo 'dhigamya dravyANi brahmakarmANi kArayet 6  vartamAnA yathAzAstraM prApya cApi mahIm imAm  sat kurvanti mahAbhAgA rugUn suvigunAn api 7  prApya dyUtena ko rAjyaM kSatriyas toSTum arhati  tathA nRzaMsarUpeNa yathAnyaH prAkRto janaH 8  tathAvApteSu vitteSuko vikatthed vicakSaNaH  nikRtyA vaJcanA yogaiz caran vaitaMsiko yathA 9  katamad dvairathaM yuddhaM yatrAjaiSIr dhanaMjayam  nakulaM sahadevaM ca dhanaM yeSAM tvayA hRtam 10  yudhiSThiro jitaH kasmin bhImaz ca balinAM varaH  indraprasthaM tvayA kasmin saMgrAme nirjitaM purA 11  kathaiva katamaM yuddhaM yasmin kRSNA jitA tvayA  ekavastrA sabhAM nItA duSTakarman rajasvalA 12  mUlam eSAM mahat kRttaM sArArthI candanaM yathA  karma kArayithAH zUra tatva kiM viduro 'bravIt 13  yathAzakti manuSyANAM zamam AlakSayAmahe  anyeSAM caiva sattvAnAm api kITa pipIlike 14  draupadyAs taM pariklezaM na kSantuM pANDavo 'rhati  duHkhAya dhArtarASTrANAM prAdurbhUto dhanaMjayaH 15  tvaM punaH paNDito bhUtvA vAcaM vaktum ihecchasi  vairAnta karaNo jiSNur na naH zeSaM kariSyati 16  naiSa devAn na gandharvAn nAsurAn na ca rAkSasAn  bhayAd iha na yudhyeta kuntIputro dhanaMjayaH 17  yaM yam eSo 'bhisaMkruddhaH saMgrAme 'bhipatiSyati  vRkSaM guruDa vegena vinihatya tam eSyati 18  tvatto viziSTaM vIryeNa dhanuSy amara rAT samam  vAsudeva samaM yuddhe taM pArthaM ko na pUjayet 19  daivaM daivena yudhyeta mAnuSeNa ca mAnuSam  astreNAstraM samAhanyAt ko 'rjunena samaH pumAn 20  putrAd anantaraH ziSya iti dharmavido viduH  etenApi nimittena priyo droNasya pANDavaH 21  yathA tvam akaror dyUtam indraprasthaM yathAharaH  yathAnaiSIH sabhAM kRSNAM tathA yudhyasva pANDavam 22  ayaM te mAtulaH prAjJaH kSatradharmasya kovidaH  durdyUta devI gAndhAraH zakunir yudhyatAm iha 23  nAkSAn kSipati gANDIvaM na kRtaM dvAparaM na ca  jvalato nizitAn bANAMs tIkSNAn kSipati gANDivam 24  na hi gANDIvanirmuktA gArdhrapatrAH sutejanAH  antareSv avatiSThanti girINAm api dAraNAH 25  antakaH zamano mRtyus tathAgnir vaDavAmukhaH  kuryur ete kva cic cheSaM na tu kruddho dhanaMjayaH 26  yudhyatAM kAmam AcAryo nAhaM yotsye dhanaMjayam  matsyo hy asmAbhir Ayodhyo yady Agacched gavAM padam   |


 1   [bhIsma]  sAdhu pazyati vai droNaH kRpaH sAdhv anupazyati  karNas tu kSatradharmeNa yathAvad yoddhum icchati 2  AcAryo nAbhiSaktavyaH puruSeNa vijAnatA  dezakAlau tu saMprekSya yoddhavyam iti me matiH 3  yasya sUryasamAH paJca sapatnAH syuH prahAriNaH  katham abhyudaye teSAM na pramuhyeta paNDitaH 4  svArthe sarve vimuhyanti ye 'pi dharmavido janAH  tasmAd rAjan bravImy eSa vAkyaM te yadi rocate 5  karNo yad abhyavocan nas tejaH saMjananAya tat  AcArya putraH kSamatAM mahat kAryam upasthitam 6  nAyaM kAlo virodhasya kaunteye samupasthite  kSantavyaM bhavatA sarvam AcAryeNa kRpeNa ca 7  bhavatAM hi kRtAstratvaM yathAditye prabhA tathA  yathA candramaso lakSma sarvathA nApakRSyate  evaM bhavatsu brAhmaNyaM brahmAstraM ca pratiSThitam 8  catvAra ekato vedAH kSAtram ekatra dRzyate  naitat samastam ubhayaM kazmiMz cid anuzuzrumaH 9  anyatra bhAratAcAryAt saputrAd iti me matiH  brahmAstraM caiva vedAz ca naitad anyatra dRzyate 10  AcArya putraH kSamatAM nAyaM kAlaH svabhedane  sarve saMhatya yudhyAmaH pAkazAsanim Agatam 11  balasya vyasanAnIha yAny uktAni manISibhiH  mukhyo bhedo hi teSAM vai pApiSTho viduSAM mataH 12   [aSvatth]  AcArya eva kSamatAM zAntir atra vidhIyatAm  abhiSajyamAne hi gurau tadvRttaM roSakAritam 13   [vai]  tato duryodhano droNaM kSamayAm Asa bhArata  saha karNena bhISmeNa kRpeNa ca mahAtmanA 14   [droNa]  yad eva prathamaM vAkyaM bhISmaH zAMtanavo 'bravIt  tenaivAhaM prasanno vai pramam atra vidhIyatAm 15  yathA duryodhane 'yatte nAgaH spRzati sainikAn  sAhasad yadi vA mohAt tathA nItir vidhIyatAm 16  vanavAse hy anirvRtte darzayen na dhanaMjayaH  dhanaM vAlabhamAno 'tra nAdya naH kSantum arhati 17  yathA nAyaM samAyujyAd dhArtarASTrAn kathaM cana  yathA ca na parAjayyAt tathA nItir vidhIyatAm 18  uktaM duryodhanenApi purastAd vAkyam IdRzam  tad anusmRtya gAGgeya yathAvad vaktum arhasi   |

 

1   [bhIsma]  kalAMzAs tAta yujyante muhUrtAz ca dinAni ca  ardhamAsAz ca mAsAz ca nakSatrANi grahAs tathA 2  Rtavaz cApi yujyante tathA saMvatsarA api  evaM kAlavibhAgena kAlacakraM pravartate 3  teSAM kAlAtirekeNa jyotiSAM ca vyatikramAt  paJcame paJcame varSe dvau mAsAv upajAyataH 4  teSAm abhyadhikA mAsAH paJca dvAdaza ca kSapAH  trayodazAnAM varSANAm iti me vartate matiH 5  sarvaM yathAvac caritaM yad yad ebhiH parizrutam  evam etad dhruvaM jJAtvA tato bIbhatsur AgataH 6  sarve caiva mahAtmAnaH sarve dharmArthakovidAH  yeSAM yudhiSThiro rAjA kasmAd dharme 'parAdhnuyuH 7  alubdhAz caiva kaunteyAH kRtavantaz ca duSkaram  na cApi kevalaM rAjyam iccheyus te 'nupAyataH 8  tadaiva te hi vikrAntum ISuH kauravanandanAH  dharmapAzanibaddhAs tu na celuH kSatriya vratAt 9  yac cAnRta iti khyAyed yac ca gacchet parAbhavam  vRNuyur maraNaM pArthA nAnRtatvaM kathaM cana 10  prApte tu kAle prAptavyaM notsRjeyur nararSabhAH  api vajrabhRtA guptaM tathA vIryA hi pANDavAH 11  pratiyudhyAma samare sarvazastrabhRtAM varam  tasmAd yad atra kalyANaM loke sad bhir anuSThitam  tat saMvidhIyatAM kSipraM mA no hy artho 'tigAt parAn 12  na hi pazyAmi saMgrAme kadA cid api kaurava  ekAntasiddhiM rAjendra saMprAptaz ca dhanaMjayaH 13  saMpravRtte tu saMgrAme bhAvAbhAvau jayAjayau  avazyam ekaM spRzato dRSTam etad asaMzayam 14  tasmAd yuddhAvacarikaM karma vA dharmasaMhitam  kriyatAm Azu rAjendra saMprApto hi dhanaMjayaH 15   [dur]  nAhaM rAjyaM pradAsyAmi pANDavAnAM pitAmaha  yuddhAvacArikaM yat tu tac chIghraM saMvidhIyatAm 16   [bhIsma]  atra yA mAmakI buddhiH zrUyatAM yadi rocate  kSipraM balacaturbhAgaM gRhya gaccha puraM prati  tato 'paraz caturbhAgo gAH samAdAya gacchatu 17  vayaM tv ardhena sainyena pratiyotsyAma pANDavam  matsyaM vA punar AyAtam atha vApi zatakratum 18  AcAryo madhyatas tiSThatv azvatthAmA tu savyataH  kRpaH zAradvato dhImAn pArzvaM rakSatu dakSiNam 19  agrataH sUtaputras tu karNas tiSThatu daMzitaH  ahaM sarvasya sainasya pazcAt sthAsyAmi pAlayan   |

 

 1   [vai]  tathA vyUDheSv anIkeSu kauraveyair mahArathaiH  upAyAd arjunas tUrNaM rathaghoSeNa nAdayan 2  dadRzus te dhvajAgraM vai zuzruvuz ca rathasvanam  dodhUyamAnasya bhRzaM gANDIvasya ca nisvanam 3  tatas tat sarvam Alokya droNo vacanam abravIt  mahAratham anuprAptaM dRSTvA gANDIvadhanvinam 4  etad dhvajAgraM pArthasya dUrataH saMprakAzate  eSa ghoSaH sa jalado roravIti ca vAnaraH 5  eSa tiSThan rathazreSTho rathe rathavarapraNut  utkarSati dhanuHzreSThaM gANDIvam azanisvanam 6  imau hi bANau sahitau pAdayor me vyavasthitau  aparau cApy atikrAntau karNau saMspRzya me zarau 7  niruSya hi vanevAsaM kRtvA karmAti mAnuSam  abhivAdayate pArthaH zrotre ca paripRcchati 8   [arj]  iSupAte ca senAyA hayAn saMyaccha sArathe  yAvat samIkSe sainye 'smin kvAsau kuru kulAdhamaH 9  sarvAn anyAn anAdRtya dRSTvA tam ati mAninam  tasya mUrdhni patiSyAmi tata ete parAjitAH 10  eSa vyavasthito droNo drauNiz ca tadanantaram  bhISmaH kRpaz ca karNaz ca maheSvAsA vyavasthitAH 11  rAjAnaM nAtra pazyAmi gAH samAdAya gacchati  dakSiNaM mArgam AsthAya zaGke jIva parAyaNaH 12  utsRjyaitad rathAnIkaM gaccha yatra suyodhanaH  tatraiva yotsye vairATe nAsti yuddhaM nirAmiSam  taM jitvA vinivartiSye gAH samAdAya vai punaH 13   [vai]  evam uktaH sa vairATir hayAn saMyamya yatnataH  niyamya ca tato razmIn yatra te kurupuMgavAH  acodayat tato vAhAn yato duryodhanas tataH 14  utsRjya rathavaMzaM tu prayAte zvetavAhane  abhiprAyaM viditvAsya droNo vacanam abravIt 15  naiSo 'ntareNa rAjAnaM bIbhatsuH sthAtum icchati  tasya pArSNiM grahISyAmo javenAbhiprayAsyataH 16  na hy enam abhisaMkruddham eko yudhyeta saMyuge  anyo devAt sahasrAkSAt kRSNAd vA devakI sutAt 17  kiM no gAvaH kariSyanti dhanaM vA vipulaM tathA  duryodhanaH pArtha jale purA naur iva majjati 18  tathaiva gatvA bIbhatsur nAma vizrAvya cAtmanaH  zalabhair iva tAM senAM zaraiH zIghram avAkirat 19  kIryamANAH zaraughais tu yodhAs te pArtha coditaiH  nApazyan nAvRtAM bhUmim antarikSaM ca patribhiH 20  teSAM nAtmanino yuddhe nApayAne 'bhavan matiH  zIghratvam eva pArthasya pUjayanti sma cetasA 21  tataH zaGkhaM pradadhmau sa dviSatAM lomaharSaNam  visphArya ca dhanuHzreSThaM dhvaje bhUtAny acodayat 22  tasya zaGkhasya zabdena rathanemi svanena ca  amAnuSANAM teSAM ca bhUtAnAM dhvajavAsinAm 23  UrdhvaM pucchAn vidhunvAnA rebhamANAH samantataH  gAvaH pratinyavartanta dizam AsthAya dakSiNAm   |



 1   [vai]  sa zatrusenAM tarasA praNudya; gAs tA vijityAtha dhanurdharAgryaH  duryodhanAyAbhimukhaM prayAto; bhUyo 'rjunaH priyam Ajau cikIrSan 2  goSu prayAtAsu javena matsyAn; kirITinaM kRtakAryaM ca matvA  duryodhanAyAbhimukhaM prayAntaM; kurupravIrAH sahasAbhipetuH 3  teSAm anIkAni bahUni gADDhaM; vyUDhAni dRSTvA balula dhvajAni  matsyasya putraM dviSatAM nihantA; vairATim Amantrya tato 'bhyuvAca 4  etena tUrNaM pratipAdayemAJ; zvetAn hayAn kAJcanarazmi yoktrAn  javena sarveNa kuru prayatnam; AsAdayaitad rathasiMhavRndam 5  gajo gajeneva mayA durAtmA; yo yoddhum AkAGkSati sUtaputraH  tam eva mAM prApaya rAjaputra; duryodhanApAzraya jAtadarpam 6  sa tair hayair vAtajavair bRhad bhiH; putro virATasya suvarNakakSyaiH  vidhvaMsayaMs tadrathinAm anIkaM; tato 'vahat pANDavam Ajimadhye 7  taM citraseno vizikhair vipAThaiH; saMgrAmajic chatrusaho jayaz ca  pratyudyayur bhAratam ApatantaM; mahArathAH karNam abhIpsamAnAH 8  tataH sa teSAM puruSapravIraH; zarAsanArciH zaravegatApaH  vrAtAn rathAnAm adahat sa manyur; vanaM yathAgniH kurupuMgavAnAm 9  tasmiMs tu yuddhe tumule pravRtte; pArthaM vikarNo 'tirathaM rathena  vipATha varSeNa kurupravIro; bhImena bhImAnujam AsasAda 10  tato vikarNasya dhanur vikRSya; jAmbUnadAgryopacitaM dRDhajyam  apAtayad dhvajam asya pramathya; chinnadhvajaH so 'py apayAj javena 11  taM zAtravANAM gaNabAdhitAraM; karmANi kurvANam amAnuSANi  zatruM tapaH kopam amRSyamANaH; samarpayat kUrmanakhena pArtham 12  sa tena rAjJAtirathena viddho; vigAhamAno dhvajinIM kurUNAm  zatruM tapaM paJcabhir Azu viddhvA; tato 'sya sUtaM dazabhir jaghAna 13  tataH sa viddho bharatarSabheNa; bANena gAtrAvaraNAtigena  gatAsur Ajau nipapAta bhUmau; nago ganAgrAd iva vAtarugNaH 14  ratharSabhAs te tu ratharSabheNa; vIrA raNe vIratareNa bhagnAH  cakampire vAtavazena kAle; prakamiptAnIva mahAvanAni 15  hatAs tu pArthena narapravIrA; bhUmau yuvAnaH suSupuH suveSAH  vasu pradA vAsavatulyavIryAH; parAjitA vAsava jena saMkhye  suvarNakArSNAyasa varma naddhA; nAgA yathA haivavatAH pravRddhAH 16  tathA sa zatrUn samare vinighnan; gANDIvadhanvA puruSapravIraH  cacAra saMkhye pradizo dizaz ca; dahann ivAgnir vanam AtapAnte 17  prakIrNaparNAni yathA vasante; vizAtayitvAtyanilo nudan khe  tathA sapatnAn vikiran kirITI; cacAra saMkhye 'ti ratho rathena 18  zoNAzvavAhasya hayAn nihatya; vaikartana bhrAtur adInasattvaH  ekena saMgrAmajitaH zareNa; ziro jahArAtha kirITamAlI 19  tasmin hate bhrAtari sUtaputro; vaikartano vIryam athAdadAnaH  pragRhya dantAv iva nAgarAjo; maharSabhaM vyAghra ivAbhyadhAvat 20  sa pANDavaM dvAdazabhiH pRSatkair; vaikartanaH zIghram upAjaghAna  vivyAdha gAtreSu hayAMz ca sarvAn; virATa putraM ca zarair nijaghne 21  sa hastinevAbhihato gajendraH; pragRhya bhallAn nizitAn niSaGgAt  A karNa pUrNaM ca dhanur vikRSya; vivyAdha bANair atha sUtaputram 22  athAsya bAhUruziro lalATaM; grIvAM rathAGgAni parAvamardI  sthitasya bANair yudhi nirbibheda; gANDIvamuktair azaniprakAzaiH 23  sa pArtha muktair vizikhaiH praNunno; gajo gajeneva jitas tarasvI  vihAya saMgrAmaziraH prayAto; vaikartanaH pANDava bANataptaH   |



  1   [vai]  apayAte tu rAdheye duryodhana purogamAH  anIkena yathA svena zarair Arcchanta pANDavam 2  bahudhA tasya sainyasya vyUDhasyApatataH zaraiH  abhiyAnIyam AjJAya vairATir idam abravIt 3  AsthAya ruciraM jiSNo rathaM sArathinA mayA  katamad yAsyase 'nIka mukto yAsyAmy ahaM tvayA 4   [arj]  lohitAkSam ariSTaM yaM vaiyAghram anupazyasi  nIlAM patAkAm Azritya rathe tiSThantam uttara 5  kRpasyaitad rathAnIkaM prApayasvaitad eva mAm  etasya darzayiSyAmi zIghrAstraM dRDhadhanvinaH 6  kamaNDalur dhvaje yasya zAtakumbhamayaH zubhaH  AcArya eSa vai droNaH sarvazastrabhRtAM varaH 7  suprasannamanA vIra kuruSvainaM pradakSiNam  atraiva cAvirodhena eSa dharmaH sanAtanaH 8  yadi me prathamaM droNaH zarIre prahariSyati  tato 'sya prahariSyAmi nAsya kopo bhaviSyati 9  asyAvidUre tu dhanur dhvajAgre yasya dRzyate  AcAryasyaiSa putro vai azvatthAmA mahArathaH 10  sadA mamaiSa mAnyaz ca sarvazastrabhRtAm api  etasya tvaM rathaM prApya nivartethAH punaH punaH 11  ya eSa tu rathAnIke suvarNakavacAvRtaH  senAgryeNa tRtIyena vyavahAryeNa tiSThati 12  yasya nAgo dhvajAgre vai hemaketana saMzritaH  dhRtarASTrAtmajaH zrImAn eSa rAjA suyodhanaH 13  etasyAbhimukhaM vIra rathaM pararathArujaH  prApayasvaiSa tejo 'bhipramAthI yuddhadurmadaH 14  eSa droNasya ziSyANAM zIghrAstraH prathamo mataH  etasya darzayiSyAmi zIghrAstraM vipulaM zaraiH 15  nAgakakSyA tu rucirA dhvajAgre yasya tiSThati  eSa vaikartanaH karNo viditaH pUrvam eva te 16  etasya ratham AsthAya rAdheyasya durAtmanaH  yatto bhavethAH saMgrAme spardhaty eSa mayA sadA 17  yas tu nIlAnusAreNa paJca tAreNa ketunA  hastAvApI bRhad dhanvA rathe tiSThati vIryavAn 18  yasya tArArka citro 'sau rathe dhvajavaraH sthitaH  yasyaitat pANDuraM chatraM vimalaM mUrdhni tiSThati 19  mahato rathavaMzasya nAnA dhvajapatAkinaH  balAhakAgre sUryo vA ya eSa pramukhe sthitha 20  haimaM candrArkasaMkAzaM kavacaM yasya dRzyate  jAtarUpaziras trANas trAsayann iva me manaH 21  eSa zAMtanavo bhISmaH sarveSAM naH pitAmahaH  rAjazriyAvabaddhas tu duryodhana vazAnugaH 22  pazcAd eSa prayAtavyo na me vighnakaro bhavet  etena yudhyamAnasya yattaH saMyaccha me hayAn 23  tato 'bhyavahad avyagro vairATiH savyasAcinam  yatrAtiSThat kRpo rAjan yotsyamAno dhanaMjayam   |



1   [vai]  tAny anIkAny adRzyanta kurUNAm ugradhanvinAm  saMsarpanto yathA meghA gharmAnte mandamArutAH 2  abhyAze vAjinas tasthuH samArUDhAH prahAribhiH  bhImarUpAz ca mAtaGgAs tomarAGkuzacoditAH 3  tataH zakraH suragaNaiH samAruhya sudarzanam  sahopAyAt tadA rAjan vizvAzvi marutAM gaNaiH 4  tad deva yakSagandharvamahoragasamAkulam  zuzubhe 'bhravinirmuktaM grahair iva nabhastalam 5  astrANAM ca balaM teSAM mAnuSeSu prayujyatAm  tac ca ghoraM mahad yuddhaM bhISmArjunasamAgame 6  zataM zatasahasrANAm yatra sthUNA hiraNmayAH  maNiratnamayAz cAnyAH prAsAdam upadhArayan 7  tatra kAmagamaM divyaM sarvaratnavibhUSitam  vimAnaM devarAjasya zuzubhe khecaraM tadA 8  tatra devAs trayas triMzat tiSThanti saha vAsavAH  gandharvA rAkSasAH sarpAH pitaraz ca maharSibhiH 9  tathA rAjA vasu manA balAkSaH supratardanaH  aSTakaz ca zibiz caiva yayAtir nahuSo gayaH 10  manuH kSepo raghur bhAnuH kRzAzvaH sagaraH zalaH  vimAne devarAjasya samadRzyanta suprabhAH 11  agner Izasya somasya varuNasya prajApateH  tathA dhAtur vidhAtuz ca kuberasya yamasya ca 12  alambusograsenasya gardharvasya ca tumburoH  yathAbhAgaM yathoddezaM vimAnAni cakAzire 13  sarvadeva nikAyAz ca siddhAz ca paramarSayaH  arjunasya karUNAM ca draSTuM yuddham upAgatAH 14  divyAnAM tatra mAlyAnAM gandhaH puNyo 'tha sarvazaH  prasasAra vasantAgre vanAnAm iva puSpitAm 15  raktAraktAni devAnAM samadRzyanta tiSThatAm  AtapatrANi vAsAMsi srajaz ca vyajanAni ca 16  upazAmyad rajo bhaumaM sarvaM vyAptaM marIcibhiH  divyAn gandhAn upAdAya vAyur yodhAn asevata 17  prabhAsitam ivAkAzaM citrarUpam alaM kRtam  saMpatad bhiH sthitaiz caiva nAnAratnAvabhAsitaiH  vimAnair vividhaiz citrair upAnItaiH surottamaiH   |



1   [vai]  etasminn antare tatra mahAvIryaparAkramaH  AjagAma mahAsattvaH kRpaH zastrabhRtAM varaH  arjunaM prati saMyoddhuM yuddhArthI sa mahArathaH 2  tau rathau sUryasaMkAzau yotsyamAnau mahAbalau  zAradAv iva jImUtau vyarocetAM vyavasthitau 3  pArtho 'pi vizrutaM loke gANDIvaM paramAyudham  vikRSya cikSepa bahUn nArAcAn marmabhedinaH 4  tAn aprAptAJ zitair bANair nArAcAn raktabhojanAn  kRpaz ciccheda pArthasya zatazo 'tha sahasrazaH 5  tataH pArthaz ca saMkruddhaz citrAn mArgAn pradarzayan  dizaH saMchAdayan bANaiH pradizaz ca mahArathaH 6  ekachAyam ivAkAzaM prakurvan sarvataH prabhuH  pradhAdayad ameyAtmA pArthaH zarazataiH kRpam 7  sa zarair arpitaH kruddhaH zitair agnizikhopamaiH  tUrNaM zarasahasreNa pArtham apratimaujasam  arpayitvA mahAtmAnaM nanAda samare kRpaH 8  tataH kanakapuGkhAgrair vIraH saMnataparvabhiH  tvaran gANDIvanirmuktair arjunas tasya vAjinaH  caturbhiz caturas tIkSNair avidhyat parameSubhiH 9  te hayA nizitair viddhA jvalad bhir iva pannagaiH  utpetuH sahasA sarve kRpaH sthAnAd athAcyavat 10  cyutaM tu gautamaM sthAnAt samIkSya kurunandanaH  nAvidhyat paravIraghno rakSamANo 'sya gauravam 11  sa tu labdhvA punaH sthAnaM gautamaH savyasAcinam  vivyAdha dazabhir bANais tvaritaH kaGkapatribhiH 12  tataH pArtho dhanus tasya bhallena nizitena ca  cicchedaikena bhUyaz ca hastAc cApam athAharat 13  athAsya kavacaM bANair nizitair marmabhedibhiH  vyadhaman na ca pArtho 'sya zarIram avapIDayat 14  tasya nirmucyamAnasya kavacAt kAya Ababhau  samaye mucyamAnasya sarpasyeva tanur yathA 15  chinne dhanuSi pArthena so 'nyad AdAya kArmukam  cakAra gautamaH sajyaM tad adbhutam ivAbhavat 16  sa tad apy asya kaunteyaz ciccheda nataparvaNA  evam anyAni cApAni bahUni kRtahastavat  zAradvatasya ciccheda pANDavaH paravIhra hA 17  sa chinnadhanur AdAya atha zaktiM pratApavAn  prAhiNot pANDuputrAya pradIptAm azanIm iva 18  tAm arjunas tadAyAntIM zaktiM hemavibhUSitAm  viyad gatAM maholkAbhaM ciccheda dazabhiH zaraiH  sApatad dazadhA chinnA bhUmau pArthena dhImatA 19  yugamadhye tu bhallais tu tataH sa sadhanuH kRpaH  tam Azu nizitaiH pArthaM bibheda dazabhiH zaraiH 20  tataH pArtho mahAtejA vizikhAn agnitejasaH  cikSepa samare kruddhas trayodaza zilAzitAn 21  athAsya yugam ekena caturbhiz caturo hayAn  SaSThena ca ziraH kAyAc chareNa rathasAratheH 22  tribhis triveNuM samare dvAbhyAm akSau mahAbalaH  dvAdazena tu bhallena cakartAsya dhvajaM tathA 23  tato varja nikAzena phalgunaH prahasann iva  trayodazenendrasamaH kRpaM vakSasy atADayat 24  sa chinnadhanvA viratho hatAzvo hatasArathiH  gadApANir avaplutya tUrNaM cikSepa tAM gadAm 25  sA tu muktA gadA gurvI kRpeNa supariSkRtA  arjunena zarair nunnA prati mArgam athAgamat 26  tato yodhAH parIpsantaH zAradvatam amarSaNam  sarvataH samare pArthaM zaravarSair avAkiran 27  tato virATasya sutaH savyam AvRtya vAjinaH  yamakaM maNDalaM kRtvA tAn yodhAn pratyavArayat 28  tataH kRpam upAdAya virathaM te nararSabhAH  ajAjahrur mahAvegAH kuntIputrAd dhanaMjayAt   |



 1   [arj]  yatraiSA kAJcanI vedI pradIptAgnizikhopamA  ucchritA kAJcane daNDe patAkAbhir alaM kRtA  tatra mAM vaha bhadraM te droNAnIkAya mAriSa 2  azvAH zoNAH prakAzante bRhantaz cAru vAhinaH  snigdhavidruma saMkAzAs tAmrAsyAH priyadarzanAH  yuktA rathavare yasya sarvazikSA vizAradAH 3  dIrghabAhur mahAtejA balarUpasamanvitaH  sarvalokeSu vikhyAto bhAradvAjaH pratApavAn 4  buddhyA tulyo hy uzanasA bRhaspatisamo naye  vedAs tathaiva catvAro brahmacaryaM tathaiva ca 5  sasaMhArANi divyAni sarvANy astrANi mAriSa  dhanurvedaz ca kArtsnyena yasmin nityaM pratiSThitaH 6  kSamA damaz ca satyaM ca AnRzaMsyam athArjavam  ete cAnye ca bahavo guNA yasmin dvijottame 7  tenAhaM yoddhum icchAmi mahAbhAgena saMyuge  tasmAt tvaM prApayAcAryaM kSipram uttaravAhaya 8   [vai]  arjunenaivam uktas tu vairATir hemabhUSitAn  codayAm Asa tAn azvAn bhAradvAja rathaM prati 9  tam ApatantaM vegena pANDavaM rathinAM varam  droNaH pratyudyayau pArthaM matto mattam iva dvipam 10  tataH pradhmApayac chaGkhaM bherI zataninAditam  pracukSubhe balaM sarvam uddhUta iva sAgaraH 11  atha zoNAn sadazvAMs tAn hansa varNair manojavaiH  mizritAn samare dRSTvA vyasmayanta raNe janAH 12  tau rathau vIryasaMpannau dRSTvA saMgrAmamUrdhani  AcArya ziSyAv ajitau kRtavidhyau manasvinau 13  samAzliSTau tadAnyonyaM droNapArthau mahAbalau  dRSTvA prAkampata muhur bharatAnAM mahad balam 14  harSayuktas tathA pArthaH prahasann iva viryavAn  rathaM rathena droNasya samAsAdya mahArathaH 15  abhivAdya mahAbAhuH sAntvapUrvam idaM vacaH  uvAca zlakSNayA vAcA kaunteyaH paravIra hA 16  uSitAH sma vanevAsaM pratikarma cikIrSavaH  kopaM nArhasi naH kartuM sadA samaradurjaya 17  ahaM tu prahRte pUrvaM prahariSyAmi te 'nagha  iti me vartate buddhis tad bhavAn kartum arhati 18  tato 'smai prAhiNod droNaH zarAn adhikaviMzatim  aprAptAMz caiva tAn pArthaz ciccheda kRtahastavat 19  tataH zarasahasreNa rathapArthasya vIryavAn  avAkirat tato droNaH zIghram astraM vidarzayan 20  evaM pravavRte yuddhaM bhAradvAja kirITinoH  samaM vimuJcatoH saMkhye vizikhAn dIptatejasaH 21  tAv ubhau khyAtakarmANAv ubhau vAyusamau jave  ubhau divyAstraviduSAv ubhAv uttamatejasau  kSipantau zarajAlAni mohayAm Asatur nRpAn 22  vyasmayanta tato yodhAH sarve tatra samAgatAH  zarAn visRjatos tUrNaM sAdhu sAdhv iti pUjayan 23  droNaM hi samare ko 'nyo yoddhum arhati phalgunAt  raudraH kSatriya dharmo 'yaM guruNA yad ayudhyata  ity abruvaJ janAs tatra saMgrAmazirasi sthitAH 24  vIrau tAv api saMrabdhau saMnikRSTau mahArathau  chAdayetAM zaravrAtair anyonyam aparAjitau 25  visphArya sumahac cApaM hemapRSThaM durAsadam  saMrabdho 'tha bharadvAjaH phalgunaM pratyayudhyata 26  sa sAyakamayair jAlair arjunasya rathaM prati  bhAnumatlbhiH zilA dhautair bhAnoH pracchAdayat prabhAm 27  pArthaM ca sa mahAbAhur mahAvegair mahArathaH  vivyAdha nizitair bANair megho vRSTyeva parvatam 28  tathaiva divyaM gANDIvaM dhanur AdAya pANDavaH  zatrughnaM vegavad dhRSTo bhArasAdhanam uttamam  visasarja zarAMz citrAn suvarNavikRtAn bahUn 29  nAzayaJ zaravarSANi bhAradvAjasya vIryavAn  tUrNaM cApanivirmuktais tad adbhutam ivAbhavat 30  sa rathena caran pArthaH prekSaNIyo dhanaMjayaH  yugapad dikSu sarvAsu sarvazastrANy adarzayat 31  ekachAyam ivAkAzaM bANaiz cakre samantataH  nAdRzyata tadA droNo nIhAreNeva saMvRtaH 32  tasyAbhavat tadA rUpaM saMvRtasya zarottamaiH  jAjvalyamAnasya yathA parvatasyeva sarvataH 33  dRSTvA tu pArthasya raNe zaraiH svaratham AvRtam  sa visphArya dhanuz citraM meghastanita nisvanam 34  agnicakropamaM ghoraM vikarSan paramAyudham  vyazAtayac charAMs tAMs tu droNaH samitizobhanaH  mahAn abhUt tataH zabdo vaMzAnAm iva duhyatAm 35  jAmbUnadamayaiH puGkhaiz citracApavarAtigaiH  prAcchAdayad ameyAtmA dizaH sUryasya ca prabhAm 36  tataH kanakapuGkhAnAM zarANAM nataparvaNAm  viyac carANAM viyati dRzyante bahuzaH prajAH 37  droNasya puGkhasaktAz ca prabhavantaH zarAsanAt  eko dIrgha ivAdRzyad AkAze saMhataH zaraH 38  evaM tau svarNavikRtAn vimuJcantau mahAzarAn  AkAzaM saMvRtaM vIrAv ulkAbhir iva cakratuH 39  zarAs tayoz ca vibabhuH kaGkabarhiNa vAsasaH  paGktyaH zaradi khasthAnAM haMsAnAM caratAm iva 40  yuddhaM samabhavat tatra susaMrabdhaM mahAtmanoH  droNa pANDavayor ghoraM vRtravAsavayor iva 41  tau jagAv iva cAsAdya viSANAgraiH parasparam  zaraiH pUrNAyatotsRSTair anyonyam abhijaghnatuH 42  tau vyavAharatAM zUrau saMrabdhau raNazobhinau  udIrayantau samare divyAny astrANi bhAgazaH 43  atha tv AcArya mukhyena zarAn sRSTAJ zilAzitAn  nyavArayac chitair bAnair arjuno jayatAM varaH 44  darzayann aindrir AtmAnam ugram ugraparAkramaH  iSubhis tUrNam AkAzaM bahubhiz ca samAvRNot 45  jighAMsantaM naravyAghram arjunaM tigmatejasam  AcArya mukhyaH samare droNaH zastrabhRtAM varaH  arjunena sahAkrIDac charaiH saMnataparvabhiH 46  divyAny astrANi muJcantaM bhAradvAjaM mahAraNe  astrair astrANi saMvArya palgunaH samayodhayat 47  tayor AsIt saMprahAraH kruddhayor narasiMhayoH  amarSiNos tadAnyonyaM devadAnavayor iva 48  aindraM vAyavyam Agneyam astram astreNa pANDavaH  droNena muktaM muktaM tu grasate sma punaH punaH 49  evaM zUrau maheSvAsau visRjantau zitAJ zarAn  ekachAyaM cakratus tAv AkAzaM zaravRSTibhiH 50  tato 'rjunena muktAnAM patatAM ca zarIriSu  parvateSv iva varjANAM zarANAM zrUyate svanaH 51  tato nAgA rathAz caiva sAdinaz ca vizAM pate  zoNitAktA vyadRzyanta puSpitA iva kiMzukAH 52  bAhubhiz ca sa keyUrair vicitraiz ca mahArathaiH  suvarNacitraiH kavacair dhvajaiz ca vinipAtitaiH 53  yodhaiz canihatais tatra pArtha bANaprapIDitaiH  balam AsIt samudbhrAntaM droNArjuna samAgame 54  vidhunvAnau tu tau vIrau dhanur I bhArasAdhane  AcchAyadetAm anyonyaM titakSantau raNeSubhiH 55  athAntarikSe nAdo 'bhUd droNaM tatra prazaMsatAm  duSkaraM kRtavAn droNo yad arjunam ayodhayat 56  pramAthinaM mahAvIryaM dRDhamuSTiM durAsadam  jetAraM deva daityAnAM sarpANAM ca mahAratham 57  avizramaM ca zikSAM ca lAghavaM dUrapAtitAm  pArthasya samare dRSTvA droNasyAbhUc ca vismayaH 58  atha gANDIvam udyamya divyaM dhanur amarSaNaH  vicakarSa raNe pArtho bAhubhyAM bharatarSabha 59  tasya bANamayaM varSaM zalabhAnAm ivAyatam  na ca bANAntare vAyur asya zaknoti sarpitum 60  anizaM saMdadhAnasya zarAn utsRjatas tadA  dadRze nAntaraM kiM cit pArthasyAdadato 'pi ca 61  tathA zIghrAstra yuddhe tu vartamAne sudAruNe  zIghrAc chIghrataraM pArthaH zarAn anyAn udIrayat 62  tataH zatasahasrANi zarANAM nataparvaNAm  yugapat prApataMs tatra droNasya ratham antikAt 63  avakIryamANe droNe tu zarair gANDIvadhanvanA  hAhAkAro mahAn AsIt sainyAnAM bharatarSabha 64  pANDavasya tu zIghrAstraM maghavAn samapUjayat  gandharvApsarasaz caiva ye ca tatra samAgatAH 65  tato vRndena mahatA rathAnAM rathayUthapaH  AcArya putraH sahasA pANDavaM pratyavArayat 66  azvatthAmA tu tat karma hRdayena mahAtmanaH  pUjayAm Asa pArthasya kopaM cAsyAkarod bhRzam 67  sa manyuvazam ApannaH pArtham abhyadravad raNe  kiraJ zarasahasrANi parjanya iva vRSTimAn 68  AvRtya tu mahAbAhur yato drauNis tato hayAn  antaraM pradadau pArtho droNasya vyapasarpitum 69  sa tu labdhvAntaraM tUrNam apAyAj javanair hayaiH  chinnavarma dhvajaH zUro nikRttaH parameSubhiH   |

 

 1   [vai]  taM pArthaH pratijagrAha vAyuvegam ivoddhatam  zarajAlena mahatA varSamANam ivAmbudam 2  tayor devAsurasamaH saMnipAto mahAn abhUt  kiratoH zarajAlAni vRtravAsavayor iva 3  na sma sUryas tadA bhAti na ca vAti samIraNaH  zaragADhe kRte vyomni chAyA bhUte samantataH 4  mahAMz caTa caTA zabdo yodhayor hanyamAnayoH  dahyatAm iva veNUnAm AsIt parapuraMjaya 5  hayAn asyArjunaH sarvAn kRtavAn alpajIvitAn  sa rAjan an prajAnAti dizaM kAM cana mohitaH 6  tato drauNir mahAvIryaH pArthasya vicariSyataH  vivaraM sUkSmam Alokya jyAM ciccheda kSureNa ha  tad asyApUjayan devAH karma dRSTvAti mAnuSam 7  tato drauNir dhanUMSy aSTau vyapakramya nararSabham  punar abhyAhanat pArthaM hRdaye kaGkapatribhiH 8  tataH pArtho mahAbAhuH prahasya svanavat tadA  yojayAm Asa navayA maurvyA gANDIvam ojasA 9  tato 'rdhacandram AvRtya tena pArthaH samAgamat  vAraNeneva mattena matto vAraNayUthapaH 10  tataH pravavRte yuddhaM pRthivyAm ekavIrayoH  raNamadhye dvayor eva sumahal lomaharSaNam 11  tau vIrau kuravaH sarve dadRzur vismayAnvitAH  yudhyamAnau mahAtmAnau yUthapAv iva saMgatau 12  tau samAjaghnatur vIrAv anyonyaM puruSarSabhau  zarair AzIvizAkArair jvalad bhir iva pannagaiH 13  akSayyAv iSudhI divyau pANDavasya mahAtmanaH  tena pArtho raNe zUras tasthau girir ivAcalaH 14  azvatthAmnaH punar bANAH kSipram abhyasyato raNe  jagmuH parikSayaM zIghram abhUt tenAdhiko 'rjunaH 15  tataH karNo mahac cApaM vikRSyAbhyadhikaM ruSA  avAkSipat tataH zabdo hAhAkAro mahAn abhUt 16  tatra cakSur dadhe pArtho yatra vispAryate dhanuH  dadarza tatra rAdheyaM tasya kopo 'tyavIvRdhat 17  saroSavazam ApannaH karNam eva jighAMsayA  avaikSata vivRttAbhyAM netrAbhyAM kurupuMgavaH 18  tathA tu vimukhe pArthe droNaputrasya sAyakAn  tvaritAH puruSA rAjann upAjahruH sahasrazaH 19  utsRjya ca mahAbAhur droNaputraM dhanaMjayaH  abhidudrAva sahasA karNam eva sapatnajit 20  tam abhidrutya kaunteyaH krodhasaMraktalocanaH  kAmayan dvairathe yuddham idaM vacanam abravIt   |



 1   [arj]  karNa yat te sabhAmadhye bahu vAcA vikatthitam  na me yudhi samo 'stIti tad idaM pratyupasthitam 2  avocaH paruSA vAco dharmam utsRjya kevalam  idaM tu duSkaraM manye yad idaM te cikIrSitam 3  yat tvayA kathitaM pUrvaM mAm anAsAdya kiM cana  tad adya kuru rAdheya kurumadhye mayA saha 4  yat sabhAyAM sma pAJcAlIM lizyamAnAM durAtmabhiH  dRSTavAn asi tasyAdya phalam Apnuhi kevalam 5  dharmapAzanibaddhena yan mayA marSitaM purA  tasya rAdheya kopasya vijayaM pazya me mRdhe 6  ehi karNa mayA sArdhaM pratipadyasva sAgaram  prekSakAH kuravaH sarve bhavantu saha sainikAH 7   [karNa]  bravISi vAcA yat pArtha karmaNA tat samAcara  atizete hi vai vAcaM karmeti prathitaM bhuvi 8  yat tvayA marSitaM pUrvaM tad azaktena marSitam  iti gRhNAmi tat pArtha tava dRSTvAparAkramam 9  dharmapAzanibaddhena yadi te marSitaM purA  tathaiva baddham AtmAnam abaddham iva manyase 10  yadi tAvad vanevAsA yathoktaz caritas tvayA  tat tvaM dharmArthavit kliSTaH samayaM bhettum icchasi 11  yadi zakraH svayaM pArtha yudhyate tava kAraNAt  tathApi na vyathA kA cin mama syAd vikramiSyataH 12  ayaM kaunteya kAmas te nacirAt samupasthitaH  yotsyase tvaM mayA sArdham adya drakSyasi me balam 13   [arj]  idAnIm eva tAvat tvam apayAto raNAn mama  tena jIvasi rAdheyanihatas tv anujas tava 14  bhrAtaraM ghAtayitvA ca tyaktvA raNaziraz ca kaH  tvadanyaH puruSaH satsu brUyAd evaM vyavasthitaH 15   [vai]  iti karNaM bruvann eva bIbhatsur aparAjitaH  abhyayAd visRjan bANAn kAyAvaraNa bhedinaH 16  pratijagrAha tAn karNaH zarAn agnizikhopamAn  zaravarSeNa mahatA varSamANa ivAmbudaH 17  utpetuH zarajAlAni ghorarUpANi sarvazaH  avidhyad azvAn bAhoz ca hastAvApaM pRthak pRthak 18  so 'mRSyamANaH karNasya niSaGgasyAvalambanam  ciccheda nizitAgreNa zareNa nataparvaNA 19  upAsaGgAd upAdAya karNo bANAn athAparAn  vivyAdha pANDavaM haste tasya muSTir azIryata 20  tataH pArtho mahAbAhuH karNasya dhanur acchinat  sa zaktiM prAhiNot tasmai tAM pArtho vyadhamac charaiH 21  tato 'bhipetur bahavo rAdheyasya padAnugAH  tAMz ca gANDIvanirmuktaiH prAhiNod yamasAdanam 22  tato 'syAzvAJ zarais tIkSNair bIbhatsur bhArasAdhanaiH  A karNa muktair abhyaghnaMs te hatAH prApatan bhuvi 23  athApareNa bANena jvalitena mahAbhujaH  vivyAdha karNaM kaunteyas tIkSNenorasi vIryavAn 24  tasya bhittvA tanutrANaM kAyam abhyapatac chiraH  tataH sa tamasAviSTo na sma kiM cit prajajJivAn 25  sa gADhavedano hitvA raNaM prAyAd udaGmukhaH  tato 'rjuna upAkrozad uttaraz ca mahArathaH   |



 1   [vai]  tato vaikartanaM jitvA pArtho vairATim abravIt  etan mAM prApayAnIkaM yatra tAlo hiraNmayaH 2  atra zAMtanavo bhISmo rathe 'smAkaM pitAmahaH  kAGkSamANo mayA yuddhaM tiSThaty amara darzanaH  AdAsyAmy aham etasya dhanurjyAm api cAhave 3  asyantaM divyam astraM mAM citram adya nizAmaya  zatahradAm ivAyAntIM stanayitnor ivAmbare 4  suvarNapRSThaM gANDIvaM drakSyanti kuravo mama  dakSiNenAtha vAmena katareNa svid asyati  iti mAM saMgatAH sarve tarkayiSyanti zatravaH 5  zoNitodAM rathAvartAM nAganakrAM duratyayAm  nadIM prasyandayiSyAmi paralokapravAhinIm 6  pANipAdaziraH pRSThabAhuzAkhA nirantaram  vanaM kurUNAM chetsyAmi bhallaiH saMnataparvabhiH 7  jayataH kauravIM senAm ekasya mama dhanvinaH  zataM mArgA bhaviSyanti pAvakasyeva kAnane  mayA cakram ivAviddhaM sainyaM drakSyasi kevalam 8  asaMbhrAnto rathe tiSTha sameSu viSameSu ca  divAm AvRtya tiSThantaM giriM bhetsyAmi dhAribhiH 9  aham indrasya vacanAt saMgrAme 'bhyahanaM purA  paulomAn kAlakhaJjAMz ca sahasrANi zatAni ca 10  aham indrAd dRDhAM muSTiM brahmaNaH kRtahastatAm  pragADhaM tumulaM citram atividdhaM prajApateH 11  ahaM pAre samudrasya hiraNyapuram Arujam  jitvA SaSTisahasrANi rathinAm ugradhanvinAm 12  dhvajavRkSaM pattitRNaM rathasiMhagaNAyutam  vanam AdIpayiSyAmi kurUNAm astratejasA 13  tAn ahaM rathanIDebhyaH zaraiH saMnataparvabhiH  ekaH saMkAlayiSyAmi vajrapANir ivAsurAn 14  raudraM rudrAd ahaM hy astraM vAruNaM varuNAd api  astram Agneyam agnez ca vAyavyaM mAtarizvanaH  vajrAdIni tathAstrANi zakrAd aham avAptavAn 15  dhArtarASTra vanaM ghoraM narasiMhAbhirakSitam  aham utpATayiSyAmi vairATe vyetu te bhayam 16  evam AzvAsitas tena vairATiH savyasAcinA  vyagAhata rathAnIkaM bhImaM bhISmasya dhImataH 17  tam AyAntaM mahAbAhuM jigISantaM raNe parAn  abhyavArayad avyagraH krUrakarmA dhanaMjayam 18  taM citramAlyAbharaNAH kRtavidyA manasvinaH  Agacchan bhImadhanvAnaM maurvIM paryasya bAhubhiH 19  duHzAsano vikarNaz ca duHsaho 'tha viviMzatiH  Agatya bhImadhanvAnaM bIbhatsuM paryavArayan 20  duHzAsanas tu bhallena viddhvA vairATim uttaram  dvitIyenArjunaM vIraH pratyavidhyat stanAntare 21  tasya jiSNur upAvRtya pRthu dhAreNa kArmukam  cakarta gArdhrapatreNa jAtarUpapariSkRtam 22  athainaM paJcabhiH pazcAt pratyavidhyat stanAntare  so 'payAto raNaM hitvA pArtha bANaprapIDitaH 23  taM vikarNaH zarais tIkSNair gArdhrapatrair ajihma gaiH  vivyAdha paravIra ghnam arjunaM dhRtarASTra jaH 24  tatas tam api kaunteyaH zareNAnataparvaNA  lalATe 'bhyahanat tUrNaM sa viddhaH prApatad rathAt 25  tataH pArtham abhidrutya duHsahaH sa viviMzatiH  avAkirac charais tIkSNaiH parIpsan bhrAtaraM raNe 26  tAv ubhau gArdhrapatrAbhyAM nizitAbhyAM dhanaMjayaH  viddhvA yugapad avyagras tayor vAhAn asUdayat 27  tau hatAzvau vividdhAGgau dhRtarASTrAtma jAv ubhau  abhipatya rathair anyair apanItau padAnugaiH 28  sarvA dizaz cAbhyapatad bIbhatsur aparAjitaH  kirITamAlI kaunteyo labdhalakSo mahAbalaH   |



 1   [vai]  atha saMgamya sarve tu kauravANAM mahArathAH  arjunaM sahitA yattAH pratyayudhyanta bhArata 2  sa sAyakamayair jAlaiH sarvatas tAn mahArathAn  prAchAdayad ameyAtmA nIhAra iva parvatAn 3  narad bhiz ca mahAnAgair heSamANaiz ca vAjibhiH  bherIzaGkhaninAdaiz ca sa zabdas tumulo 'bhavat 4  narAzvakAyAn nirbhidya lohAni kavacAni ca  pArthasya zarajAlAni viniSpetuH sahasrazaH 5  tvaramANaH zarAn asyAn pANDavaH sa babhau raNe  madhyaMdinagato 'rciSmAn pANDavaH sa babhau raNe 6  upaplavanta vitrastA rathebhyo rathinas tadA  sAdinaz cAzvapRSThebhyo bhUmau cApi padAtayaH 7  zaraiH saMtADyamAnAnAM kavacAnAM mahAtmanAm  tAmrarAjatalohAnAM prAdurAsIn mahAsvanaH 8  channam AyodhanaM sarvaM zarIrair gatacetasAm  gajAzvasAdibhis tatra zitabANAtta jIvitaiH 9  rathopasthAbhipatitair AstRtA mAnavair mahI  pranRtyad iva saMgrAme cApahasto dhanaMjayaH 10  zrutvA gANDIvanirghoSaM visphUrjitam ivAzaneH  trastAni sarvabhUtAni vyagacchanta mahAhavAt 11  kuNDaloSNISa dhArINi jAtarUpasrajAni ca  patitAni sma dRzyante zirAMsi raNamUrdhani 12  vizikhonmathitair gAtrair bAhubhiz ca sa kArmukaiH  sa hastAbharaNaiz cAnyaiH pracchannA bhAti medinI 13  zirasAM pAtyamAnAnAm antarA nizitaiH zaraiH  azvavRSTir ivAkAzAd abhavad bharatarSabha 14  darzayitvA tathAtmAnaM raudraM rudra parAkramaH  avaruddhaz caran pArtho dazavarSANi trINi ca  krodhAgnim utsRjad ghoraM dhArtarASTreSu pANDavaH 15  tasya tad dahataH sainyaM dRSTvA caiva parAkramam  sarve zAnti parA yodhA dhArtarASTrasya pazyataH 16  vitrAsayitvA tat sainyaM drAvayitvA mahArathAn  arjuno jayatAM zreSThaH paryavartata bhArata 17  prAvartayan nadIM ghorAM zoNitaughataraGgiNIm  asthi zaivalasaMbAdhAM yugAnte kAlanirmitAm 18  zaracApa plavAM ghorAM mAMsazoNitakardamAm  mahArathamahAdvIpAM zaGkhadundubhinisvanAm  cakAra mahatIM pArtho nadIm uttarazoNitAm 19  AdadAnasya hi zarAn saMdhAya ca vimuJcataH  vikarSataz ca gANDIvaM na kiM cid dRzyate 'ntaram   |



  1   [vai]  atha duryodhanaH karNo duHzAsanaviviMzatI  droNaz ca saha putreNa kRpaz cAtiratho raNe 2  punar IyuH susaMrabdhA dhanaMjaya jighAMsayA  visphArayantaz cApAnibalavanti dRDhAni ca 3  tAn prakIrNapatAkena rathenAdityavarcasA  pratyudyayau mahArAjan samastAn vAnaradhvajaH 4  tataH kRpaz ca karNaz ca droNaz ca rathinAM varaH  taM mahAstrair mahAvIryaM parivArya dhanaMjayam 5  zaraughAn samyag asyanto jImUtA iva vArSikAH  vavarSuH zaravarSANi prapatantaM kirITinam 6  iSubhir bahubhis tUrNaM samare lomavAhibhiH  adUrAt paryavasthAya pUrayAm Asur AdRtAH 7  tathAvakIrNasya hi tair divyair astraiH samantataH  na tasya dvyaGgulam api vivRtaM samadRzyata 8  tataH prahasya bIbhatsur divyam aindraM mahArathaH  astram AdityasaMkAzaM gANDIve samayojayat 9  sa razmibhir ivAdityaH pratapan samare balI  kirITamAlI kaunteyaH sarvAn prAcchAdayat kurUn 10  yathAbalAhake vidyUt pAvako vA ziloccaye  tathA gANDIvam abhavad indrAyudham ivAtatam 11  yathA varSati parjanye vidyud vibhrAjate divi  tathA daza dizaH sarvAH patad gANDIvam AvRNot 12  trastAz ca rathinaH sarve babhUvus tatra sarvazaH  sarve zAnti parA bhUtvA svacittAni na lebhire  saMgrAmavimukhAH sarve yodhAs te hatacetasaH 13  evaM sarvANi sainyAni bhagnAni bharatarSabha  prAdravanta dizaH sarvA nirAzAni svajIvite   |




 1   [vai]  tataH zAMtanavo bhISmo durAdharSaH pratApavAn  vadhyamAneSu yodheSu dhanaMjayam upAdravat 2  pragRhya kArmukazreSThaM jAtarUpapariSkRtam  zarAn AdAya tIkSNAgnAn marmabheda pramAthinaH 3  pANDureNAtapatreNa dhriyamANena mUrdhani  zuzubhe sa naravyAghro giriH sUryodaye yathA 4  pradhmAya zaGkhaM gAGgeyo dhArtarASTrAn praharSayan  pradakSiNam upAvRtya bIbhatsuM samavArayat 5  tam udvIkSya tathAyAntaM kaunteyaH paravIra hA  pratyagRhNAt prahRSTAtmA dhArA dharam ivAcalaH 6  tato bhISmaH zarAn aSTau dhvaje pArthasya vIryavAn  samaparyan mahAvegAJ zvasamAnAn ivoragAn 7  te dhvajaM pANDuputrasya samAsAdya patatriNaH  jvalantaH kapim Ajaghnur dhvajAgra nilayAMz ca tAn 8  tato bhallena mahatA pRthu dhAreNa pANDavaH  chatraM ciccheda bhISmasya tUrNaM tad apatad bhuvi 9  dhvajaM caivAsya kaunteyaH zarair abhyahanad dRDham  zIghrakRd rathavAhAMz ca tathobhau pArSNisArathI 10  tayos tad abhavad yuddhaM tumulaM lomaharSaNam  bhISmasya saha pArthena balivAsavayor iva 11  bhallair bhallAH samAgamya bhISma pANDavayor yudhi  antarikSe vyarAjanta khadyotAH prAvRSIva hi 12  agnicakram ivAviddhaM savyadakSiNam asyataH  gANDIvam abhavad rAjan pArthasya sRjataH zarAn 13  sa taiH saMchAdayAm Asa bhISmaM zarazataiH zitaiH  parvataM vAridhArAbhiz chAdayann iva toyadaH 14  tAM sa velAm ivoddhUtAM zaravRSTiM samutthitAm  vyadhamat sAyakair bhISmo arjunaM saMnivArayat 15  tatas tAni nikRttAni zarajAlAni bhAgazaH  samare 'bhivyazIryanta phalgunasya rathaM prati 16  tataH kanakapuGkhAnAM zaravRSTiM samutthitAm  pANDavasya rathAt tUrNaM zalabhAnAMm ivAyatim  vyadhamat tAM punas tasya bhISmaH zarazataiH zitaiH 17  tatas te kuravaH sarve sAdhu sAdhv iti cAbruvan  duSkaraM kRtavAn bhISmo yad arjunam ayodhayat 18  balavAMs taruNo dakSaH kSiprakArI ca pANDavaH  ko 'nyaH samarthaH pArthasya vegaM dhArayituM raNe 19  Rte zAMtanavAd bhISmAt kRSNAd vA devakI sutAt  AcArya pravarAd vApi bhAradvAjAn mahAbalAt  AcArya pravarAd vApi bhAradvAjAn mahAbalAt 20  astrair astrANi saMvArya krIDataH puruSarSabhau  cakSUMSi sarvabhUtAnAM mohayantau mahAbalau 21  prAjApatyaM tathaivaindram AgneyaM ca sudAruNam  vauberaM vAruNaM caiva yAmya vAyavyam eva ca  prayuJjAnau mahAtmAnau samare tau viceratuH 22  vismitAny atha bhUtAni tau dRSTvA saMyuge tadA  sAdhu pArtha mahAbAho sAdhu bISmeti cAbruvan 23  nedaM yuktaM manuSyeSu yo 'yaM saMdRzyate mahAn  mahAstrANAM saMprayogaH samare bhISmapArthayoH 24  evaM sarvAstraviduSor astrayuddham avartata  atha jiSNur upAvRtya pRthu dhAreNa kArmukam  cakarta bhISmasya tadA jAtarUpapariSkRtam 25  nimeSAntaramAtreNa bhISmo 'nyat kArmukaM raNe  samAdAya mahAbAhuH sa jyaM cakre mahAbalaH  zarAMz ca subahUn kruddho mumocAzu dhanaMjaye 26  arjuno 'pi zarAMz citrAn bhISmAya nizitAn bahUn  cikSepa sumahAtejAs tathA bhISmaz ca pANDave 27  tayor divyAstraviduSor asyator anizaM zarAn  na vizeSas tadA rAjam*l lakSyate sma mahAtmanoH 28  athAvRNod daza dizaH zarair ati rathais tadA  kirITamAlI kaunteyaH zUraH zAMtanavas tathA 29  atIva pANDavo bhISmaM bhISmaz cAtIva pANDavam  babhUva tasmin saMgrAme rAjam*l loke tad adbhutam 30  pANDavena hatAH zUrA bhISmasya ratharakSiNaH  zerate sma tadA rAjan kaunteyasyAbhito ratham 31  tato gANDIvanirmuktA niramitraM cikIrSavaH  Agacchan puGkhasaMzliSTAH zvetavAhana patriNaH 32  niSpatanto rathAt tasya dhautA hairaNyavAsasaH  AkAze samadRzyanta haMsAnAm iva paGktayaH 33  tasya tad divyam astraM hi pragADhaM citram asyataH  prekSante smAntarikSa sthAH sarve devAH sa vAsavAH 34  tad dRSTvA paramaprIto gandharvaz citram adbhutam  zazaMsa devarAjAya citrasenaH pratApavAn 35  pazyemAn arinirdArAn saMsaktAn iva gacchataH  citrarUpam idaM jiSNor divyam astram udIryataH 36  nedaM manuSyAH zraddadhyur na hIdaM teSu vidyate  paurANAnAM mahAstrANAM vicitrAyaM samAgamaH 37  madhyaMdinagataM sUryaM pratapantam ivAmbare  na zaknuvanti sainyAni pANDavaM prativIkSitum 38  ubhau vizrutakarmANAv ubhau yuddhavizAradau  ubhau sadRzakarmANAv ubhau yudhi durAsadau 39  ity ukto devarAjas tu pArtha bhISma samAgamam  pUjayAm Asa divyena puSpavarSeNa bhArata 40  tato bhISmaH zAMtanavo vAme pArzve samarpayat  asyataH pratisaMdhAya vivRtaM savyasAcinaH 41  tataH prahasya bIbhatsuH pRthu dhAreNa kArmukam  nyakRntad gArdhrapatreNa bhISmasyAmitatejasaH 42  athainaM dazabhir bANair pratyavidhyat stanAntare  yatamAnaM parAkrAntaM kuntIputro dhanaMjayaH 43  sa pIDito mahAbAhur gRhItvA rathakUbaram  gAGgeyo yudhi durdharSas tasthau dIrgham ivAturaH 44  taM visaMjJam apovAha saMyantA rathavAjinAm  upadezam anusmRtya rakSamANo mahAratham   |



  1   [vai]  bhISme tu saMgrAmaziro vihAya; palAyamAne dhetarASTra putraH  ucchritya ketuM vinadan mahAtmA; svayaM vigRhyArjunam AsasAda 2  sa bhImadhanvAnam udagravIryaM; dhanaMjayaM zatrugaNe carantam  A karNa pUrNAyatacoditena; bhallena vivyAdha lalATamadhye 3  sa tena bANena samarpitena; jAmbUnadAbhena susaMzitena  rarAja rAjan mahanIya karmA; yathaika parvA ruciraika zRGgaH 4  athAsya bANena vidAritasya; prAdurbabhUvAsRg ajasram uSNam  sA tasya jAmbUnadapuSpacitrA; mAleva citrAbhivirAjate sma 5  sa tena bANAbhihatas tarasvI; duryodhanenoddhata manyuvegaH  zarAn upAdAya viSAgnikalpAn; vivyAdha rAjAnam adInasattvaH 6  duryodhanaz cApi tam ugratejAH; pArthaz ca duryodhanam ekavIraH  anyonyam Ajau puruSapravIrau; samaM samAjaghnatur AjamIDhau 7  tataH prabhinnena mahAgajena; mahIdharAbhena punar vikarNaH  rathaiz caturbhir gajapAdarakSaiH; kuntIsutaM jiSNum athAbhyadhAvat 8  tam ApatantaM tvaritaM gajendraM; dhanaMjayaH kumbhavibhAgamadhye  A karNa pUrNena dRDhAyasena; bANena vivyAdha mahAjavena 9  pArthena sRSTaH sa tu gArdhrapatra; A puGkhadezAt praviveza nAgam  vidArya zailapravara prakAzaM; yathAzaniH parvatam indra sRSTaH 10  zaraprataptaH sa tu nAgarAjaH; pravepitAGgo vyathitAntar AtmA  saMsIdamAno nipapAta mahyAM; vajrAhataM zRGgam ivAcalasya 11  nipAtite dantivare pRthivyAM; trAsAd vikarNaH sahasAvatIrya  tUrNaM padAny aSTa zatAni gatvA; viviMzateH syandanam Aruroha 12  nihatya nAgaM tu zareNa tena; vajropamenAdrivarAmbudAbham  tathAvidhenaiva zareNa pArtho; duryodhanaM vakSasi nirbibheda 13  tato gaje rAjani caiva bhinne; bhagne vikarNe ca sa pAdarakSe  gANDIvamuktair vizikhaiH praNunnAs; te yudha mukhyAH sahasApajagmuH 14  dRSTvaiva bANena hataM tu nAgaM; yodhAMz ca sarvAn dravato nizamya  rathaM samAvRtya kurupravIro; raNAt pradudrAva yato na pArthaH 15  taM bhImarUpaM tvaritaM dravantaM; duryodhanaM zatrusaho niSaGgI  prAkSveDayad yoddhumanAH kirITI; bANena viddhaM rudhiraM vamantam 16   [arj]  vihAya kIrtiM vipulaM yazaz ca; yuddhAt parAvRtya palAyase kim  na te 'dya tUryANi samAhatAni; yathAvad udyAnti gatasya yuddhe 17  yudhiSThirasyAsmi nidezakArI; pArthas tRtIyo yudhi ca sthiro 'smi  tadartham AvRtya mukhaM prayaccha; narendra vRttaM smara dhArtarASTra 18  moghaM tavedaM bhuvi nAmadheyaM; duryodhanetIha kRtaM purastAt  na hIha duryodhanatA tavAsti; palAyamAnasya raNaM vihAya 19  na te purastAd atha pRSThato vA; pazyAmi duryodhana rakSitAram  paraihi yuddhena kurupravIra; prANAn priyAn pANDavato 'dya rakSa   |



 1   [vai]  AhUyamAnas tu sa tena saMkhye; mahAmanA dhRtarASTrasya putraH  nivartitas tasya girAGkuzena; gajo yathAmatta ivAGkuzena 2  so 'mRSyamANo vacasAbhimRSTo; mahArathenAti rathas tarasvI  paryAvavartAtha rathena vIro; bhogI yathA pAdatalAbhimRSTaH 3  taM prekSya karNaH parivartamAnaM; nivartya saMstabhya ca viddha gAtraH  duryodhanaM dakSiNato 'bhyagacchat; pArthaM nRvIro yudhi hemamAlI 4  bhISmas tataH zAMtanavo nivRtya; hiraNyakakSyAMs tvarayaMs turaMgAn  duryodhanaM pazcimato 'bhyarakSat; pArthAn mahAbAhur adhijya dhanvA 5  droNaH kRpaz caiva viviMzatiz ca; duHzAsanaz caiva nivRtya zIghram  sarve purastAd vitateSu cApA; duryodhanArthaM tvaritAbhyupeyuH 6  sa tAny anIkAni nivartamAnAny; Alokya pUrNaughanibhAni pArthaH  haMso yathA megham ivApatantaM; dhanaMjayaH pratyapatat tarasvI 7  te sarvataH saMparivArya pArtham; astrANi divyAni samAdadAnAH  vavarSur abhyetya zaraiH samantAn; meghA yathA bhUdharam ambuvegaiH 8  tato 'stram astreNa nivArya teSAM; gANDIvadhanvA kurupuMgavAnAm  saMmohanaM zatrusaho 'nyad astraM; prAduzcakAraindrir apAraNIyam 9  tato dizaz cAnudizo vivRtya; zaraiH sudhArair nizitaiH supuGkhaiH  gANDIvaghoSeNa manAMsi teSAM; mahAbalaH pravyathayAM cakAra 10  tataH punar bhImaravaM pragRhya; dorbhyAM mahAzaGkham udAraghoSam  vyanAdayat sa pradizo dizaH khaM; bhuvaM ca pArtho dviSatAM nihantA 11  te zaGkhanAdena kurupravIrAH; saMmohitAH pArtha samIritena  utsRjya cApAni durAsadAni; sarve tadA zAnti parA babhUvuH 12  tathA visaMjJeSu pareSu pArthaH; smRtvA tu vAkyAni tathottarAyAH  niryAhi madhyAd iti matsyaputram; uvAca yAvat kuravo visaMjJAH 13  AcArya zAradvatayoH suzukle; karNasya pItaM ruciraM ca vastram  drauNez ca rAjJaz ca tathaiva nIle; vastre samAdatsva narapravIra 14  bhISmasya saMjJAM tu tathaiva manya; jAnAti me 'strapratighAtam eSaH  etasya vAhAn kuru savyatas tvam; evaM hi yAtavyam amUDha saMjJaiH 15  razmIn samutsRjya tato mahAtmA; rathAd avaplutya virATa putraH  vastrANy upAdAya mahArathAnAM; tUrNaM punaH svaM ratham Aruroha 16  tato 'nvazAsac caturaH sadazvAn; putro virATasya hiraNyakakSyAn  te tad vyatIyur dhvajinAm anIkaM; zvetA vahanto 'rjunam AjimadhyAt 17  tathA tu yAntaM puruSapravIraM; bhISmaH zarair abhyahanat tarasvI  sa cApi bhISmasya hayAn nihatya; vivyAdha pArzve dazabhiH pRSatkaiH 18  tato 'rjuno bhISmam apAsya yuddhe; viddhvAsya yantAram ariSTadhanvA  tasthau vimukto rathavRndamadhyAd; rAhuM vidAryeva sahasrarazmiH 19  labdhvA tu saMjJAM ca kurupravIraH; pArthaM samIkSyAtha mahendrakalpam  raNAd vimuktaM sthitam ekam Ajau; sa dhArtarASTras tvarito babhASe 20  ayaM kathaM svid bhavatAM vimuktas; taM vai prabadhnIta yathA na mucyet  tam abravIc chAMtanavaH prahasya; kva te gatA buddhir abhUt kva vIryam 21  zAntiM parAzvasya yathA sthito 'bhUr; utsRjya bANAMz ca dhanuz ca citram  na tv eva bIbhatsur alaM nRzaMsaM; kartuM na pApe 'sya mano niviSTam 22  trailokyahetor na jahet svadharmaM; tasmAn na sarve nihatA raNe 'smin  kSipraM kurUn yAhi kurupravIra; vijitya gAz ca pratiyAtu pArthaH 23  duryodhanas tasya tu tan nizamya; pitAmahasyAtma hitaM vaco 'tha  atItakAmo yudhi so 'ty amarSI; rAjA viniHzvasya babhUva tUSNIm 24  tad bhISma vAkyaM hitam IkSya sarve; dhanaMjayAgniM ca vivardhamAnam  nivartanAyaiva mano nidadhyur; duryodhanaM te parirakSamANAH 25  tAn prasthitAn prItamanAH sa pArtho; dhanaMjayaH prekSya kurupravIrAn  AbhASamANo 'nuyayau muhUrtaM; saMpUjayaMs tatra gurUn mahAtmA 26  pitAmahaM zAMtanavaM sa vRddhaM; droNaM guruM ca pratipUjya mUrdhnA  drauNiM kRpaM caiva gurUMz ca sarvAJ; zarair vicitrair abhivAdya caiva 27  duryodhanasyottama ratnacitraM; ciccheda pArtho mukuTaM zareNa  Amantrya vIrAMz ca tathaiva mAnyAn; gANDIvaghoSeNa vinAdya lokAn 28  sa devadattaM sahasA vinAdya; vidArya vIro dviSatAM manAMsi  dhvajena sarvAn abhibhUya zatrUn; sa hemajAlena virAjamAnaH 29  dRSTvA prayAtAMs tu kurUn kirITI; hRSTo 'bravIt tatra sa matsyaputram  AvartayAzvAn pazavo jitAs te; yAtAH pare yAhi puraM prahRSTaH   |



  1   [vai]  tato vijitya saMgrAme kurUn govRSabhekSaNaH  samAnayAm Asa tadA virATasya dhanaM mahat 2  gateSu ca prabhagneSu dhArtarASTreSu sarvazaH  vanAn niSkramya gahanAd bahavaH kuru sainikAH 3  bhayAt saMtrastamanasaH samAjagmus tatas tataH  muktakezA vyadRzyanta sthitAH prAJjalayas tadA 4  kSutpipAsAparizrAntA videza sthA vicetasaH  UcuH praNamya saMbhrAntAH pArtha kiM karavAm ate 5   [arj]  svasti vrajata bhadraM vo na bhetavyaM kathaM cana  nAham ArtAJ jighAMsAmi bhRzam AzvAsayAmi vaH 6   [vai]  tasya tAm abhayAM vAcaM zrutvA yodhAH samAgatAH  AyuH kIrtiyazo dAbhis tam Azir bhir anandayan 7  tato nivRttAH kuravaH prabhagnA vazam AsthitAH  panthAnam upasaMgamya phalguno vAkyam abravIt 8  rAjaputra pratyavekSa samAnItAni sarvazaH  gokulAni mahAbAho vIra gopAlakaiH saha 9  tato 'harAhNe yAsyAmo virATanagaraM prati  AzvAsya pAyayitvA ca pariplAvya ca vAjinaH 10  gacchantu tvaritAz caiva gopAlAH preSitAs tvayA  nagare priyam AkhyAtuM ghoSayantu ca te jayam 11   [vai]  uttaras tvaramANo 'tha dUtAn AjJApayat tataH  vacanAd arjunasyaiva AcakSadhvaM jayaM mama   |



1   [vai]  avajitya dhanaM cApi virATo vAhinIpatiH  prAvizan nagaraM hRSTaz caturbhiH saha pANDavaiH 2  jitvA trigartAn saMgrAme gAz caivAdAya kevalAH  azobhata mahArAjaH saha pArthaiH zriyA vRtaH 3  tam AsanagataM vIraM suhRdAM prItivardhanam  upatasthuH prakRtayaH samastA brAhmaNaiH saha 4  sabhAjitaH sa sainyas tu pratinandyAtha matsyarAj  visarjayAm Asa tadA dvijAMz ca prakRtIs tathA 5  tataH sa rAjA matsyAnAM virATo vAhinIpatiH  uttaraM paripapraccha kva yAta iti cAbravIt 6  Acakhyus tasya saMhRSTAH striyaH kanyAz ca vezmani  antaHpura carAz caiva kurubhir godhanaM hRtam 7  vijetum abhisaMrabdha eka evAti sAhasAt  bRhannaDA sahAyaz ca niryAtaH pRthivIM jayaH 8  upayAtAn ati rathAn droNaM zAMtanavaM kRpam  karNaM duryodhanaM caiva droNaputraM ca SaD rathAn 9  rAjA virATo 'tha bhRzaM prataptaH; zrutvA sutaM hy ekarathena yAtam  bRhannaDA sArathim AjivardhanaM; provAca sarvAn atha mantrimukhyAn 10  sarvathA kuravas te hi ye cAnye vasudhAdhipAH  trigartAn nirjitAJ zrutvA na sthAsyanti kadA cana 11  tasmAd gacchantu me yodhA baleNa mahatA vRtAH  uttarasya parIpsArthaM ye trigartair avikSatAH 12  hayAMz ca nAgAMz ca rathAMz ca zIghraM; padAtisaMghAMz ca tataH pravIrAn  prasthApayAm Asa sutasya hetor; vicitrazastrAbharaNopapannAn 13  evaM sa rAjA matsyAnAM virATo 'kSauhiNIpatiH  vyAdidezAtha tAM kSipraM vAhinIM caturagniNIm 14  kumAram Azu jAnIta yadi jIvati vA na vA  yasya yantA gataH SaNDho manye 'haM na sa jIvati 15  tam abravId dharmarAjaH prahasya; virATam ArtaM kurubhiH prataptam  bRhannaDA sArathiz cen narendra; pare na neSyanti tavAdya gAs tAH 16  sarvAn mahI pAn sahitAn kurUMz ca; tathaiva devAsurayakSanAgAn  alaM vijetuM samare sutas te; svanuSThitaH sArathinA hi tena 17  athottareNa prahitA dUtAs te zIghragAminaH  virATanagaraM prApya jayam AvedayaMs tadA 18  rAjJas tataH samAcakhyau mantrI vijayam uttamam  parAjayaM kurUNAM cApy upAyAntaM tathottaram 19  sarvA vinirjitA gAvaH kuravaz ca parAjitAH  uttaraH saha sUtena kuzalI ca paraMtapa 20   [kanka]  diSTyA te nirjitA gAvaH kuravaz ca parAjitAH  diSTyA te jIvitaH putraH zrUyate pArthivarSabha 21  nAdbhutaM tv eva manye 'haM yat te putro 'jayat kurUn  dhruva eva jayas tasya yasya yantA bRhannaDA 22   [vai]  tato virATo nRpatiH saMprahRSTatanU ruhaH  zrutvA tu vijayaM tasya kumArasyAmitaujasaH  AchAdayitvA dUtAMs tAn mantriNaH so 'bhyacodayat 23  rAjamArgAH kriyantAM me patAkAbhir alaM kRtAH  puSpopahArair arcyantAM devatAz cApi sarvazaH 24  kumArA yodhamukhyAz ca gaNikAz ca svalaM kRtAH  vAditrANi ca sarvANi pratyudyAntu sutaM mama 25  ghaNDA paNavakaH zIghraM mattam Aruhya vAraNam  zRGgATakeSu sarveSu AkhyAtu vijayaM mama 26  uttarA ca kumArIbhir bahvIbhir abhisaMvRtA  zRGgAraveSAbharaNA pratyudyAtu bRhannaDAm 27  zrutvA tu tad vacanaM pArthivasya; sarve punaH svastikapANayaz ca  bheryaz ca tUryANi ca vArijAz ca; veSaiH parArdhyaiH pramadAH zubhAz ca 28  tathaiva sUtAH saha mAgadhaiz ca; nandI vAdyAH praNavAs tUryavAdyAH  purAd virATasya mahAbalasya; pratyudyayuH putram anantavIryam 29  prasthApya senAM kanyAz ca gaNikAz ca svalaMkRtAH  matsyarAjo mahAprAjJaH prahRSTa idam abravIt  akSAn Ahara sairandhir kaGkadyUtaM pravartatAm 30  taM tathA vAdinaM dRSTvA pANDavaH pratyabhASata  na devitavyaM hRSTena kitaveneti naH zrutam 31  na tvAm adya mudA yuktam ahaM devitum utsahe  priyaM tu te cikIrSAmi vartatAM yadi manyase 32   [virATa]  striyo gAvo hiraNyaM ca yac cAnyad vasu kiM cana  na me kiM cit tvayA rakSyam antareNApi devitum 33   [kanka]  kiM te dyUtena rAjendra bahudoSeNa mAnada  devane bahavo doSAs tasmAt tatparivarjayet 34  zrutas te yadi vA dRSTaH pANDavo vai yudhiSThiraH  sa rAjyaM sumahat sphItaM bhrAtRRMz ca tridazopamAn 35  dyUte hAritavAn sarvaM tasmAd dyUtaM na rocaye  atha vA manyase rAjan dIvyAva yadi rocate 36   [vai]  pravartamAne dyUte tu matsyaH pANDavam abravIt  pazya putreNa me yuddhe tAdRzAH kuravo jitAH 37  tato 'bravIn matsyarAjaM dharmaputro yudhiSThiraH  bRhannaDA yasya yantA kathaM sa na vijeSyati 38  ity uktaH kupito rAjA matsyaH pANDavam abravIt  samaputreNa me SaNDhaM brahma bandho prazaMsati 39  vAcyAvAcyaM na jAnISe nUnaM mAm avamanyase  bhISmadroNamukhAn sarvAn kasmAn na sa vijeSyati 40  vayasyatvAt tu te brahmann aparAdham imaM kSame  nedRzaM te punar vAcyaM yadi jIvitum icchasi 41   [yudhisThira]  yatra droNas tathA bhISmo drauNir vaikartanaH kRpaH  duryodhanaz ca rAjendra tathAnye ca mahArathAH 42  marudgaNaiH parivRtaH sAkSAd api zatakratuH  ko 'nyo bRhannaDAyAs tAn pratiyudhyeta saMgatAn 43   [virATa]  bahuzaH pratiSiddho 'si na ca vAcaM niyacchasi  niyantA cen na vidyeta na kaz cid dharmam Acaret 44   [vai]  tataH prakupito rAjA tam akSeNAhanad bhRzam  mukhe yudhiSThiraM kopAn naivam ity eva bhartsayan 45  balavat pratividdhasya nastaH zoNitam Agamat  tad aprAptaM mahIM pArthaH pANibhyAM pratyagRhNata 46  avaikSata ca dharmAtmA draupadIM pArzvataH sthitAm  sA veda tam abhiprAyaM bhartuz cittavazAnugA 47  pUrayitvA ca sauvarNaM pAtraM kAMsyam aninditA  tac choNitaM pratyagRhNAd yat prasusrAva pANavAt 48  athottaraH zubhair gandhair mAlyaiz ca vividhais tathA  avakIryamANaH saMhRSTo nagaraM svairam Agamat 49  sabhAjyamAnaH pauraiz ca strIbhir jAnapadais tathA  AsAdya bhavanadvAraM pitre sa pratyahArayat 50  tato dvAr sthaH pravizyaiva virATam idam abravIt  bRhan naDA sahAyas te putro dvAry uttaraH sthitaH 51  tato hRSTo matsyarAjaH kSattAram idam abravIt  pravezyatAm ubhau tUrNaM darzanepsur ahaM tayoH 52  kSattAraM kururAjas tu zanaiH karNa upAjapat  uttaraH pravizatv eko na prevezyA bRhannaDA 53  etasya hi mahAbAho vratam etat samAhitam  yo mamAGge vraNaM kuryAc choNitaM vApi darzayet  anyatra saMgrAmaganAn na sa jIved asaMzayam 54  na mRSyAd bhRzasaMkruddho mAM dRSTvaiva sa zoNitam  virATam iha sAmAtyaM hanyAt sabalavAhanam   |




 1   [vai]  tato rAjJaH suto jyeSThaH prAvizat pRthivIM jayaH  so 'bhivAdya pituH pAdau dharmarAjam apazyata 2  sa taM rudhirasaMsiktam anekAgram anAgasam  bhUmAv AsInam ekAnte sairandhryA samupasthitam 3  tataH papraccha pitaraM tvaramANa ivottaraH  kenAyaM tADito rAjan kena pApam idaM kRtam 4   [virATa]  mayAyaM tADito jihmo na cApy etAvad arhati  prazasyamAne yaH zUre tvayi SaNDhaM prazaMsati 5   [uttara]  akAryaM te kRtaM rAjan kSipram eva prasAdyatAm  mA tvA brahma viSaM ghoraM sa mUlam api nirdahet 6   [vai]  saputrasya vacaH zrutvA virATo rASTravardhanaH  kSamayAm Asa kaunteyaM bhasma channam ivAnalam 7  kSamayantaM tu rAjAnaM pANDavaH pratyabhASata  ciraM kSAntam idaM rAjan na manyur vidyate mama 8  yadi hy etat pated bhUmau rudhiraM mama nastataH  sarASTras tvaM mahArAja vinazyethA na saMzayaH 9  na dUSayAmi te rAjan yac ca hanyAd adUSakam  balavantaM mahArAja kSipraM dAruNam ApnuyAt 10  zoNite tu vyatikrAnte praviveza bRhannaDA  abhivAdya virATaM ca kaGkaM cApy upatiSThata 11  kSamayitvA tu kauravyaM raNAd uttaram Agatam  prazazaMsa tato matsyaH zRNvataH savyasAcinaH 12  tvayA dAyAdavAn asmi kaikeyInandivardhana  tvayA me sadRzaH putro na bhUto na bhaviSyati 13  padaM padasahasreNa yaz caran nAparAdhnuyAt  tena karNena te tAta katham AsIt samAgamaH 14  manuSyaloke sakale yasya tulyo na vidyate  yaH samudra ivAkSobhyaH kAlAgnir iva duHsahaH  tena bhISmeNa te tAta katham AsIt samAgamaH 15  AcAryo vRSNivIrANAM pANDavAnAM ca yo dvijaH  sarvakSatrasya cAcAryaH sarvazasta bhRtAM varaH  tena droNena te tAta katham AsIt samAgamaH 16  AcArya putro yaH zUraH sarvazasta bhRtAm api  azvatthAmeti vikhyAtaH kathaM tena samAgamaH 17  raNe yaM prekSya sIdanti hRtasvA vaNijo yathA  kRpeNa tena te tAta katham AsIt samAgamaH 18  parvataM yo 'bhividhyeta rAjaputro maheSubhiH  duryodhanena te tAta katham AsIt samAgamaH 19   [uttara]  na mayA nirjitA gAvo na mayA nirjitAH pare  kRtaM tu karma tat sarvaM devaputreNa kena cit 20  sa hi bhItaM dravantaM mAM devaputro nyavArayat  sa cAtiSThad rathopasthe vajrahastanibho yuvA 21  tena tA nirjitA gAvas tena te kuravo jitAH  tasya tat karma vIrasya na mayA tAta tat kRtam 22  sa hi zAradvataM droNaM droNaputraM ca vIryavAn  sUtaputraM ca bhISmaM ca cakAra vimukhAJ zaraiH 23  duryodhanaM ca samare sa nAgam iva yUthapam  prabhagnam abravId bhItaM rAjaputraM mahAbalam 24  na hAstinapure trANaM tava pazyAmi kiM cana  vyAyAmena parIpsasva jIvitaM kauravAtma ja 25  na mokSyase palAyaMs tvaM rAjan yuddhe manaH kuru  pRthivIM bhokSyase jitvA hato vA svargam Apsyasi 26  sa nivRtto naravyAghro muJcan vajranibhAJ zarAn  sacivaiH saMvRto rAjA rathe nAga iva zvasan 27  tatra me romaharSo 'bhUd Urustambhaz ca mAriSa  yad abhraghanasaMkAzam anIkaM vyadhamac charaiH 28  tat praNudya rathAnIkaM siMhasaMhanano yuvA  kurUMs tAn prahasan rAjan vAsAMsy apaharad balI 29  ekena tena vIreNa SaD rathAH parivAritAH  zArdUleneva mattena mRgAs tRNacarA vane 30   [virATa]  kva sa vIro mahAbAhur devaputro mahAyazAH  yo me dhanam avAjaiSIt kurubhir grastam Ahave 31  icchAm itam ahaM draSTum arcituM ca mahAbalam  yena me tvaM ca gAvaz ca rakSitA deva sUnunA 32   [uttara]  antardhAnaM gatas tAta devaputraH pratApavAn  sa tu zvo vA paraSvo vA manye prAdur bhaviSyati 33   [vai]  evam AkhyAyamAnaM tu channaM satreNa pANDavam  vasantaM tatra nAjJAsId virATaH pArtham arjunam 34  tataH pArtho 'bhyanujJAto virATena mahAtmanA  pradadau tAnivAsAMsi virATa duhituH svayam 35  uttarA tu mahArhANi vividhAni tanUni ca  pratigRhyAbhavat prItA tani vAsAMsi bhAminI 36  mantrayitvA tu kaunteya uttareNa rahas tadA  itikartavyatAM sarvAM rAjany atha yudhiSThire 37  tatas tathA tad vyadadhAd yathAvat puruSarSabha  saha putreNa matsyasya prahRSTo bharatarSabhaH   |



 1   [vai]  tatas tRtIye divase bhrAtaraH paJca pANDavAH  snAtAH zuklAmbara dharAH samaye caritavratAH 2  yudhiSThiraM puraskRtya sarvAbharaNabhUSitAH  abhipadmA yathA nAgA bhrAjamAnA mahArathAH 3  virATasya sabhAM gatvA bhUmipAlAsaneSv atha  niSeduH pAvakaprakhyAH sarve dhiSNyeSv ivAgnayaH 4  teSu tatropaviSTeSu virATaH pRthivIpatiH  AjagAma sabhAM kartuM rAjakAryANi sarvazaH 5  zrImataH pANDavAn dRSTvA jvalataH pAvakAn iva  atha matsyo 'bravIt kaGkaM devarUpam avasthitam  marudgaNair upAsInaM tridazAnAm ivezvaram 6  sa kilAkSAti vApas tvaM sabhAstAro mayA kRtaH  atha rAjAsane kasmAd upaviSTo 'sy alaM kRtaH 7  parihAsepsayA vAkyaM virATasya nizamya ta  smayamAno 'rjuno rAjann idaM vacanam abravIt 8  indrasyApy AsanaM rAjann ayam AroDhum arhati  brahmaNyaH zutavAMs tyAgI yajJazIlo dRDhavrataH 9  ayaM kurUNAm RSabhaH kuntIputro yudhiSThiraH  asya kIrtiH sthitA loke sUryasyevodyataH prabhA 10  saMsaranti dizaH sarvA yazaso 'sya gabhastayaH  uditasyeva sUryasya tejaso 'nu gabhastayaH 11  enaM dazasahasrANi kuJjarANAM tarasvinAm  anvayuH pRSThato rAjan yAvad adhyAvasat kurUn 12  triMzad enaM sahasrANi rathAH kAJcanamAlinaH  sadazvair upasaMpannAH pRtThato 'nuyayuH sadA 13  enam aSTa zatAH sUtAH sumRSTamaNikuNDalAH  astuvan mAgadhair sArdhaM purA zakram ivarSayaH 14  enaM nityam upAsand akuravaH kiMkarA yathA  sarve ca rAjan rAjAno dhanezvaram ivAmarAH 15  eSa sarvAn mahIpAlAn karam AhArayat tadA  vaizyAn iva mahArAja vivazAn svavazAn api 16  aSTAzIti sahasrANi snAtakAnAM mahAtmanAm  upajIvanti rAjAnam enaM sucaritavratam 17  eSa vRddhAn anAthAMz ca vyaGgAn paGgUMz ca mAnavAn  putravat pAlayAm Asa prajA dharmeNa cAbhibho 18  eSa dharme dame caiva krodhe cApi yatavrataH  mahAprasAda brahmaNyaH satyavAdI ca pArthivaH 19  zrIpratApena caitasya tapyate sa suyodhanaH  sagaNaH saha karNena saubalenApi vA vibhuH 20  na zakyante hy asy aguNAH prasaMkhyAtuM narezvara  eSa dharmaparo nityam AnRzaMsyaz ca pANDavaH 21  evaM yukto mahArAjaH pANDavaH pArthivarSabhaH  kathaM nArhati rAjArham AsanaM pRthivIpatiH   |



1   [virATa]  yady eSa rAjA kauravyaH kuntIputro yudhiSThiraH  katamo 'syArjuno bhrAtA bhImaz ca katamo balI 2  nakulaH sahadevo vA draupadI vA yazasvinI  yadA dyUte jitAH pArthA na prajJAyanta te kva cit 3   [arj]  ya eSa ballavo brUte sUdas tava narAdhipa  eSa bhImo mahAbAhur bhImavegaparAkramaH 4  eSa krodhavazAn hatvA parvate gandhamAdane  saugandhikAni divyAni kRSNArthe samupAharat 5  gaGgharva eSa vai hantA kIcakAnAM durAtmanAm  vyAghrAn RkSAn varAhAMz ca hatavAn strI pure tava 6  yaz cAsId azvabandhas te nakulo 'yaM paraMtapaH  gosaMkhyaH sahadevaz ca mAdrIputrau mahArathau 7  zRGgAraveSAbharaNau rUpavantau yazasvinau  nAnA rathasahasrANAM samarthau puruSarSabhau 8  eSA padmapalAzAkSI sumadhyA cAruhAsinI  sairandhrI draupadI rAjan yatkRte kIcakA hatAH 9  arjuno 'haM mahArAja vyaktaM te zrotram AgataH  bhImAd avarajaH pArtho yamAbhyAM cApi pUrvajaH 10  uSitAH sma mahArAja sukhaM tava nivezane  ajJAtavAsam uSitA garbhavAsa iva prajAH 11   [vai]  yadArjunena te vIrAH kathitAH paJca pANDavAH  tadArjunasya vairATiH kathayAm Asa vikramam 12  ayaM sa dviSatAM madhye mRgANAm iva kesarI  acarad rathavRndeSu nighnaMs teSAM varAn varAn 13  anena viddho mAtaGgo mahAn ekkeSuNA hataH  hiraNyakakSyaH saMgrAme dantAbhyAm agaman mahIm 14  anena vijitA gAvo jitAz ca kuravo yudhi  asya zaGkhapraNAdena karNau me badhirI kRtau 15  tasya tad vacanaM zrutvA matsyarAjaH pratApavAn  uttaraM pratyuvAcedam abhipanno yudhiSThire 16  prasAdanaM pANDavasya prAptakAlaM hi rocaye  uttarAM ca prayacchAmi pArthAya yadi te matam 17   [uttara]  arcyAH pUjyAz ca mAnyAz ca prAptakAlaM ca me matam  pUjyantAM pUjanArhAz ca mahAbhAgAz ca pANDavAH 18   [virATa]  ahaM khalv api saMgrAme zatrUNAM vazam AgataH  mokSito bhImasenena gAvaz ca vijitAs tathA 19  eteSAM bAhuvIryeNa yad asmAkaM jayo mRdhe  vayaM sarve sahAmAtyAH kuntIputraM yudhiSThiram  prasAdayAmo bhadraM te sAnujaM pANDavarSabham 20  yad asmAbhir ajAnad bhiH kiM cid ukto narAdhipaH  kSantum arhati tat sarvaM dharmAtmA hy eSa pANDavaH 21   [vai]  tato virATaH paramAbhituSTaH; sametya rAjJA samayaM cakAra  rAjyaM ca sarvaM visasarja tasmai;  sa daNDakozaM sa puraM mahAtmA 22  pANDavAMz ca tataH sarvAn matsyarAjaH pratApavAn  dhanaMjayaM puraskRtya diSTyA diSTyeti cAbracIt 23  samupAghrAya mUrdhAnaM saMzliSya ca punaH punaH  yudhiSThiraM ca bhImaM ca mAdrIputrau ca pANDavau 24  nAtRpyad darzane teSAM virATo vAhinIpatiH  saMprIyamANo rAjAnaM yudhiSThiram athAbravIt 25  diSTyA bhavantaH saMprAptAH sarve kuzalino vanAt  diSTyA ca pAritaM kRcchram ajJAtaM vai durAtmabhiH 26  idaM ca rAjyaM naH pArthA yac cAnyad vasu kiM cana  pratigRhNantu sat sarvaM kaunteyA avizaGkayA 27  uttarAM pratigRhNAtu savyasAcI dhanaMjayaH  ayaM hy aupayiko bhartA tasyAH puruSasattamaH 28  evam ukto dharmarAjaH pArtham aikSad dhanaMjayam  IkSitaz cArjuno bhrAtrA matsyaM vacanam abravIt 29  pratigRhNAmy ahaM rAjan snuSAM duhitaraM tava  yuktaz cAvAM hi saMbandho matsyabhAratasattamau   |